កូរ៉េខាងត្បូង និងអាមេរិកបានផ្តើមសមយុទ្ធប្រចាំឆ្នាំ ក្នុងពេលដែលស្ថានការណ៍កំពុងធូរស្រាល
នៅថ្ងៃអាទិត្យ ទី១ មេសានេះ កងទ័ពអាមេរិក និងកូរ៉េខាងត្បូងបានផ្តើមសមយុទ្ធយោធាប្រចាំឆ្នាំដែលមានរយៈពេល ៤សប្តាហ៍។ សមយុទ្ធនេះបានធ្វើឡើង ចំពេលដែលទំនាក់ទំនងរវាងកូរ៉េខាងត្បូង និងកូរ៉េខាងជើងក៏ដូចជារវាងកូរ៉េខាងជើង និងអាមេរិកកំពុងមានដំណើរការល្អ។ ដំណើរការល្អព្រោះមេដឹកនាំនៃកូរ៉េទាំងពីរត្រៀមជួបគ្នានៅថ្ងៃទី២៧ មេសាខាងមុខ ហើយប្រមុខដឹកនាំកូរ៉េខាងជើងលោកគីម ជុងអ៊ុនក៏គ្រោងនឹងជួបលោកប្រធានាធិបតីអាមេរិកដូណាល់ ត្រាំនៅចុងខែឧសភាដែរ។
ចុះផ្សាយនៅថ្ងៃ៖
ស្តាប់ - ០១:៥៩
សមយុទ្ធយោធារវាងទ័ពអាមេរិក និងទ័ពកូរ៉េខាងត្បូងជាសមយុទ្ធមួយដែលសម្ព័ន្ធមិត្តទាំងពីរតែងរៀបចំធ្វើឡើងជារៀងរាល់ឆ្នាំនៅក្នុងខែមីនា។ តែត្រូវបានលើកមកធ្វើក្នុងខែមេសាវិញ ដោយសារតែកូរ៉េខាងត្បូងជាប់រវល់ធ្វើជាម្ចាស់ផ្ទះរៀបចំកីឡាអូឡាំពិករដូវរងារ។ សមយុទ្ធយោធារវាងទ័ពអាមេរិក និងទ័ពកូរ៉េខាងត្បូងឆ្នាំនេះត្រូវបានរៀបចំជាពីរប្រភេទ ទី១ ជាសមយុទ្ធលើសមរភូមិពិតដោយមានការចូលរួមពីទ័ពអាមេរិកប្រមាណជា ១១ ៥០០នាក់ និងពីទ័ពកូរ៉េខាងត្បូងចំនួន ២៩០ ០០០នាក់ ចំណែកសមយុទ្ធប្រភេទទី២ ជាសមយុទ្ធធ្វើឡើងនៅក្នុងម៉ាស៊ីនកុំព្យូទ័រ។
អ្វីជាការកត់សម្គាល់ សមយុទ្ធប្រចាំឆ្នាំនេះរវាងទ័ពអាមេរិក និងទ័ពកូរ៉េខាងត្បូងបានធ្វើឡើង ចំពេលដែលទំនាក់ទំនងរវាងកូរ៉េខាងត្បូង និងកូរ៉េខាងជើងក៏ដូចជារវាងកូរ៉េខាងជើង និងអាមេរិកកំពុងមានដំណើរការល្អ ពិសេសក្នុងពេលដែលលោកប្រធានាធិបតីកូរ៉េខាងត្បូងមូន ចៃអ៊ីនត្រៀមជួបមេដឹកនាំកូរ៉េខាងជើងលោកគីម ជុងអ៊ុននៅថ្ងៃទី២៧ មេសា។ បន្ទាប់មក លោកគីម ជុងអ៊ុនក៏គ្រោងជួបលោកប្រធានាធិបតីអាមេរិកដូណាល់ ត្រាំនៅចុងខែឧសភា។ ព្រឹត្តិការណ៍ដ៏សំខាន់ទាំងពីរនាពេលខាងមុខបានជំរុញទ័ពកូរ៉េខាងត្បូង និងទ័ពអាមេរិកឲ្យកាត់បន្ថយរយៈពេលធ្វើសមយុទ្ធឆ្នាំនេះមកនៅត្រឹមតែ ៤សប្តាហ៍ និងមិនដាក់តាំងគ្រឿងសព្វាវុធយុទ្ធសាស្រ្តមួយមួយចំនួនដូចសព្វមួយដង។
គេនៅមិនទាន់ឃើញប្រតិកម្មយ៉ាងណាពីកូរ៉េខាងជើងទាក់ទងនឹងសមយុទ្ធយោធារវាងកូរ៉េខាងត្បូង និងអាមេរិកពេលនេះទេ។ កន្លងមក ក្រុងព្យុងយ៉ាងតែងចេញមុខបរិហារដោយបានចាត់ទុកសមយុទ្ធរបៀបនេះថាជាការត្រៀមខ្លួនដើម្បីចូលឈ្លានពានទឹកដីកូរ៉េខាងជើង។ តែថ្នាក់ដឹកនាំជាន់ខ្ពស់កូរ៉េខាងត្បូងម្នាក់ដែលបានធ្វើដំណើរទៅជួបលោកគីម ជុងអ៊ុននាខែមីនាកន្លងទៅបានប្រាប់ឲ្យដឹងថា លោកគីម ជុងអ៊ុនបានយល់ពីការសម្រេចចិត្តរបស់ក្រុងសេអ៊ូល និងក្រុងវ៉ាស៊ីនតោនដើម្បីបន្តធ្វើសមយុទ្ធនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ