ជប៉ុនប្រឹងប្រែងស្តារទំនាក់ទំនងទ្វេភាគីជាមួយចិន
នៅថ្ងៃចន្ទនេះ ប្រទេសបងធំចំនួនពីរនៅអាស៊ី ដែលជាគូរសត្រូវនឹងគ្នាគឺ ចិននិង ជប៉ុន បានសន្យាចាប់ផ្តើមបើករបត់ថ្មី ដើម្បីបង្កើនទំនាក់ទំនងល្អរវាងគ្នា។ គេមើលឃើញថា ទំនាក់ទំនងល្អរវាងគ្នានេះ កើតមានឡើងវិញ ដោយសារមានការខ្នះខ្នែងពីភាគីជប៉ុន។ ជប៉ុន ព្យាយាមធ្វើឲ្យចំនងការទូតជាមួយចិន វិលមករកភាពល្អូកល្អឺន ដើម្បីរួមគ្នាជាមួយចិន ដោះស្រាយវិបត្តិនុយក្លេអ៊ែររបស់កូរ៉េខាងជើង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៣
ទំនាក់ទំនងរវាងចិននិងជប៉ុន ដែលជាប្រទេស មហាអំណាចសេដ្ឋកិច្ចពិភពលោកទី២ និង ទី ៣ បានវិលមករកភាពធូរស្រាល ស្របពេលដែល កូរ៉េខាងជើងបន្ទន់ឥរិយាបទរបស់ខ្លួននាពេលថ្មីៗនេះ។ តាមរយៈ កិច្ចប្រជុំដ៏កម្រជាមួយគ្នា នៅទីក្រុងតូក្យូប្រទេសជប៉ុន នាថ្ងៃនេះ រដ្ឋមន្ត្រីការបរទេសចិន បានប្រាប់ទៅសមភាគីជប៉ុនថា ទំនាក់ទំនងរបស់ប្រទេសទាំងពីរពិតជាល្អប្រសើរឡើងបាន ប្រសិនបើភាគីទាំងពីរពិតជាមានឆន្ទៈដូច្នេះមែន។
គេមើល ឃើញថា ជប៉ុន ប្រឹងស្តារទំនាក់ទំនងជាមួយចិនណាស់ ពីព្រោះជប៉ុនមើលឃើញថា រដ្ឋាភិបាលទីក្រុងប៉េកាំង ទំនងជាតួអង្គសំខាន់ ក្នុងការដោះស្រាយមហិច្ឆិតាផលិតអាវុធនុយក្លេអ៊ែររបស់កូរ៉េខាងជើង។
មួយវិញទៀត ជប៉ុនបារម្ភខ្លាចគេទុកឲ្យនៅក្រៅឆាក ទាក់ទងនឹងសណុំរឿងកូរ៉េខាងជើងនេះ ពីព្រោះ មេដឹកនាំកូរ៉េខាងជើង លោកគីម ជុងអ៊ុន ទើបតែបានធ្វើដំណើរទស្សនកិច្ចទៅកាន់ទីក្រុងបេកាំង កាលពីខែមុន។ ក្រៅពីនេះ លោកគីម ជុងអ៊ុន ក៏នឹងជួបពិភាក្សាដាច់ដោយឡែកផងដែរជាមួយ ប្រធានាធិបតីអាមេរិក គឺលោកដូណាល់ត្រាំ ហើយនិងលោក មូន ចែអ៊ីន ប្រធានាធិបតី កូរ៉េខាងត្បូងផងដែរ ដោយគ្មានការចូលរួមណាមួយរបស់ជប៉ុនឡើយ។
ដោយមូលហេតុនេះហើយ ជប៉ុនបានជំរុញឲ្យមានកិច្ចប្រជុំត្រីភាគីរវាង ជប៉ុន ចិន និងកូរ៉េខាងត្បូង ដើម្បីបង្កើតវត្តមានរបស់ខ្លួន ក្នុងសំណុំរឿងនុយក្លេអ៊ែររបស់កូរ៉េខាងជើង។ តាមរយៈការជួបពិភាក្សារវាងប្រមុខការទូតចិន-ជប៉ុន នៅថ្ងៃចន្ទនេះ ភាគីទាំងពីរបានសម្រេចឲ្យជប៉ុនធ្វើជាអ្នករៀបចំកិច្ចប្រជុំកំពូលត្រីភាគី ដូចដែលខ្លួនចង់បាន។ ប៉ុន្តែ គេនៅមិនទាន់កណត់កាលបរិច្ឆេទ នៃកិច្ចប្រជុំនេះនៅឡើយទេ។
ក្រៅពីនោះ រដ្ឋមន្ត្រីការបរទេសជប៉ុន លោក កូណូ សង្ឈឹមថា នឹងមានមានផ្លាស់ប្តូរដំណើរទស្សនកិច្ចគ្នាទៅវិញទៅមករវាងលោកនាយករដ្ឋមន្ត្រីជប៉ុន ស្ហ៊ីនហ្សូ អាបេ និង ប្រធានាធិបតីចិន លោក ស៊ី ជីនពីង នាពេលខាងមុខផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ