ចិន-អាមេរិក៖កិច្ចចរចាពាណិជ្ជកម្មបានចាប់ផ្តើម តែគ្របដណ្តប់ដោយភាពប្រុងប្រយ័ត្នរវាងគ្នា
នៅថ្ងៃព្រហស្បតិ៍ ទី៣ ឧសភានេះ ចិន និងអាមេរិកបានចាប់ផ្តើមកិច្ចចរចាពាណិជ្ជកម្មរវាងគ្នារយៈពេល ២ថ្ងៃក្នុងទីក្រុងប៉េកាំង ប្រទេសចិន។ គោលដៅនៃកិច្ចចរចាពេលនេះ គឺដើម្បីព្យាយាមកាត់បន្ថយភាពតានតឹង និងបញ្ជៀសសង្រ្គាមពាណិជ្ជកម្មរវាងមហាអំណាចសេដ្ឋកិច្ចទាំងពីរក្នុងលោក។ តែទីក្រុងវ៉ាស៊ីនតោន និងទីក្រុងប៉េកាំងបានព្រមានទុកជាមុនថា កិច្ចព្រមព្រៀងចុងក្រោយមួយប្រហែលជាពិបាករកបានភ្លាមៗណាស់។
ចុះផ្សាយនៅថ្ងៃ៖
ស្តាប់ - ០១:៤៩
វត្តមានរបស់គណៈប្រតិភូជាន់ខ្ពស់អាមេរិកទទួលបន្ទុកពាណិជ្ជកម្ម និងសេដ្ឋកិច្ចក្នុងប្រទេសចិនពេលនេះបានធ្វើឡើង ក្នុងពេលដែលចិនកំពុងទទួលរងការគំរាមកំហែងដំឡើងពន្ធពីលោកប្រធានាធិបតីអាមេរិកដូណាល់ ត្រាំ។ លោកត្រាំដែលនឹងអាចដំឡើងពន្ធលើទំនិញចិននាំចូលចូលអាមេរិកក្នុងទឹកប្រាក់សរុបប្រមាណជា ៥០ ០០០លានដុល្លារចាប់ពីថ្ងៃទី២២ ឧសភាខាងមុខទៅ។ ក្រៅពីរឿងពន្ធដារ លោកដូណាល់ ត្រាំក៏បានលើកឡើងពីឱនភាពថវិកាដែលអាមេរិកមានជាមួយចិនយ៉ាងច្រើនសម្បើម រួមទាំងបរិហារចិនពីការអនុវត្តនយោបាយពាណិជ្ជកម្មមិនស្មើភាព។
ទាក់ទងនឹងឱនភាពថវិកាដែលអាមេរិកមានជាមួយចិននៅក្នុងការដោះដូរពាណិជ្ជកម្មរវាងគ្នា ទីក្រុងវ៉ាស៊ីនតោនបានទាមទារឲ្យមានការកាត់បន្ថយចំនួន ១០០ ០០០លានដុល្លារ។ នៅក្នុងន័យនេះ អាមេរិកចង់ឲ្យចិនបើកទីផ្សាររបស់ខ្លួនឲ្យបានទូលំទូលាយបន្ថែមទៀតសម្រាប់ទំនិញអាមេរិក។ បន្ទាប់មក អាមេរិកក៏បានទាមទារចិនឲ្យពង្រឹងលើច្បាប់កម្មសិទ្ធិបញ្ញា។ ទោះជាយ៉ាងនេះក្តី ភាគីទាំងពីរបានទទួលស្គាល់ថា គេហាក់មិនសូវមានសុទិដ្ឋិនិយមប៉ុន្មានទេក្នុងការសម្រេចបាននូវកិច្ចព្រមព្រៀងចុងក្រោយភ្លាមៗនៅក្រោយកិច្ចចរចា។
ចំណាប់អារម្មណ៍ស្រដៀងគ្នានេះក៏មានពីលោក Robert Lighthizer អ្នកតំណាងពាណិជ្ជកម្មអាមេរិកដែលរួមដំណើរជាមួយគណៈប្រតិភូអាមេរិក។ « ខ្ញុំនៅតែមានសង្ឃឹម ប៉ុន្តែខ្ញុំមិនតែងតែមានសុទិដ្ឋិនិយមគ្រប់ពេលឡើយ ព្រោះនេះជាបញ្ហាប្រឈមដ៏ធំមួយ » នេះជាការថ្លែងរបស់លោក Robert Lighthizer។ ចំណែកលោកស្រីហួរ ជុនយីង អ្នកនាំពាក្យក្រសួងការបរទេសចិនបានព្រមានត្រង់ៗថា កិច្ចចរចាតែមួយលើកពិតជាមិនអាចដោះស្រាយបញ្ហាប្រឈមជាច្រើនដែលអាមេរិក និងចិនកំពុងមានជាមួយគ្នាពេលនេះទេ។ តែយ៉ាងហោចណាស់ កិច្ចចរចានេះជាជំហានមួយយ៉ាងសំខាន់ប្រកបដោយលក្ខណៈស្ថាបនា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ