ព្យុះខ្សាច់ សម្លាប់មនុស្សជាង១០០នាក់ នៅឥណ្ឌា
យ៉ាងហោចណាស់មនុស្ស១៥០នាក់ បានបាត់បង់ជីវិត ដោយសារព្យុះកំណាច ដែលបានបោកបក់ទៅលើតំបន់ភាគខាងជើងឥណ្ឌា នៅសប្តាហ៍នេះ។ ឥណ្ឌារងគ្រោះបោកបក់ ដោយសារខ្យល់ព្យុះខ្សាច់ ជារៀងរាល់ឆ្នាំ ប៉ុន្តែ គេកម្រនឹងឃើញ ជនរងគ្រោះ ស្លាប់ ដោយសារព្យុះកំណាច ក្នុងចំនួនដ៏ច្រើន ដូចលើកនេះណាស់។
ចុះផ្សាយនៅថ្ងៃ៖
ស្តាប់ - ០១:៤៥
តុល្យការចុងក្រោយរបស់អាជ្ញាធរឥណ្ឌា បានបង្ហាញថា មនុស្សយ៉ាងតិច ១៥០នាក់បានស្លាប់បាត់បង់ជីវិត នៅក្នុងគ្រោះថ្នាក់រលំបាក់ផ្ទះ ឬដើមឈើ ដែលមិនអាចទប់ទល់នឹងកម្លាំងព្យុះខ្សាច់ ដែលបក់ ផ្លាស់ទី ក្នុងល្បឿន ១៣០គីឡូម៉ែត្រ ក្នុងមួយម៉ោង។
តាំងពីយប់ថ្ងៃពុធ រហូតដល់ថ្ងៃ ព្រហស្បតិ៍ រន្ទះ រាប់ម៉ឺន និងព្យុះកំណាច បានរំលើងដើមឈើ បង្គោលអគ្គិសនី និងបោកបក់ផ្ទះសម្បែងជាច្រើនរយខ្នង នៅតំបន់ភាគខាងជើង ឥណ្ឌា។ នៅរដ្ឋអុតា ប្រាដែស រដ្ឋដែលក្រីក្រជាងគេនៅឥណ្ឌា អាជ្ញាធរ គ្រប់គ្រងគ្រោះមហន្តរាយ ឥណ្ឌាបានស្រង់ឃើញ មានមនុស្សស្លាប់ ៧៣នាក់។ ជាតួលេខដ៏ច្រើន មិនធ្លាប់មានពីមុនមក។ នៅខែកុម្ភៈ ព្យុះកំណាចធ្លាប់បានបោកបក់ បំផ្លាញ ប៉មពីររបស់វិមានដ៏ល្បីល្បាញរបស់ឥណ្ឌា Taj Mahal ប៉ុន្តែ មិនបានបង្កឲ្យមានគ្រោះថ្នាក់ស្លាប់បាត់បង់ជីវិតនោះទេ។
វិទ្យាស្ថានឧតុនិយមឥណ្ឌា បានប្រកាសអំពាវនាវឲ្យប្រជាជនប្រុងប្រយ័ត្ន ព្រោះថា ព្យុះខ្សាច់នឹងអាចកើតមានជាថ្មី ពីពេលនេះ រហូតដល់ថ្ងៃអង្គារ។ អាជ្ញាធរឥណ្ឌាបានអំពាវនាវកុំឲ្យប្រជាជនគេងលក់ក្រៅផ្ទះ ដែលជាទម្លាប់របស់ប្រជាជនឥណ្ឌា ក្រីក្រ នៅរដូវក្តៅ។
តាមអ្នកព្យាករឧតុនិយមឥណ្ឌា ខ្យល់ព្យុះខ្សាច់កើតឡើង ដោយសារបាតុភូតធម្មជាតិ ដែលបណ្តាលមកពីការជួបគ្នា នៃប្រព័ន្ធអាកាសធាតុ ខាងលិច និងខាងកើត នៅពីលើវាលទំនាបភាគខាងជើងឥណ្ឌា។ កាសែតក្នុងស្រុកឥណ្ឌាវិញ ចុះផ្សាយថា ខ្យល់ព្យុះដ៏មានកម្លាំងខ្លាំង កើតឡើងក៏ដោយសារតែ សីតុណ្ហភាពដែលឡើងខ្ពស់ខុសពីធម្មតា បានប៉ះជួបជាមួយ នឹងខ្យល់សើម។ គេវាយតម្លៃ គ្រោះធម្មជាតិ ដូចជាខ្យល់ព្យុះនឹងឧស្សាហ៍កើតមាន ដោយសារតែការប្រែប្រួលនៃអាកាសធាតុនៅលើផែនដី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ