អន្តរជាតិផ្តុំគ្នាសុំសេរីភាពឱ្យភរិយារបស់អតីតម្ចាស់រង្វាន់ណូបែលសន្តិភាពចិន
សិល្បករ អ្នកនិពន្ធ បញ្ញាវ័ន្ត នៅបារាំង នៅអាមេរិក ជាច្រើនសិបនាក់ នាំគ្នាស្រែកអំពាវនាវជាសាធារណៈ សុំឱ្យអាជ្ញាធរចិន ដោះលែងកវី លីវ ស្យ៉ា ភរិយាមេមាយរបស់ជ័យលាភីណូបែលសន្តិភាពលោក លីវ ស៊ាវបូ។ លោកស្រី លីវ ស្យ៉ា Liu Xia មិនដែលរងការចោទប្រកាន់និងគ្មានជាប់ទោសអ្វីទាំងអស់ ប៉ុន្តែក្នុងស្ថានភាពជាក់ស្តែង លោកស្រីកំពុងជាប់ឃុំឃាំងក្នុងគេហដ្ឋាន តាំងពីជាង៨ឆ្នាំមក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៩
ក្រោមគំនិតផ្តួចផ្តើមរបស់អង្គការ Pen Club និងអង្គការការពារសិទ្ធិមនុស្ស Amnesty International ក្រុមបញ្ញាវន្ត សិល្បករ អ្នកកវី អ្នកនិពន្ធ ជាង៨០រូប មានជាអាទិ៍ ជ័យលាភីរង្វាន់ណូបែលអក្សរសិល្ប៍ឆ្នាំ២០០៣ អ្នកនិពន្ធចិននិរទេសខ្លួននៅអង់គ្លេស ... បាននាំគ្នាបង្ហោះវីដេអូ តាមប្រព័ន្ធអ៊ីនធ័រនែត ស្មូតកំណាព្យរបស់លោកស្រី លីវ ស្យ៉ា។
សម្រែកទាមទារសេរីភាពរបស់លោកស្រី លីវ ស្យ៉ា លាន់រន្ទឺគ្រប់ជ្រុងនៃភពផែនដី ! នេះជាសាររបស់ប្រធានសមាគមអ្នកនិពន្ធអាមេរិក ដែលមិនត្រឹមតែអំពាវនាវឱ្យអាជ្ញាធរប៉េកាំង ដោះលែងភរិយាមេមាយរបស់លីវ ស៊ាវបូ សរសេរថា តែថែមទាំងបានចំអកឱ្យរដ្ឋាភិបាលក្រុងប៉េកាំង ដែលថាលោកស្រីមានសេរីភាព។ នៅប្រទេសបារាំង កាសែតឡឺម៉ុង បានចុះផ្សាយលិខិតចំហមួយរបស់ស្ត្រីជាង៤០នាក់ ជាទស្សនវិទូ ជាអតីតឥស្សរជននយោបាយ សរសេរទៅកាន់ប្រធានាធិបតីស៊ី ជីនពីង ឱ្យដោះលែងលោកស្រី លីវ ស្យ៉ា។
អាយុ ៥៧ឆ្នាំ ជាអ្នកតែកំណាព្យ លោកស្រីលីវ ស្យ៉ា ជាភរិយារបស់លោក លីវ ស៊ាវបូ ជ័យលាភីរង្វាន់ណូបែលសន្តិភាពឆ្នាំ២០១០ ដែលទើបទទួលមរណភាពកាលពីឆ្នាំទៅ នៅក្នុងពន្ធនាគារ ដោយជំងឺមហារីក។ កាលនៅរស់ លោក លីវ ស៊ាវបូ ត្រូវបានតុលាការកាត់ទោសនៅឆ្នាំ២០០៩ ឱ្យជាប់ពន្ធនាគារ១១ឆ្នាំ ពីបទចង់ធ្វើវិទ្ធង្សនាប្រឆាំងនឹងរដ្ឋាភិបាលក្រុងប៉េកាំង។ ធ្លាក់ខ្លួនមេមាយ លោកស្រី លីវ ស្យ៉ា ដែលគ្មានទោសពៃរ៍និងការចោទប្រកាន់អ្វី សោះនោះ ត្រូវបានស្ថិតនៅក្រោមការត្រួតពិនិត្យតាមដាន និងបម្រាមមិនឱ្យចាកចេញពីផ្ទះ ចំនួន៨ឆ្នាំ មកហើយ។
បាត់បង់សេរីភាព និងជាប់ឃុំឃាំងនៅក្នុងគេហដ្ឋាន លោកស្រីកំពុងធ្លាក់ខ្លួនមានជំងឺធ្លាក់ទឹកចិត្ត និងត្រៀមបណ្តោយខ្លួនស្លាប់។ នេះបើមេធាវីចិនជាមិត្តជំនិតរបស់លោកស្រី ដែលរស់នៅអាល្លឺម៉ង់។ ដោយព្រួយបារម្ភអំពីស្ថានភាពសុខភាព កាលពីថ្ងៃសុក្រ តំណាងទូតបារាំង អង់គ្លេស អាល្លឺម៉ង់និងសហភាពអឺរ៉ុបបាននាំគ្នាទៅសួរសុខលោកស្រីដល់ផ្ទះ ប៉ុន្តែត្រូវបានអាជ្ញាធរចិនបណ្តេញមិនឱ្យជួប។ អាជ្ញាធរប៉េកាំងបានឆ្លើយតបជាលើកទីមួយ សុំឱ្យអ្នកការទូតបរទេសកុំជ្រៀតជ្រែកកិច្ចការផ្ទៃក្នុងចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ