ប៉េកាំងបដិសេធមិនបានព្រមធ្វើសម្បទានក្នុងសង្គ្រាមពាណិជ្ជកម្មជាមួយអាមេរិក
ចិននិងអាមេរិកបាននិងកំពុងបន្តកិច្ចចរចានឹងគ្នាដ៏លំបាកលំបិន និងមានការផ្តល់ព័ត៌មានដ៏ចម្រូងចម្រាស ម្នាក់ថា ម្នាក់ទៀតបដិសេធ។ រដ្ឋមន្រ្តីក្រសួងការបរទេសចិនបានចេញមុខ ធ្វើការបដិសេធ នៅថ្ងៃនេះ ព័ត៌មានរបស់អាមេរិកដែលថាចិនបានស្នើកាត់បន្ថយឧនភាពពាណិជ្ជកម្មជាមួយអាមេរិក ២០០ពាន់លានដុល្លារ ដើម្បីបញ្ចៀសសង្រ្គាមពាណិជ្ជកម្ម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៥
បើតាមប្រភពព័ត៌មានអាមេរិក New York Times និងភ្នាក់ងារហិរញ្ញវត្ថុ Bloomberg ចេញផ្សាយកាលពីថ្ងៃព្រហស្បតិ៍ ប៉េកាំងទំនងជាបានព្រមធ្វើសម្បទានកាត់បន្ថយសល់ផលពាណិជ្ជកម្មរបស់ខ្លួន ដើម្បីបញ្ចៀសសង្គ្រាមពាណិជ្ជកម្មតាមការទាមទាររបស់អាមេរិក។ អាមេរិកចង់បង្កើនលំនឹងផ្តោះប្តូរពាណិជ្ជកម្ម ដោយ កាត់បន្ថយឱនភាពពាណិជ្ជកម្មជាមួយចិន ចំនួន ២០០លានដុល្លារអាមេរិក នៅឆ្នាំ២០២០។
សូមបញ្ជាក់ថា ជញ្ជីងពាណិជ្ជកម្មចិន-អាមេរិក ផ្អៀងទៅខាងចិនជានិច្ច ដោយអាមេរិកមានឱនភាពចំនួនដល់ទៅ ៣៧៥ពាន់លាន នៅឆ្នាំ២០១៧ និង៩១ពាន់លានដុល្លារ សម្រាប់ត្រីមាសដំបូងនៃឆ្នាំ២០១៨។ ហេតុដូច្នេះហើយបានជាលោក ដូណាល់ ត្រាំ បានធ្វើការបរិហារជាថ្មី នៅថ្ងៃម្សិលមិញទៀត ថាជាការផ្តោះប្តូរពាណិជ្ជកម្មដែលមានតែទៅ គ្មានមក និងថា មហាយក្សចិន ប្រកាន់យកពាណិជ្ជកម្មមិនស្របច្បាប់។ សម្រាប់លោកត្រាំ ចិនជាដៃគូពាណិជ្ជកម្មទម្រើសជ្រុលពេកហើយ !
ប៉ុន្តែនៅព្រឹកថ្ងៃសុក្រនេះ រដ្ឋមន្ត្រីក្រសួងការបរទេសចិន បានចេញសេចក្តីថ្លែងការណ៍បដិសេធព័ត៌មានខាងលើ ដោយគូសបញ្ជាក់ថា កិច្ចពិភាក្សាចិន-អាមេរិក មានលក្ខណៈស្ថាបនាល្អ។ កិច្ចចរចាត្រូវបន្តធ្វើនៅថ្ងៃសុក្រនេះទៀត។ អ្នកទទួលខុសត្រូវជាន់ខ្ពស់ចិន ដែលជាជំនិតរបស់លោកស៊ី ជិនពីង កំពុងមានជំនួបចរចាជាមួយតំណាងអាមេរិក នៅទីក្រុងវ៉ាស៊ីនតោន និងដោយមានការចូលរួមពីសំណាក់លោកដូណាល់ត្រាំផង។ នេះបើតាមសេចក្តីថ្លែងការណ៍របស់សេតវិមាន។ ចំណែកព័ត៌មានលម្អិតនៃជំនួបចរចារវាងលោកត្រាំ និងរដ្ឋមន្ត្រីក្រសួងហិរញ្ញវត្ថុអាមេរិក ជាមួយឧបនាយករដ្ឋមន្ត្រីចិន នៅសេតវិមាន មិនត្រូវទម្លាយឱ្យដឹងសោះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ