លោករ៉ាហ្វាអែល វ៉ូប៊ែរ៖កូរ៉េខាងជើងចង់ផ្សះផ្សាជាមួយពិភពលោក និងចង់បានសន្តិភាព
នៅឧបទ្វីបកូរ៉េ ចំពេលដែលលោកប្រធានាធិបតីកូរ៉េខាងត្បូងមូន ចៃអ៊ីន និងមេដឹកនាំកូរ៉េខាងជើងលោកគីម ជុងអ៊ុនបានជួបសន្ទនាគ្នាគួរឲ្យភ្ញាក់ផ្អើលនារសៀលថ្ងៃសៅរ៍ ទី២៦ ឧសភានៅស្រុក Panmunjom ក្រុមអ្នកកាសែតបរទេសជាច្រើននាក់ដែលបានទៅចូលរួមយកព័ត៌មានស្តីពីការកម្ទេចមជ្ឈមណ្ឌលសាកល្បងនុយក្លេអ៊ែរក្រោមដី Punggye-ri ក្នុងទឹកដីកូរ៉េខាងជើងក៏បានចាកចេញពីក្រុងព្យុងយ៉ាងដែរ។ ក្នុងចំណោមអ្នកកាសែតបរទេសប្រមាណជា ៣០នាក់ក៏មានលោករ៉ាហ្វាអែល វ៉ូប៊ែរ អ្នកកាសែតអាមេរិករបស់កាសែត AP ប្រចាំនៅហុងកុងដែរ។ លោកវ៉ូប៊ែរបានយល់ឃើញថា អ្វីដែលក្រុងព្យុងយ៉ាងកំពុងស្វែងរក គឺការផ្សះផ្សាជាមួយពិភពលោក និងការចង់បានសន្តិភាព។
ចុះផ្សាយនៅថ្ងៃ៖
ស្តាប់ - ០១:៤១
« យើងបានធ្វើដំណើរក្នុងចម្ងាយផ្លូវយ៉ាងឆ្ងាយដើម្បីទៅដល់មជ្ឈមណ្ឌលនុយក្លេអ៊ែរ។ យើងបានឃើញ និងបានឮសម្លេងផ្ទុះយ៉ាងខ្លាំង រួមទាំងការបំផ្លិចបំផ្លាញ។ អស់ជាច្រើនឆ្នាំមកហើយដែលយើងបានធ្វើដំណើរទៅកូរ៉េខាងជើង។ ចំពោះខ្ញុំ ខ្ញុំចាត់ទុកព្រឹត្តិការណ៍មួយនេះជារឿងដ៏កម្រមួយ។ នៅក្នុងអតីតកាល យើងក៏ធ្លាប់បានធ្វើសំណើជាច្រើនដងដើម្បីអាចចូលទៅមើលទីតាំងមជ្ឈមណ្ឌលនុយក្លេអ៊ែរ Punggye-ri នោះ។ តែសំណើរបស់យើងតែងត្រូវបានរបបក្រុងព្យុងយ៉ាងបដិសេធគ្រប់ពេល។
តាមយោបល់របស់ខ្ញុំ អ្វីដែលកូរ៉េខាងជើងបានព្យាយាមបង្ហាញនារយៈពេលប៉ុន្មានថ្ងៃចុងក្រោយនេះ គឺមកពីកូរ៉េខាងជើងចង់ផ្សះផ្សាជាមួយពិភពលោក និងចង់បានសន្តិភាព។ ក៏ប៉ុន្តែ ការរំសាយនុយក្លេអ៊ែរទាំងស្រុងដែលជាគោលដៅចង់បានចុងក្រោយហាក់នៅឆ្ងាយពីការពិតនៅឡើយ។ នៅត្រង់ចំណុចនេះ គេត្រូវរង់ចាំឲ្យមានការចរចាស៊ីជ្រៅ និងគ្រប់កម្រិតទាំងអស់ មុននឹងទទួលបានលទ្ធផលពិតប្រាកដមួយ។
ខ្ញុំគិតថា ចំណុចមួយក្នុងចំណោមចំណុចសំខាន់ៗជាច្រើនទៀតនោះគឺថា កូរ៉េខាងជើងចង់បង្ហាញចេញនូវការប្តេជ្ញាចិត្ត និងប្រយោជន៍របស់ខ្លួនដើម្បីបំពេញតាមលក្ខខណ្ឌដែលកំណត់ដោយអាមេរិក និងបណ្តាប្រទេសផ្សេងទៀតដើម្បីដោះស្រាយបញ្ហា។ តែបើនិយាយពីទីភ្នាក់ងារថាមពលបរមាណូអន្តរជាតិ ឬការត្រួតពិនិត្យពីស្ថាប័នណាមួយនោះ ខ្ញុំគិតថា កូរ៉េខាងជើងពិតជាពិបាកទទួលយកខ្លាំងណាស់ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ