ចេកជាផ្លែឈើ ដែលមានថាមពលខ្ពស់ ងាយរកទិញ ស្រួលទទួលទាន និងផ្តល់គុណប្រយោជន៍ប្រពៃណាស់សម្រាប់សុខភាព។ គុណប្រយោជន៍របស់ផ្លែចេកមានច្រើនណាស់ ! កម្មវិធីសុខភាពយើងក៏ធ្លាប់បានរៀបរាប់ជូនរួចមកហើយដែរ ប៉ុន្តែតើអ្នកដឹងទេ ចំណែកផ្សេងទៀតនេះចេក ក៏អាចផ្តល់គុណប្រយោជន៍ច្រើនដល់សុខភាពដែរ ! មិនមែនតែដើម ឬស្លឹកទេ គឺផ្កា ត្រយូង !
មនុស្សភាគច្រើនបានស្គាល់ និងដឹងយ៉ាងច្បាស់ ថាផ្លែចេកជាប្រភពផ្តល់ថាមពល ញ៉ាំទៅមិនធ្វើឱ្យធាត់ ការពារនិងកាត់បន្ថយគ្រោះកើតជំងឺមហារីកតម្រង់នោម និងពោះវៀនធំ កាត់បន្ថយគ្រោះមានខ្លាញ់ក្នុងឈាម កាត់បន្ថយគ្រោះកើតជំងឺទឹកនោមផ្អែម បើចូលចិត្តទទួលទានចេកខ្ចី ... តាមការពិត គ្រប់ចំណែកនៃចេក មិនថាជាផ្លែ ជាស្លឹក ជាដើម ជាផ្កា សុទ្ធតែមានគុណប្រយោជន៍ យ៉ាងធំធេងចំពោះសុខភាព។
ស្លឹក ត្រូវបានយកមកប្រើសម្រាប់ទ្រាប់ខ្ចប់ម្ហូប លើកតម្កើងទាំងរសជាតិ ទាំងសុខភាព ព្រោះគ្មានជាតិពុលដូចផ្លាស្ទិក ដើមយកមកស្លដើម្បីទាញយកសារជាតិសរសៃ ... ឯផ្កាវិញ ក៏មិនអន់ ! សម្បូរដោយវីតាមីន A-C-E និងប៉ូតាស្យូម ព្រមទាំងសារធាតុសរសៃយ៉ាងសន្ធឹកសន្ធាប់ ត្រយូងចេក មានផ្ទុកសារធាតុ ហ្វ្លាវូណូអ៊ីត ដែលជាសារធាតុដ៏សំខាន់ និងដ៏មានគុណប្រយោជន៍ជាពិសេសសម្រាប់សុខភាពខ្លាំងណាស់។
ជាពន្លកផ្កា មានព៌ណស្វាយ ត្រយូងចេកត្រូវបានប្រជាពលរដ្ឋនៅអាស៊ី អាស៊ីអាគ្នេយ៍ អាស៊ីខាងត្បូង តំបន់កោះ យកមកប្រើប្រាស់ ធ្វើជាម្ហូបច្រើនមុខ ស្ងោ ឆា ចំហុយ ហូបឆៅ ... និងដោយសារតែភាពសម្បូរបែបផ្នែកអាហារូបត្ថម្ភ ត្រយូងចេកត្រូវបានពលរដ្ឋប្រទេសខ្លះ ប្រើជាឱសថធម្មជាតិ។ បើតាមទស្សនាវដ្តីបច្ចេកវិទ្យាជីវសាស្ត្រអាហ្វ្រិក ត្រយូងចេក ១០០ក្រាម (មួយខាំ) មានផ្ទុក ៖
- ថាមពល ៥១ kcal
- ប្រូតេអ៊ីន ១,៦ក្រាម
- ជាតិខ្លាញ់ ០,៦ ក្រាម
- ជាតិស្ករ ៩,៩ក្រាម
- សរសៃ ៥,៧ fgof
- កាល់ស្យូម ៥៦មីល្លីក្រាម
- ហ្វូស្វ័រ ៧៣,៣ម.ក្រាម
- ដែក ៥៦,៤ ម.ក្រាម
- ស្ពាន់ធ័រ ១៣ ម.ក្រាម
- ប៉ូតាស្យូម ៥៥៣,៣ ម.ក្រាម
- ម៉ាញេស្យូម ៤៧,៧ មីល្លីក្រាម
- វីតាមីន E ១,០៧មីល្លីក្រាម
លោកអ្នកបានជ្រាបអំពីព័ត៌មានលម្អិតទាក់ទងនឹងសារធាតុទាំងឡាយដែលមានផ្ទុកក្នុងផ្លែត្រយូងចេកហើយ ចុះសួរថាត្រយូងចេកនេះមានគុណប្រយោជន៍យ៉ាងណាខ្លះចំពោះសុខភាព។ គុណប្រយោជន៍មានច្រើនដូចជា ៖ សម្រួលរដូវស្ត្រី បង្កើនទឹកដោះ ព្យាបាលជំងឺខ្វះឈាម ជំងឺដំបៅក្រពះ ធានារ៉ាប់រងជួយតម្រងនោម សម្រួលការទល់លាមក បញ្ចុះសម្ពាធឈាម ពង្រឹងស្បួន …
ត្រយូងចេកនិងស្ត្រី
ត្រយូងចេកជាអាហារដ៏ល្អជាងគេបំផុតសម្រាប់អ្នកជាម្តាយដែលបំបៅដោះកូន ! ស្ត្រីខ្លះសម្បូរទឹកដោះណាស់ តែស្ត្រីខ្លះទៀតបញ្ហាខ្សត់ទឹកដោះ មិនអាចផលិតទឹកដោះបំបៅកូនបានគ្រប់គ្រាន់ឡើយ។ ពេលខ្លះទៀត នៅក្នុងដំណាក់កាលនៃការបំបៅដោះកូន មានរយៈពេលណាមួយស្ត្រីអាចជួបករណីចុះថយបរិមាណទឹកដោះ ក្នុងករណីបែបនេះ សូមជ្រើសរើសទទួលទានត្រយូងចេក។ សារធាតុបន្សំដ៏សម្បូរបែបរបស់ត្រយូងចេក អាចជួយបង្កើន និងបំប៉នសមត្ថភាពនៃក្រពេញទឹកដោះឱ្យផលិតទឹកដោះ ក្នុងបរិមាណច្រើនជាងមុន។
ត្រយូងចេកជាឱសថបូរាណផ្សំបានដោយខ្លួនឯង ដើម្បីទប់កាត់កុំឱ្យស្ត្រីមានការធ្លាក់រដូវច្រើនជ្រុលហួសហេតុ ព្រោះត្រយូងមានសារធាតុម្យ៉ាងដែលបង្កើនអ័រមូនប្រូស្ហេស្តេរ៉ូន នៅក្នុងខ្លួនស្ត្រី។ ហើយគឺអ័រមូន ប្រូស្ហេស្តេរ៉ូននេះឯង ដែលមានឥទ្ធិពលកាត់បន្ថយការចេញឈាម ការធ្លាក់រដូវ។ ដើម្បីបង្កើនកំរិតអ័រមូននេះ សូមទទួលទាន ផ្លែត្រយូងចេកឆ្អិនជាមួយទឹកដោះគោជូ ឬហ្វ្រូម៉ាស្រស់ មួយកែវ ក្នុងមួយថ្ងៃ នោះរដូវរបស់អ្នកនឹងធ្លាក់ក្នុងកំរិតសមរម្យ មិនច្រើនហួសហេតុ។
ជាមួយនឹងសមត្ថភាពជួយបង្កើនជាតិអ័រមូនប្រូស្ហេស្តេរ៉ូន ត្រយូងបានចូលចំណែកយ៉ាងច្រើន នឹងធ្វើឱ្យសុខភាពស្បូនរបស់ស្ត្រីមានភាពរឹងមាំ និងបញ្ចៀសមិនឱ្យមានរោគសញ្ញាដុះKyste ហៅជាភាសាបច្ចេកទេសថា SOPK នៅក្នុងស្បូនបានទៀត។
ត្រយូងចេកនិងជំងឺទឹកនោមផ្អែម
បើតាមការសិក្សាពិសោធន៍លើសត្វកណ្តុរ បោះផ្សាយក្នុងទំព័រកាសែត « Phytotherapy Research » កាលពីឆ្នាំ ២០០០ ការទទួលទានសម្រង់សារធាតុត្រយូងចេក បានជួយកាត់បន្ថយកំរិតជាតិស្ករក្នុងឈាម និងបានបង្កើនកំរិតគ្រាប់ឈាមក្រហម hémoglobine។ តើអ្នកវិទ្យាសាស្ត្រពន្យល់យ៉ាងដូចម្តេច ? នេះគឺមកពីត្រយូងចេកមានផ្ទុកសារធាតុដែក យ៉ាងច្រើនសន្ធឹកសន្ធាប់ ៥៦,៤ក្រាម ក្នុងត្រយូងចេក១០០ក្រាម។ ដូច្នេះការទទួលទានត្រយូងចេកអាចជួយយើងក្នុងការទប់ស្កាត់ជំងឺខ្វះឈាម anémie។
ការសិក្សាមួយទៀត បានបង្ហាញថា កំរិតអាំងស៊ុយលីនរបស់អ្នកជំងឺទឹកនោមផ្អែម បានធ្លាក់ចុះគួរឱ្យកត់សម្គាល់ នៅពេលអ្នកជំងឺនោះទទួលទានសារធាតុចម្រាញ់ចេញពីត្រយូងចេក។ ថ្វីបើពេលនេះគេត្រូវការសិក្សាឱ្យបានស៊ីជម្រៅបន្ថែមទៀត ដើម្បីផ្តល់ជាភស្តុតាងបែបវិទ្យាសាស្ត្រត្រឹមត្រូវ ក្រុមអ្នកស្រាវជ្រាវ បានលើកទឹកចិត្តនិងផ្តល់អនុសាសន៍ឱ្យអ្នកមានជំងឺទឹកនោមផ្អែមទាំងអស់ ឧស្សាហ៍ និងជ្រើសរើសទទួលទានត្រយូង ជាអាហារ ឱ្យកាន់ញឹកញាប់តាមដែលអាចធ្វើទៅបាន។
ត្រយូងចេក និងការបង្ករោគ
ទល់លាមកជាបញ្ហាដែលមនុស្សគ្រប់រូប គ្រប់វ័យ អាចជួបប្រទះ។ ជាអាការៈដែលលំបាកបរិយាយបំផុត ហើយបើចំពោះស្ត្រីមានផ្ទៃពោះវិញ ការទល់លាមកអាចជាបញ្ហាដ៏ធ្ងន់ធ្ងរខ្លាំង។ ដូច្នេះ សូមទទួលទានត្រយូងចេក ព្រោះវាជាជំនួយអាចការពារប្រព័ន្ធរំលាយអាហារ។ សារធាតុសរសៃផងដ៏សម្បូរបែបរបស់ត្រយូងចេក ជាសារធាតុដ៏សំខាន់និងចាំបាច់សម្រាប់សុខភាពរំលាយអាហារ ពោលគឺ សម្រួលការបន្ទោរបង់ ការបត់ជើងតូច ជើងធំ។ ត្រយូងចេក ក៏អាចជួយយើងផងដែរ ក្នុងការប្រយុទ្ធប្រឆាំងនិងការកើតជំងឺដោយការបង្ករោគ។ បើតាមការសិក្សាមួយចុះផ្សាយលទ្ធផលនៅ ក្នុង ទស្សនាវដ្តី Journal of Chemical and Pharmaceutical search សារធាតុចម្រាញ់ចេញពីត្រយូងចេក មានផ្ទុកបន្សំជាតិអេតាណុល អាចស្រូបយករាល់គ្រប់ពពួកបាក់តេរី ដែលពូកែឆ្លងនិងពង្រីកខ្លួន នៅពេលចូលទៅក្នុងខ្លួនមនុស្ស ដូចជាពពួកបាក់តេរី E.Coli, Bacillus cereusនិង Bacillus subtilis ជាដើម។ល។ មានន័យថា ត្រយូងអាចមានសមត្ថភាពការពារកុំឱ្យមានការបង្ករោគ អាចព្យាបាលដំបៅ និយាយរួមគឺជួយការពារនិងព្យាបាល ដំបៅ ឬការរលាកនៅក្រពះ ពោះវៀន ដែលបង្កឡើយដោយមេរោគ។
ដូចបានបង្ហាញមកពីខាងលើ ថាត្រយូងក៏មានផ្ទុកយ៉ាងច្រើននូវសារធាតុម្យ៉ាងទៀត ដែលមានឈ្មោះថា ផ្លាវ៉ូនណូអ៊ីត។ សារធាតុនេះ ជាអង់ទីអ៊ុកស៊ីដង់ ដ៏មានសក្តានុពល ប្រយុទ្ធប្រឆាំងនឹងពពួកកោសិកាសំយោគ របាត់របាយអនាថា Radicaux libre និងអាចជួយការពារកោសិកាខ្លួនប្រាណយើង ប្រឈមនឹងពពួកកោសិកាសំណល់ឯកាទាំងនោះ។
សូមបញ្ជាក់ថា ពពួកកោសិកាសំយោគនោះ ជាសំណល់មូលេគុលគីមីគ្មានលំនឹង ដែលសកម្មខ្លាំងណាស់។ ប្រតិកម្មខ្លះអាចបំផ្លាញកោសិកាល្អៗក្នុងខ្លួនយើងផង។ ប្រសិនបើមានពពួកកោសិកាសំយោគនេះច្រើន នៅក្នុងសរីរាង្គកាយ ឥទ្ធិពលរបស់វាអាចបង្ហាញឱ្យឃើញដោយផ្ទាល់ភ្នែក ដោយមនុស្សនោះ នឹងឆាប់ចាស់ ស្បែកឆាប់ជ្រីវជ្រួញ។ ចំណែកឥទ្ធិពលមើលមិនឃើញផ្ទាល់នឹងភ្នែកវិញ កោសិកាសំយោគជាភ្នាក់ងារបង្កជំងឺដ៏កាចសាហាវ ដូចជាជំងឺមហារីក ជំងឺបេះដូង ជំងឺប្រព័ន្ធប្រសាទធ្លាក់ចុះខ្យោយ ជំងឺវង្វេងវង្វាន់ ឬងាយមានប្រតិកម្មពុលនឹងថ្នាំពេទ្យ។
ហេតុដូច្នេះហើយបានជាការទទួលទានត្រយូងចេកច្រើន អាចជួយការពារអ្នកពីជំងឺមហារីក ពីជួយបញ្ចុះសម្ពាធឈាមខ្ពស់ឱ្យមកនៅទាប។ ជាចុងក្រោយ ជាមួយនឹងកំរិតជាតិម៉ាញេស្យូម ជាង៤៧,៧ក្រាមក្នុងត្រយូងចេក១០០ក្រាម ត្រយូងចេកក៏អាចមានឥទ្ធិពលល្អលើអារម្មណ៍របស់អ្នក។ ត្រយូងចេក ជាអាហារដ៏ប្រពៃសម្រាប់អ្នកមានជំងឺធ្លាក់ទឹកចិត្ត ឬចង់បានអារម្មណ៍ធូរស្បើយ។
តើត្រូវទទួលទានត្រយូងចេកយ៉ាងដូចម្តេច?
សូមទទួលទានតាមការចូលចិត្ត ស្ងោ ឆា ម្ជូរ ញាំភ្លា តាមទម្លាប់ប្រពៃណី ឬតាមបែបបរទេស ជាការី ជាល្បាយជាមួយទឹកដោះគោជូរ កាន់តែញឹកញាប់កាន់តែប្រសើរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ