លោក Poutine បានទទួលមេដាយមិត្តភាពជាលើកទី១ពីប្រធានាធិបតីចិនលោក Xi Jingping
ប្រធានាធិបតីរុស្ស៊ី លោក Vladimir Poutine នៅថ្ងៃសុក្រម្សិលមិញ បានទទួលមេដាយមិត្តភាពជាលើកទីមួយ ពីសំណាក់ប្រទេសចិនដែលប្រគល់ជូនដោយលោកប្រធានាធិបតី Xi Jinping ។ ការប្រគល់មេដាយមិត្តភាពនេះ ត្រូវបានប្រព្រឹត្តទៅនៅខណៈដែលប្រទេសទាំង២ ចិននិងរុស្ស៊ី បានខិតខំ រិតចំណងមិត្តភាពនឹងគ្នា នៅក្នុងការប្រឈមនឹងបញ្ហានានា នៅចំពោះមុខ អាមេរិកមួយរបស់លោកDonald Trump។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០០
ប្រធានាធិបតីរុស្ស៊ី លោក ពូទីន បានទទួលកិត្តិយសគ្រប់សព្វពីសំណាក់ទីក្រុងប៉េកាំងនៅនាឱកាសនៃដំណើរទស្សនកិច្ចជាផ្លូវការណ៍មួយរបស់លោកនៅក្នុងប្រទេសចិន។ ជាដំណើរទស្សនកិច្ចដែលលោក ពូទីនត្រូវបន្តរហូតដល់ថ្ងៃសៅរ៍នេះនិងថ្ងៃអាទិត្យស្អែកទៀតនៅ តំបន់ Qingdao ភាគខាងកើតប្រទេសចិន។ នៅទីនោះ លោកពូទីន ត្រូវចូលរូមនៅក្នុងជំនួបកំពូលនៃអង្គការសហប្រតិបត្តិការសៀងហៃ (OCS) របស់បណ្តាប្រទេសអាស៊ី។ ម្យ៉ាងទៀត ជំនួបកំពូលនេះ ត្រូវប្រព្រឹត្តទៅនៅដំណាលគ្នានឹងជំនួបកំពូលG 7 របស់បណ្តាប្រទេសលោកខាងលិចដែលរួមប្រជុំគ្នានៅប្រទេសកាណាដា(Canada)។
សូមបញ្ជាក់ថា មេដាយលើកកិត្តិយសជនបរទេសនេះ ជាមេដាយដែលចិន ត្រូវជូនដល់ជនបរទេសណាមួយដែលបានចូលរួមចំណែកដ៏ពិសេសនៅក្នុងដំណើរការធ្វើទំនើបកម្មសង្គមនិយមរបស់ប្រទេសចិននិងក៏នៅក្នុងប្រទេសដ៏ទៃផ្សេងទៀតដែរនៅក្នុងពិភពលោក រួមទាំងកិច្ចការពាររក្សាសន្តិភាពពិភពលោកផងដែរ-នេះបើយោងតាមការលើកបញ្ជាក់របស់ទីភ្នាក់ងារព័ត៌មានចិនថ្មី។
នៅនាឱកាសសន្ទនាជាទ្វេរភាគីជាមួយលោក ពូទីននោះ ប្រធានាធិបតីចិន បានសម្តែងការអបអរសាទរដោយបានធានាអះអាងថា បើទោះបីជាស្ថានការណ៍អន្តរជាតិ មានការប្រែប្រួលយ៉ាងណាក្តី ក៏ប្រទេសទាំងពីរ ចិននិងរុស្សី នៅតែចាត់ទុកជានិច្ចថា ការពង្រីកទំនាក់ទំនងរវាងចិននិងរុស្ស៊ី គឺជាបញ្ហាអាទិភាពមួយរបស់ប្រទេសខ្លួន។
គួរកត់សម្គាល់ថា ប្រមុខដឹកនាំមហាអំណាចទាំងពីរប្រទេសរុស្ស៊ីនិងចិន នាអំឡុងប៉ុន្មានខែចុងក្រោយនេះ បានខិតជិតចូលគ្នាដើម្បីពួតកម្លាំងគ្នា ក្នុងការប្រឈមមុខទល់នឹងការទិតៀនរបស់ប្រធានាធិបតីអាមេរិកលោក ដូណាល់ត្រំ។ លោកដូណាល់ត្រំដែលមើលឃើញទីក្រុងប៉េកាំងនិងមូស្គូ ថាជាប្រទេសគូប្រជែងដ៏ខ្លាំងក្លាបំផុតនៅក្នុងវិស័យសេដ្ឋកិច្ចក៏ព្រមទាំង គំរាមដល់ផលប្រយោជន៍និងតម្លៃរបស់អាមេរិកផងទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ