ចិននៅពីក្រោយវាំងនននៃជំនួបកំពូល អាមេរិក កូរ៉េខាងជើង
នៅក្នុងសន្និសីទកាសែត នៅក្រោយជំនួបកំពូលជាមួយមេដឹកនាំកូរ៉េខាងជើង គីម ជុងអ៊ុន លោកប្រធានាធិបតីអាមេរិក ដូណាល់ ត្រាំ បាននិយាយថ្លែងកោតសរសើរ លោកប្រធានាធិបតីចិន ស៊ី ជីនពីង មេដឹកនាំប្រទេសមួយ ដែលបានជួយឲ្យអាចកើតមានជំនួបប្រវត្តិសាស្រ្ត រវាងលោក ហើយនិងមេដឹកនាំកូរ៉េខាងជើង នៅប្រទេសសិង្ហបុរី នៅថ្ងៃអង្គារទី ១២មិថុនានេះ។
ចុះផ្សាយនៅថ្ងៃ៖
នៅប៉ុន្មានម៉ោង ក្រោយជំនួបកំពូល អាមេរិក និងកូរ៉េខាងជើង ប្រទេសចិន តាមរយៈ ប្រមុខការបរទេសចិន លោកវ៉ាង យី បាននិយាយកោតសរសើរ ចាត់ទុកជំនួបរវាងប្រធានាធិបតី អាមេរិក ហើយនិងមេដឹកនាំកូរ៉េខាងជើងថា ជាជំនួបប្រវត្តិសាស្រ្ត និងបានអំពាវនាវឲ្យលុបបំបាត់ចោលទាំងស្រុង អាវុធនុយក្លេអ៊ែរ រួមទាំងដោះស្រាយផង ភាពតានតឹងនៅឧបទ្វីបកូរ៉េ។
ចិន សម្ព័ន្ធមិត្ត គ្មានមុខនៅក្នុងតុពិភាក្សា នៅថ្ងៃនេះ ប៉ុន្តែ មិនមែនមានន័យថា ចិន មិនបានដើរតួនាទីអ្វីសោះនោះទេ។ គ្មានសញ្ញាភ្លើងខៀវពីទីក្រុងប៉េកាំង ដែលជាអ្នកធានាសន្តិសុខ និងការរស់រាន របស់កូរ៉េខាងជើង មេដឹកនាំកូរ៉េខាងជើង ក៏មិនអាចបើកជំនួបកំពូលជាមួយ លោកដូណាល់ ត្រាំ នៅថ្ងៃនេះបានដែរ។
សូមអាន៖ កូរ៉េខាងជើង-ចិន៖លោកគីម ជុងអ៊ុនពិតជាបានទៅជួបលោកស៊ី ជីនពីងនៅក្រុងប៉េកាំងមែន
គេនៅបានថា នៅក្រោយ ការប្រកាសព្រមព្រៀងបើកជំនួបកំពូល ជាមួយលោកប្រធានាធិបតី អាមេរិក ដូណាល់ ត្រាំ មេដឹកនាំកូរ៉េខាងជើង លោកគីម ជុងអ៊ុនបានធ្វើដំណើរទៅទីក្រុងប៉េកាំង ទៅជួបលោកប្រធានាធិបតីចិន ស៊ី ជីនពីង ដល់ទៅ២ដង នៅចុងខែមីនា និងដើមខែឧសភា។ ការពិតណាស់ថា ជំនួបកំពូលជាមួយលោកដូណាល់ ត្រាំ ចេញមកពីការផ្តួចផ្តើមគំនិត និងឆន្ទៈផ្ទាល់ របស់មេដឹកនាំកូរ៉េខាងជើង។ កន្លងមក ចិន ដែលជាប្រភពសេដ្ឋកិច្ចចំបងរបស់កូរ៉េខាងជើង (៩០ភាគរយនៃការនាំចេញរបស់កូរ៉េខាងជើង ពឹងផ្អែកទៅលើប្រទេសចិន) ប៉ុន្តែ ចិនគ្មានឥទ្ធិពលដាក់សម្ពាធឲ្យមេដឹកនាំកូរ៉េខាងជើង ចូលចរចា ដើម្បី លះបង់ចោលកម្មវិធីផលិតនុយក្លេអ៊ែររបស់ខ្លួននោះទេ។
ចិនមិនអាចបញ្ចុះបញ្ចូលឲ្យមេដឹកនាំកូរ៉េខាងជើងលះបង់ចោលអាវុធនុយក្លេអ៊ែរ ប៉ុន្តែ ចិនក៏មិនបដិសេធប្រឆាំងដែរ បើសិនកូរ៉េខាងជើងបើកការចរចាជាមួយអាមេរិក ក្នុងរឿងលុបបំបាត់ចោលអាវុធនុយក្លេអ៊ែរ។ ចិនដែលប្រាថ្នាមិនចង់ឲ្យមានអាវុធប្រល័យលោក នៅកូរ៉េខាងជើង ក្បែរមាត់ទ្វារផ្ទះរបស់ខ្លួន បានគាំទ្រ រហូតមក ចំណាត់ការរបស់អង្គការសហប្រជាជាតិ ដែល ដាក់ទណ្ឌកម្មសេដ្ឋកិច្ច លើកូរ៉េខាងជើង ក៏ដើម្បីឲ្យកូរ៉េខាងជើង សុខចិត្តលះបង់ចោល កម្មវិធីអាវុធនុយក្លេអ៊ែរនោះដែរ។ សម្រាប់ទីក្រុងប៉េកាំង ដែលផ្តោតសំខាន់ទៅលើការអភិវឌ្ឍន៍សេដ្ឋកិច្ចជាចំបង កម្មវិធីអភិវឌ្ឍអាវុធនុយក្លេអ៊ែររបស់កូរ៉េខាងជើង គ្រោះថ្នាក់ និងជាប្រភពទាក់ទាញរឿង អពមង្គល ទាំងសម្រាប់សេដ្ឋកិច្ច ហើយនិងសន្តិសុខចិន។ ក្នុងក្រសែភ្នែកចិន អាវុធនុយក្លេអ៊ែររបស់កូរ៉េខាងជើង ត្រូវ បានអាមេរិកប្រើធ្វើលេស ដើម្បីពង្រឹងកម្លាំងទ័ពនៅឧបទ្វីបកូរ៉េ ដូចជាការតាំងប្រព័ន្ធខែលមីស៊ីល នៅទឹកដីកូរ៉េខាងត្បូង ជាដើម។
នៅក្នុងជំនួបកំពូលលើកនេះ ទោះជាចិន មិនបានបញ្ចេញមុខមាត់ខ្លាំងមែន ប៉ុន្តែ ចិនបានត្រងចាំទទួលប្រយោជន៍ពី ជំនួបពិភាក្សា រវាងមេដឹកនាំកូរ៉េខាងជើង ហើយនិងលោកដូណាល់ ត្រាំ បានច្រើនណាស់។ ជំនួបលើកនេះ នឹងអាចកាត់បន្ថយភាពតានតឹង ហើយនិងសង្គ្រាមពាក្យសំដីរវាងលោកដូណាល់ ត្រាំ ហើយនិងលោកគីម ជុងអ៊ុន ដែលពេលខ្លះ ធ្វើឲ្យចិនខ្លាចបារម្ភថា នឹងអាចផ្ទុះសង្រ្គាមដាក់គ្នា។ មួយវិញទៀត នៅពេលដែលកូរ៉េខាងជើង លះបង់ចោលអាវុធនុយក្លេអ៊ែរ និងបែរទៅលើផ្លូវ អភិវឌ្ឍសេដ្ឋកិច្ច នោះ ចិនដែលជាដៃគូសេដ្ឋកិច្ចដ៏សំខាន់របស់កូរ៉េខាជើង ក៏អាចទាញប្រយោជន៍ច្រើនពីកូរ៉េខាងជើងដែលបើកទ្វារសេដ្ឋកិច្ច គឺជាជាងពីកូរ៉េខាងជើងដ៏ក្រីក្រ ដែលរងការដាក់ទណ្ឌកម្មសេដ្ឋកិច្ច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ