តុលាការស៊ុយអែត ផ្តន្ទាទោសជនជាតិចិន ពីបទធ្វើចារកម្មលើជនភៀសខ្លួនទីបេ នៅបរទេស
ជនជាតិម្នាក់ត្រូវបានតុលាការស៊ុយអែត សម្រេចផ្តន្ទាទោសឲ្យជាប់ពន្ធនាគារ ២២ខែ ពីបទបន្លំខ្លួន ចូលលួចយកការណ៍ពីសហគមន៍ជនភៀសខ្លួន ទីបេ នៅទឹកដីស៊ុយអែត សម្រាប់ប្រយោជន៍ប្រទេសចិន។ ជាទូទៅ ចារកម្មយកការណ៍ ពីជនភៀសខ្លួន នៅទឹកដីបរទេសធ្វើឡើង ក្នុងគោលដៅ ដាក់សម្ពាធ លើជនភៀសខ្លួន ឲ្យឈប់ រិះគន់របបដឹកនាំនៅប្រទេសកំណើត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១០
នៅក្នុងសេចក្តីសម្រេចកាលពីថ្ងៃសុក្រ តុលាការស៊ុយអែតបានបញ្ជាក់ថា Dorjeee Gyantsan ជនជាតិចិន អាយុ ៤៩ឆ្នាំ ត្រូវទទួលទោសទណ្ឌ ព្រោះសកម្មភាពលួចយកការណ៍ក្នុងទ្រង់ទ្រាយដ៏ធំ របស់ជនជាតិចិនរូបនេះកំពុងធ្វើឲ្យគ្រោះថ្នាក់ដល់ជីវិតរបស់ជនភៀសខ្លួន ទីបេ នៅប្រទេសស៊ុយអែត ហើយនិងក្រុមគ្រួសាររបស់ពួកគេ ដែលរស់នៅក្នុងទឹកដីទីបេ។
រត់ចេញពីប្រទេសចិន នៅទសវត្សរ៍ ឆ្នាំ ១៩៩០ និងបានធ្វើដំណើរទៅរស់នៅប្រទេសស៊ុយអែត នៅឆ្នាំ ២០០០ ក្នុងនាមជាជនភៀសខ្លួន ទីបេ ការពារដោយអង្គការសហប្រជាជាតិ ជនជាប់ចោទ ដែលមានម្តាយទីបេ និងឪពុកចិន បានប្រើអត្តសញ្ញាណផ្សេងៗគ្នា ដើម្បីបន្លំខ្លួនយកការណ៍ពីសហគមន៍ទីបេ នៅទឹកដីស្កង់ឌីណាវ ដូចជាបន្លំខ្លួនជាអ្នកកាសែតរបស់សំឡេងទីបេ ដើម្បី តាមដានសកម្មភាព ហែក្បួន ស្វាគមសម្តេចសង្ឃដាឡៃ ឡាម៉ា នៅប្រទេសន័រវែស ជាដើម។
នៅក្នុងសេចក្តីសន្និដ្ឋានរបស់ខ្លួន ចៅក្រមស៊ុយអែតបានវាយតម្លៃថា ជនជាប់ចោទចិនបានជួបជាញឹកញាប់ លេខាទូតចិន នៅប្រទេសប៉ូឡូញ ដើម្បីផ្តល់ព័ត៌មានដែលខ្លួនប្រមូលបានទាក់ទងនឹងសហគមន៍ទីបេ ជាថ្នូរទៅនឹងប្រាក់សុទ្ធ។ សកម្មភាពចារកម្មរបស់ជនជាតិចិន Dorjee Gyantsan បានចាប់ផ្តើមតាំងពីខែកក្កដាឆ្នាំ ២០១៥ ប៉ុន្តែ ត្រូវបានប៉ូលិសស៊ុយអែត ចាប់ខ្លួន នៅខែកុម្ភៈ ឆ្នាំ មុន នៅពេលធ្វើដំណើរត្រលប់មកពីប្រទេសប៉ូឡូញ ជាមួយនឹងទឹកប្រាក់សុទ្ធ៦ពាន់ដុល្លារ។ ប៉ូលិសស៊ុយអែត បានចាប់ខ្លួនជនជាតិ ដោយពឹងផ្អែកលើសក្ខីកម្មរបស់ជនភៀសខ្លួន ទីបេ សៀវភៅលេខទូរស័ព្ទ ហើយនិងព័ត៌មានស្តីពីដំណើរចេញចូលទៅបរទេស របស់ជនជាតិរូបនេះ Dorjee Gyantsan។ រដ្ឋាភិបាល មួយចំនួនបានបង្កប់ចារកិច្ចរបស់ខ្លួននៅបរទេស ដើម្បីតាមដាន ជាប្រចាំសកម្មភាពនយោបាយរបស់ពួកគេទាំងនោះ។ គោលដៅគឺដើម្បីកំណត់អត្តសញ្ញាណ ទីកន្លែងរស់នៅ របស់ក្រុមអ្នកប្រឆាំងនឹងរដ្ឋាភិបាលក្នុងស្រុក។ ជារួម គេអាចប្រើ ព័ត៌មានដែលចារកិច្ចប្រមូលបាន ដើម្បីយកទៅប្រើ ដាក់សម្ពាធ លើសមាជិកគ្រួសាររបស់ជនភៀសខ្លួន ដែលកំពុងរស់នៅក្នុងស្រុកជាដើម ក្នុងគោលដៅទប់ស្កាត់សកម្មភាពតវ៉ាប្រឆាំងនឹងខ្លួន ពីសំណាក់ជនជាតិរបស់ខ្លួន ដែលភៀសខ្លួន នៅទឹកដីបរទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ