អង្គការរដ្ឋអ៊ីស្លាមធ្វើភេរវកម្មចង់បំផ្លាញបទឈប់បាញ់អាហ្វហ្កានីស្ថាន និងតាលីបង់ ?
ក្នុងពេលដែលរដ្ឋាភិបាលអាហ្វហ្កានីស្ថាន និងតាលីបង់ កំពុង ចង់ពន្យារពេលបទឈប់បាញ់ ដ៏កម្រ មិនធ្លាប់មាន បន្តចំនួនបីថ្ងៃទៀត ស្រាប់តែមានភេរវកម្មអត្តឃាតមួយបានផ្ទុះឡើង កណ្តាលហ្វូងមនុស្ស ដែលកំពុងនាំគ្នាអបអរស្វាគមន៍បទឈប់បាញ់។ មានស្លាប់យ៉ាងហោចណាស់ ២៥នាក់ របួស៥៤នាក់។ ពួកតាលីបង់បានអំពាវនាវឱ្យយុទ្ធជនរបស់គេ កុំទៅច្របូកច្របល់នឹងកងសន្តិសុខរដ្ឋាភិបាលនិងប្រជាជនស៊ីវិល។
ចុះផ្សាយនៅថ្ងៃ៖ កែប្រែថ្ងៃទី៖
ពុំទាន់មានក្រុមណាចេញមុនទទួលស្គាល់អំពើភេរវកម្មអត្តឃាត បំផ្ទុះគ្រាប់បែក កាលពីម្សិលមិញទេ ប៉ុន្តែបើតាមប្រភពសន្តិសុខអាហ្វហ្កានីស្ថាន នេះជាស្នាដៃរបស់ពួកអង្គការរដ្ឋអ៊ីស្លាម។
ភេរវកម្មអត្តឃាតបានផ្ទុះឡើង នៅកណ្តាលហ្វូងមហាជនតាលីបង់ ស៊ីវិល និងកងកម្លាំងប្រដាប់អាវុធរដ្ឋាភិបាល ដែលកំពុងប្រារព្ធពិធីបិទបញ្ចប់ថ្ងៃបុណ្យតមអាហារ និងដែលកំពុងនាំគ្នាអបអរបទឈប់បាញ់ រួមគ្នាកាលពីថ្ងៃសៅរ៍។ ពោលគឺក្រោយសេចក្តីប្រកាសរបស់ ប្រធានាធិបតីអាហ្វហ្កានីស្ថាន លោកអាសាហ្វ ហ្កានី ពន្យារពេល គោរពបទឈប់បាញ់ ឱ្យបានច្រើនថ្ងៃទៅមុខទៀត និងស្នើសុំឱ្យភាគីតាលីបង់ប្រកាន់ជំហរពន្យារពេលផ្អាកបាញ់គ្នាទៀត តែបន្តិចប៉ុណ្ណោះ។
សូមបញ្ជាក់ថា កាលពីសប្តាហ៍មុន លោកប្រធានាធិបតីអាហ្វហ្កានីស្ថាន បានសម្រេចផ្អាកបាញ់ជាឯកតោភាគីរយៈពេល៨ថ្ងៃ។ ឯ តាលីបង់បានប្រកាសកាលពីថ្ងៃសុក្រ ឈប់បាញ់បីថ្ងៃ ដើម្បីប្រារព្វពិធីបុណ្យសាសនា។ ដល់ឱសានវាទ តាលីបង់ បានប្រកាសមិនបន្តបទឈប់បាញ់ទៀតទេ។
កងកម្លាំងអូតង់ នៅអាហ្វហ្កានីស្ថាន ព្រមទាំងកងកម្លាំងយោធាអាមេរិក ក៏បានប្រកាសដូចគ្នាគោរពតាមសេចក្តីប្រកាសរបស់លោកប្រធានាធិបតីអាហ្វហ្កានីសា្ថន ពន្យារពេលឈប់បាញ់ ប៉ុន្តែក្រុមប្រដាប់អាវុធផ្សេងទៀត ជាក់ស្តែងក្រុមអង្គការរដ្ឋអ៊ីស្លាម មិនត្រូវបានរាប់បញ្ចូលក្នុងបទឈប់បាញ់ជាបណ្តោះអាសន្ននេះទេ។
នេះជាលើកទីមួយហើយគិតចាប់តាំងពីឆ្នាំ២០០១មក ដែលអាហ្វហ្កានីស្ថាន បានស្គាល់ភាពស្ងប់ស្ងាត់ និងប្រកាន់យកបទឈប់បាញ់ទូទាំងប្រទេស យ៉ាងដូច្នេះ។ បទឈប់បាញ់ដែលសហភាពអឺរ៉ុប បានចាត់ទុកថា "មានលក្ខណៈជាប្រវត្តិសាស្ត្រ” បានផ្តល់ក្តីសង្ឃឹមថ្មីបានតែមួយភ្លែតប៉ុណ្ណោះ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ