ចិន-កូរ៉េខាងជើង៖ក្រោយពីបានជួបលោកដូណាល់ ត្រាំ លោកគីម ជុងអ៊ុនទៅរាយការណ៍ប្រាប់លោកស៊ី ជីនពីង
នៅថ្ងៃអង្គារ ទី១៩ មិថុនានេះ មេដឹកនាំកូរ៉េខាងជើងលោកគីម ជុងអ៊ុនបានទៅបំពេញទស្សនកិច្ចរយៈពេល ២ថ្ងៃក្នុងប្រទេសចិន។ ទស្សនកិច្ចជាលើកទី៣ នៅចិនពេលនេះបានធ្វើឡើង មួយសប្តាហ៍ក្រោយពីលោកគីមបានជួបសន្ទនាជាប្រវត្តិសាស្រ្តជាមួយលោកប្រធានាធិបតីអាមេរិកដូណាល់ ត្រាំក្នុងប្រទេសសិង្ហបុរីកាលពីថ្ងៃទី១២ មិថុនា។ គេនៅមិនទាន់ដឹងពីកម្មវត្ថុនៃទស្សនកិច្ចរបស់លោកគីមនៅចិនពេលនេះទេ តែមានការលើកឡើងថា លោកគីមទៅជួបលោកប្រធានាធិបតីចិនស៊ី ជីនពីងដើម្បីរាយការណ៍ពីជំនួបរបស់គាត់ជាមួយលោកត្រាំ។
ចុះផ្សាយនៅថ្ងៃ៖
ស្តាប់ - ០១:៤៩
មិនដល់ ៣ខែផង មេដឹកនាំកូរ៉េខាងជើងវ័យ ៣០ប្លាយឆ្នាំលោកគីម ជុងអ៊ុនបានទៅចិនចំនួន ៣ដង។ តែខុសពីទម្លាប់សព្វមួយដង ទស្សនកិច្ចលើកទី៣ នេះត្រូវបានកាសែតចិនប្រកាសឲ្យដឹងតាំងពីថ្ងៃទី១ ព្រមទាំងបានបញ្ជាក់ថាមានរយៈពេល ២ថ្ងៃទៀតផង។ នៅក្នុងដំណើរទស្សនកិច្ច ២លើកដំបូង កាសែតចិនបានប្រកាសឲ្យដឹង បន្ទាប់ពីលោកគីម ជុងអ៊ុនបានវិលត្រឡប់ចូលស្រុកវិញ។ សន្តិសុខត្រូវបានពង្រឹងនៅតាមដងផ្លូវនាំឆ្ពោះទៅកាន់វិមានសភាប្រជាជនចិនក្នុងទីក្រុងប៉េកាំង។ គឺជាទីកន្លែងថ្នាក់ដឹកនាំចិនតែងទទួលជួបថ្នាក់ដឹកនាំបរទេសក្នុងពេលបំពេញទស្សនកិច្ច។
គេនៅមិនទាន់ដឹងពីកម្មវត្ថុនៃទស្សនកិច្ចលើកទី៣ នៅចិនរបស់មេដឹកនាំកូរ៉េខាងជើងទេ អ្វីដែលគេដឹង ទស្សនកិច្ចនេះបានធ្វើឡើង ១សប្តាហ៍ក្រោយពីលោកគីមបានមានជំនួបជាប្រវត្តិសាស្រ្តជាមួយលោកប្រធានាធិបតីអាមេរិកដូណាល់ ត្រាំក្នុងប្រទេសសិង្ហបុរីកាលពីថ្ងៃទី១២ មិថុនា។ ដូច្នេះចង់ ឬមិនចង់ លោកគីមត្រូវរាយការណ៍ប្រាប់លោកប្រធានាធិបតីចិនស៊ី ជីនពីងពីលទ្ធផលនៃជំនួបជាមួយលោកត្រាំ។ តែនៅក្នុងសន្និសីទកាសែតប្រចាំថ្ងៃនាថ្ងៃអង្គារ ទី១៩ មិថុនានេះ អ្នកនាំពាក្យក្រសួងការបរទេសចិនមិនបាននិយាយដល់ចំណុចនេះទេ។
អ្នកនាំពាក្យក្រសួងការបរទេសចិនរូបនេះដដែលគ្រាន់តែបញ្ជាក់ដោយសង្ឃឹមថា ទស្សនកិច្ចថ្មីនឹងចូលរួមពង្រឹងទំនាក់ទំនងទ្វេភាគីចិន កូរ៉េខាងជើង ព្រមទាំងចូលរួមលើកកម្ពស់សន្តិភាព និងស្ថិរភាពនៅក្នុងតំបន់។ សូមជម្រាបជូនថា ចិនបានសាទរពីភាពចម្រើនទៅមុខនៃទំនាក់ទំនងរវាងក្រុងព្យុងយ៉ាង និងក្រុងវ៉ាស៊ីនតោននៅក្នុងជំនួបរវាងលោកគីម និងលោកត្រាំ។ លើសពីនេះទៅទៀត ចិនក៏បានកោតសរសើរពីការសម្រេចចិត្តរបស់លោកត្រាំក្នុងការព្យួរសមយុទ្ធរវាងអាមេរិក និងកូរ៉េខាងត្បូងដែលគ្រោងធ្វើនៅខែសីហាខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ