ថៃ៖ការស្វែងរកកូនក្មេង និងគ្រូបង្វឹកបាល់ទាត់បានឈានចូលថ្ងៃទី៦ ជាមួយនឹងក្តីសង្ឃឹមស្តួចស្តើង
នៅក្នុងប្រទេសថៃ ប្រតិបត្តិការស្វែងរកកូនក្មេង ១២នាក់ និងគ្រូបង្វឹកកីឡាបាល់ទាត់ម្នាក់នៅក្នុងរូងភ្នំមួយស្ថិតក្នុងខេត្តឈៀងរ៉ៃក្បែរព្រំដែនប្រទេសឡាវ និងភូមាបានឈានចូលដល់ថ្ងៃទី៦ នាថ្ងៃសុក្រ ទី២៩ មិថុនា។ គួររម្លឹកជូនថា កូនក្មេងទាំង ១២នាក់មានអាយុពី ១១ឆ្នាំទៅ ១៦ឆ្នាំ និងគ្រូបង្វឹកកីឡាបាល់ទាត់របស់គេម្នាក់អាយុ ២៥ឆ្នាំបាននាំគ្នាចូលក្នុងរូងភ្នំនោះកាលពីយប់ថ្ងៃសៅរ៍ ទី២៣ មិថុនា ហើយក៏បានជាប់គាំងចេញមិនរួចដោយសារតែកម្រិតទឹកឡើងខ្លាំងពេក។ លោកនាយករដ្ឋមន្រ្តីថៃចាន់អូចាដែលបានទៅកន្លែងកើតហេតុផ្ទាល់បានចាត់វិធានការជួយសង្រ្គោះបន្ថែមទៀត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៩
មួយសប្តាហ៍គត់ដែលគេបាត់ដំណឹងសូន្យឈឹងពីកូនក្មេង ១២នាក់ និងគ្រូបង្វឹកកីឡាបាល់ទាត់ម្នាក់ដែលបានជាប់កុននៅក្នុងរូងភ្នំមួយស្ថិតក្នុងខេត្តឈៀងរ៉ៃ។ តាំងពី ៦ថ្ងៃមកហើយដែលរដ្ឋអំណាចបានប្រើគ្រប់មធ្យោបាយ និងធនធានមនុស្សប្រមាណជា ១ ០០០នាក់ដើម្បីស្វែងរកពួកគេ ក្នុងនោះមានទាំងកម្លាំងទាហានអាមេរិកាំង និងកម្លាំងមុថទឹកជនជាតិអង់គ្លេស។ ទន្ទឹមគ្នានេះ ក៏មានការរៀបចំពិធីបន់ស្រន់របស់ឱពុក ម្តាយកូនក្មេង ព្រមទាំងពិធីសូត្រធម៌របស់ព្រះសង្ឃនៅក្បែរច្រកចូលរូងភ្នំនោះដែរ។ លោកនាយករដ្ឋមន្រ្តីថៃចាន់អូចាដែលបានទៅកន្លែងកើតហេតុក្នុងថ្ងៃសុក្រ ទី២៩ មិថុនាបានថ្លែងថា បរិមាណទឹកច្រើននៅក្នុងរូងភ្នំជាឧបសគ្គតែមួយគត់របស់ក្រុមអ្នកជួយសង្រ្គោះ។
ក្រៅពីការប្រើម៉ាស៊ីនបូមទឹកជាង ៥០គ្រឿងដើម្បីបូមទឹកចេញពីរូងភ្នំ ក៏មានការបញ្ជូនកម្លាំងមុជទឹកចូលទៅក្នុងរូងភ្នំនោះដែរ តែចំណោតរបស់កម្លាំងមុជទឹកនៅត្រង់ថា ពួកគេមិនអាចមើលអ្វីឃើញច្បាស់ដោយសាតតែទឹកល្អក់មានព័ណ៌ដូចកាហ្វេទឹកដោះគោ។ ចៅហ្វាយខេត្តឈៀងរ៉ៃបានថ្លែងនៅលា្ងចថ្ងៃសុក្រ ទី២៩ មិថុនាថា បើមានសំណាងរកឃើញកូនក្មេងទាំង ១២នាក់ រួមទាំងគ្រូបង្វឹកម្នាក់នៅមានជីវិត ក៏ក្រុមអ្នកជួយសង្រ្គោះមិនទាន់យកចេញភ្លាមៗដែរ ពោលត្រូវស្ថិតនៅជាមួយពួកគេរយៈពេលខ្លី ព្រោះបើយកចេញភ្លាម ពួកគេនឹងមានបញ្ហាភ្នែក និងការដកដង្ហើម បន្ទាប់ពីស្ថិតក្នុងភាពងងឹតស្លុងអស់ពេល ១សប្តាហ៍។
តែចៅហ្វាយខេត្តឈៀងរ៉ៃរូបនេះដដែលបានទទួលស្គាល់ថា សំណាងរកឃើញនៅមានជីវិតហាក់កាន់តែតិចទៅៗ។ សូមជម្រាបជូនថា រូងភ្នំដែលកូនក្មេងទាំង ១២នាក់ និងគ្រូបង្វឹកកីឡាបាល់ទាត់ម្នាក់របស់ពួកគេបានចូល និងជាប់កុនតាំងពីថ្ងៃសៅរ៍ ទី២៣ មិថុនាមានឈ្មោះ Tham Luang និងមានប្រវែងជា ១០គីឡូម៉ែត្រស្ថិតក្នុងខេត្តឈៀងរ៉ៃក្បែរព្រំដែនប្រទេសឡាវ និងភូមា។ ក្រៅពីនៅថៃ ករណីដូចគ្នានេះធ្លាប់កើតមាននៅអាល្លឺម៉ង់ក្នុងឆ្នាំ ២០១៤ ដែលបុរសម្នាក់ត្រូវបានគេជួយជីវិតបាន ក្រោយពីជាប់ក្នុងរូងភ្នំរយៈពេល ១១ថ្ងៃ។ នៅប៉េរូក្នុងឆ្នាំ ២០១២ កម្មករអណ្តូងរ៉ែមួយក្រុមបានរួចជីវិត បន្ទាប់ពីជាប់គាំងក្រោមដីអស់រយៈពេល ៧ថ្ងៃ។ នៅឈីលីក្នុងឆ្នាំ ២០១០ កម្មករអណ្តូងរ៉ែមួយក្រុមក៏បានរួចជីវិតបាន ក្រោយពីជាប់គាំងក្រោមដីអស់រយៈពេល ១៧ថ្ងៃ។
តែចំណោតនៅក្នុងប្រទេសថៃពេលនេះ គឺទឹកឡើងលឿនពេកនៅក្នុងរូងភ្នំដែលជាឧបសគ្គនៅក្នុងប្រតិបត្តិការជួយសង្រ្គោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ