របាយការណ៍៖ ផលិតផលកសិកម្មអឺរ៉ុបនឹងធ្លាក់ចុះ ប៉ុន្តែ ទៅកើនឡើងនៅអាស៊ី
នៅ១០ឆ្នាំខាងមុខ ផលិតកម្មកសិកម្ម របស់ទ្វីបអឺរ៉ុបនឹងធ្លាក់ចុះថយ។ តាមរបាយការណ៍ចេញផ្សាយនៅថ្ងៃអង្គារ និងធ្វើរួមគ្នា ដោយអង្គការចំណីអាហារ និងស្បៀងអាហាររបស់អង្គការសហប្រជាជាតិ FAO និង អង្គការដើម្បី សហប្រតិបត្តិការ និងអភិវឌ្ឍសេដ្ឋកិច្ច OCDE ពីពេលនេះ រហូតដល់ឆ្នាំ ២០២៧ ផលិតផលកសិកម្មនៅ អឺរ៉ុប នឹងថយចុះ ក្នុងពេលដែលផលិតផលកសិកម្មរបស់អាស៊ី ហើយនិងអាហ្វ្រិកនឹងស្គាល់ការរីកចម្រើន កើនឡើងច្រើនជាងមុន។
ចុះផ្សាយនៅថ្ងៃ៖ កែប្រែថ្ងៃទី៖
នៅក្នុងរបាយការណ៍ព្យាករណ៍ កសិកម្មពិភពលោក សម្រាប់រយៈពេល ១០ឆ្នាំទៅមុខ (២០១៨-២០២៧) អង្គការសហប្រជាជាតិ និងអង្គការដើម្បី សហប្រតិបត្តិការ និងអភិវឌ្ឍសេដ្ឋកិច្ច បានវាយតម្លៃថា ចំណែករបស់អឺរ៉ុប សម្រាប់ផលិតផលកសិកម្មពិភពលោកនឹងធ្លាក់ចុះ ជាបន្តបន្ទាប់ ពីពេលនេះ រហូតដល់ឆ្នាំ ២០២៧។ ការធ្លាក់ចុះ នៃតម្រូវការ ប្រេង ដែលផលិតចេញពីគ្រាប់ធញ្ញជាតិ ដូចជាផ្កាឈូករ័ត្ន ឬកុលហ្សា ជាដើមហេតុមួយ នៃការធ្លាក់ចុះផលិតកម្ម កសិកម្មនៅក្នុងទឹកដីអឺរ៉ុប។ បរិមាណផលិតទំនិញកសិកម្ម ធ្លាក់ចុះនៅអឺរ៉ុបខាងលិច ប៉ុន្តែ រុស្ស៊ី ក្នុងទឹកដីអឺរ៉ុប នៅតែនាំមុខគេ ក្នុង នាមជាប្រទេសដែលផលិត នាំចេញ ស្រូវសាឡី ច្រើនជាងគេទៅទីផ្សារពិភពលោក គឺនាំមុខសហភាពអឺរ៉ុប ហើយនិងអាមេរិក ដែលជាប់ចំណាត់ថ្នាក់លេខបី។
នៅពេលដែលការផលិតស្រូវសាឡី ទឹកដោះគោ ហើយនិងសាច់សត្វ ធ្លាក់ចុះនៅអឺរ៉ុប ប្រទេស និងតំបន់ផ្សេងទៀត ដូចជានៅអាស៊ី និងអាហ្វ្រិកបានស្គាល់កំណើនផលិតផលកសិកម្ម ក្នុងរយៈពេល ១០ឆ្នាំទៅមុខ។ នៅ អាស៊ីខាងត្បូង និងអាស៊ីខាងកើត ចិន និងឥណ្ឌា នៅតែជានាំមុខគេក្នុងការផលិតទំនិញកសិកម្ម។
របាយការណ៍ កត់សំគាល់ដែរថា តំបន់សាហារ៉ា នៅអាហ្វ្រិក នឹងស្គាល់កំណើនផលិតកម្មកសិកម្ម រហូត ៣០%សម្រាប់គ្រាប់ធញ្ញជាតិ និង២៥ភាគរយសម្រាប់ការផលិតសាច់សត្វ។ កំណើនផលិតកម្មកសិកម្ម នៅអាហ្វ្រិក ជាលទ្ធផលនៃការអនុវត្តនយោបាយ សាងស់បណ្តាញធារាសាស្រ្ត បច្ចេកវិទ្យាកសិកម្ម ហើយនិងការប្រើប្រាស់ជីគីមី សម្រាប់ថែទាំដំណាំកសិកម្ម។ យ៉ាងណាក៏ដោយ អ្នកសរសេររបាយការណ៍បានបង្ហាញថា ទោះជាផលិតផលកសិកម្មកើនឡើងនៅតំបន់អាហ្វ្រិក ប៉ុន្តែ វា នៅមិនទាន់អាចឆ្លើយតបនឹងតម្រូវការជាពិសេសនៅតំបន់អាហ្វ្រិក ដែលនឹងមានប្រជាជន កើតថ្មី កាន់តែច្រើនជាងមុន។
ជារួម របាយការណ៍ របស់អង្គការសហប្រជាជាតិ និងរបស់អង្គការ OCDE វិភាគទៅលើការផលិត ការទិញប្រើប្រាស់ និងតម្រូវការក្នុងទីផ្សារពិភពលោក ផលប៉ះពាល់នៃការប្រែប្រួលអាកាសធាតុទៅលើផលិតកម្មកសិកម្ម ហើយនិងការកើនឡើងនៃចំនួនមនុស្ស នៅលើផែនដី។ នៅតំបន់ដើមបូព៌ា សង្រ្គាម ហើយនិងការធ្វេសប្រហែល ក្នុងការអនុវត្តនយោបាយគ្រប់គ្រងទឹក និងដីធ្វើកសិកម្ម កំពុងគំរាមកំហែងសុវត្ថិភាពស្បៀង របស់ប្រទេសនៅតំបន់ដើមបូព៌ា ដែលភាគច្រើនពឹងផ្អែកលើការនាំចូល ផលិតផលកសិកម្មពីបរទេស។
នៅថ្នាក់ពិភពលោក រាបយការណ៍កត់សំគាល់ផងដែរ តំរូវការទិញគ្រាប់ធញ្ញជាតិ សម្រាប់ធ្វើជាចំណីរបស់សត្វ បានកើនឡើងលឿន ខ្ពស់ជាងតម្រូវរបស់មនុស្ស។ ការកើនឡើងនៃការបរិភោគសាច់សត្វ នៅប្រទេសចិន ជាហេតុផលចំបងមួយ ដែលធ្វើឲ្យគេត្រូវ ការទិញ ផលិតផលកសិកម្ម សម្រាប់ កសិដ្ឋានចិញ្ចឹមសត្វយកសាច់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ