អាជ្ញាធរថៃសម្រុកជីងខួង រកច្រកចេញមួយទៀតឲ្យក្មេងដែលជាប់កុនក្នុងរូងភ្នំ
មួយថ្ងៃក្រោយ អតីតទាហានថៃ ម្នាក់ស្លាប់ ដោយសារអស់ខ្យល់អុកស៊ីសែន នៅក្នុងប្រតិបត្តិជួយសង្រ្គោះ កូនក្មេងក្នុងរូងភ្នំ អាជ្ញាធរថៃ ផ្លាស់ប្តូរ វិធីសាស្រ្ត ជួយសង្រ្គោះ ដោយបានសម្រុកសកម្មភាពជីកខួងពីលើភ្នំ ដើម្បី រកច្រកផ្លូវ ចូលទៅជួយសង្រ្គោះ កុមារទាំង១២នាក់ ហើយនិងគ្រូបង្វឹកបាល់ទាត់។ គិតមកត្រឹមថ្ងៃសៅរ៍ទី ៧កក្កដា ២០១៨ មានរយៈពេល២សប្តាហ៍ គត់ ដែលក្មេងទាំង១២រូប ព្រមទាំងគ្រូបង្ហាត់បាល់ទាត់ នៅជាប់គាំងក្នុងរូងភ្នំ ដែលជន់លិចដោយទឹកភ្លៀងរដូវវស្សា នៅក្នុងខេត្តឈៀងរ៉ៃ។
ចុះផ្សាយនៅថ្ងៃ៖ កែប្រែថ្ងៃទី៖
ក្នុងប្រតិបត្តិការ ជួយសង្រ្គោះ ក្នុងទ្រង់ទ្រាយដ៏ធំ មិនធ្លាប់មាន អាជ្ញាធរថៃបានប្រើប្រាស់ គ្រប់មធ្យោបាយ និងវិធីសាស្រ្ត ដើម្បី ជួយសង្រ្គោះ រំដោះយកក្មេងៗ ដែលកំពុងជាប់កុន ក្នុងរូងភ្នំ។ ប៉ុន្តែ នៅមួយថ្ងៃក្រោយ អ្នកមុជទឹកម្នាក់ ស្លាប់ នៅពេលហែលចេញពីក្នុងល្អាង អាជ្ញាធរថៃ ចង់ជៀសវាង ឲ្យខាងតែបាន មិនចង់ជួយ សង្រ្គោះ ក្មេងៗ តាមផ្លូវទឹក ដែលប្រថុយប្រថាន និងគ្រោះថ្នាក់ខ្លាំង។
អាជ្ញាធរថៃ នៅពេលនេះ ផ្តោតខ្លាំង ទៅលើការស្វែងរក ច្រកចូលថ្មី ដើម្បី ចូលទៅជួយ សង្រ្គោះ រំដោះយកក្មេង ពីក្នុងរូងភ្នំ។ នៅក្នុងសន្និសីទកាសែតនៅថ្ងៃនេះ លោកណារ៉ុងសាក់ អូសុទ្ធតាណាកន ប្រធានក្រុមសង្រ្គោះបន្ទាន់ បានបង្ហាញពីប្រតិបត្តិការជីកខួង ពីលើខ្នងភ្នំ ជាង១០០កន្លែង ដើម្បីរកច្រកចូល ទៅជិតកន្លែង ដែលក្មេងៗថៃ កំពុងនៅជាប់កុន ក្នុងរូងភ្នំ ថាមហ្លួង។ ច្រកខ្លះ ដែលគេខួងចូលទៅក្នុងរូងភ្នំ មានជម្រៅ ដល់ទៅ៤០០ម៉ែត្រ។ ប៉ុន្តែ គេវាយតម្លៃថា កន្លែងដែលក្មេងៗនៅជាប់កុន នោះ ស្ថិតនៅជម្រៅប្រមាណ ៦០០ម៉ែត្រ ក្នុងរូងភ្នំ។
តាមប្រធានក្រុមសង្រ្គោះបន្ទាន់ដដែល ដោយសារគេខ្វះខាត ផ្នែកបច្ចេកវិទ្យា តាំងពីលើខ្នងភ្នំ គេនៅមិនទាន់កំណត់បានទីតាំងពិតប្រាកដ របស់ក្មេងៗ នៅឡើយទេ។
នៅពេលគេរកឃើញ ក្រុមក្មេងបាល់ទាត់ ជាប់កុនក្នុងរូងភ្នំ អាជ្ញាធរថៃ បានសន្យា តខ្សែបណ្តាញទូរស័ព្ទដើម្បី ឲ្យក្មេងៗ អាចនិយាយទាក់ទងជាមួយ ឪពុកម្តាយ ដែលរង់ចាំដំណឹងយ៉ាងអន្ទះសារ នៅច្រកចូលរូងភ្នំ។ ប៉ុន្តែ ខ្សែទូរស័ព្ទ ដែលគេត្រូវរាយក្នុងរូងភ្នំ ក្រវិចក្រវៀន រាប់គីឡូម៉ែត្រ នៅតែមិនទាន់អាចចេញជារូបរាង។ នៅថ្ងៃនេះ នៅក្នុងសំបុត្រ សរសេរដោយផ្ទាល់ដៃរបស់ក្មេង សម្រាប់ឪពុកម្តាយ កីឡាករវ័យក្មេងរបស់ក្រុមជ្រូកព្រៃ បាននិយាយធានាប្រាប់ក្រុមគ្រួសារថា កុំឲ្យបារម្ភ និងថា ពួកគេមានសុខភាពល្អ។ នៅក្នុងរូបភាពវីដេអូ ថតដោយទាហានថៃ គ្រូបង្វឹកបាល់ទាត់អាយុ២៥ឆ្នាំ ដែលនៅជាប់គាំងជាមួយក្មេងៗទាំង១២នាក់ មានរូបរាងស្គម ដោយសារតែខ្លួនគេអាចបារម្ភ និងទម្លាក់កំហុស លើខ្លួនឯង ដែលជាអ្នកដឹកនាំក្មេងចូលក្នុងរូងភ្នំ នៅពេលទឹកលិច។ នៅក្នុងសំបុត្រ នៅថ្ងៃនេះ គ្រូបង្វឹកបាល់ទាត់ បានសរសេរសុំទោស គ្រប់ឪពុកម្តាយរបស់ក្មេង ចំណែកក្មេងទៀតបានសរសេរសន្យាថា នឹងត្រលប់ទៅជួយលក់ដូរឪពុកម្តាយវិញ បន្ទាប់ពី ឃ្លាតចេញពីផ្ទះ អស់ពីរសប្តាហ៍មកហើយ។
នៅពេលកំពស់ទឹកក្នុងល្អាង អាចចាប់កើនឡើងវិញ ដោយសារទឹកភ្លៀង ពេលវេលាជួយសង្រ្គោះ ក្មេងចេញពីក្នុងរូងភ្នំ មានកាន់តែខើច។ ទាក់ទងនឹងបញ្ហាខ្សត់ខ្យល់អុកស៊ីសែន ក្នុងរូងភ្នំវិញ ប្រធានក្រុមសង្រ្គោះបន្ទាន់បានអះអាងថា លោកបានបញ្ជាឲ្យកាត់បន្ថយចំនួនមនុស្សដែលគ្មានមុខការចាំបាច់ក្នុងល្អាង ចំណែកក្រុមជួយសង្រ្គោះ ត្រូវបាញ់បញ្ចូលខ្យល់បរិសុទ្ធដើម្បីធានាកម្រិតខ្យល់អុកស៊ីសែន នៅក្នុងរូងភ្នំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ