ថៃកំពុងបន្តប្រតិបត្តិការរំដោះក្មេង ៩នាក់ផ្សេងទៀតចេញពីរូងភ្នំ
នៅក្រោយរំដោះយកចេញដោយជោគជ័យ ក្មេងថៃ៤នាក់ ចេញពីរូងភ្នំ នៅយប់ថ្ងៃអាទិត្យម្សិលមិញ ក្រុមជួយសង្រ្គោះថៃ នឹងចាប់ផ្តើមនៅ ប៉ុន្មានម៉ោងខាងមុខ ប្រតិបត្តិការទៅរំដោះយកក្មេង៨នាក់ផ្សេងទៀត ហើយនិងគ្រូបាល់ទាត់របស់ពួកគេ ដែលនៅជាប់កុននៅឡើយក្នុងរូងភ្នំ។ ក្មេង៤នាក់ ដែលត្រូវបានគេជួយសង្រ្គោះយកចេញពីក្នុងរូងភ្នំ ត្រូវបានដឹកបញ្ជូនទៅកាន់មន្ទីរពេទ្យនៅខេត្តឈៀងរ៉ៃ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៥
ក្រុមជួយសង្រ្គោះថៃបាននិយាយថា ក្មេងថៃ៤នាក់ ដែលត្រូវបានរំដោះយកចេញពីក្នុងរូងភ្នំ កាលពីយប់ថ្ងៃអាទិត្យ មានសុខភាពរឹងមាំ។ ក្មេង៤នាក់ ត្រូវសង្រ្គោះយកចេញពីក្នុងរូងភ្នំដោយជោគជ័យ ប៉ុន្តែ នៅសល់៨នាក់ទៀត រួមទាំងគ្រូបង្វឹកបាល់ទាត់ម្នាក់ផង កំពុងនៅជាប់គាំងនៅឡើយនៅក្នុងរូងភ្នំ និងកំពុងរង់ចាំក្រុមជួយសង្រ្គោះ។ ក្រុមគ្រូពេទ្យថៃបាននិយាយប្រាប់អ្នកកាសែតថា គេរំដោះដំបូង ក្មេងណាដែលមានសុខភាពទន់ខ្សោយជាងគេ។
បន្ទាប់ពីរំដោះយកបានក្មេង៤នាក់ចេញពីក្នុងរូងភ្នំ ប្រតិបត្តិការរបស់ក្រុមជួយសង្រ្គោះថៃ បានផ្អាកនៅម៉ោង១០យប់ ម្សិលមិញ។ នៅក្នុងសន្និសីទកាសែត កាលពីថ្ងៃអាទិត្យ លោកណារ៉ុងសាក់ អូសុទ្ធតាណាកន ប្រធានអង្គភាពជួយសង្រ្គោះបន្ទាន់ បានបញ្ជាក់ថា ប្រតិបត្តិការជួយសង្រ្គោះក្មេង៨នាក់ផ្សេងទៀត ហើយនិងគ្រូបង្វឹកបាល់ទាត់ របស់ពួកគេ នឹងត្រូវចាប់ផ្តើម នៅ១០ម៉ោង ខាងមុខ។ អ្នកជួយសង្រ្គោះម្នាក់បាននិយាយប្រាប់កាសែតថៃ បាងកកប៉ុស្តិ៍ ថា ក្រុមជួយសង្រ្គោះត្រូវបានប្រាប់ឲ្យត្រៀមខ្លួនត្រលប់ទៅរំដោះក្មេង នៅម៉ោង៨ព្រឹកថ្ងៃចន្ទនេះ។
តាមប្រធានអង្គភាពជួយសង្រ្គោះ ក្នុងពេលមួយយប់ថ្ងៃអាទិត្យ គេត្រូវការបំពេញដបអុកស៊ីសែនរបស់អ្នកមុជទឹក ដែលត្រូវធ្វើដំណើរត្រលប់ទៅជួយ រំដោះយកក្មេងផ្សេងទៀត ពីក្នុងរូងភ្នំ។ នៅក្នុងប្រតិបត្តិការចូលទៅជម្លៀសយកក្មេងចេញពីក្នុងរូងភ្នំ ម្សិលមិញ មានការចូលរួមពីអ្នកមុជទឹកជំនាញ បរទេស ៥០នាក់ ហើយនិងជនជាតិថៃ ៤០នាក់។ នៅយប់ថ្ងៃអាទិត្យ ក្មេងថៃ ៤រូប ត្រូវបានគេរំដោះយកចេញពីក្នុងរូងភ្នំ មុនម៉ោងដែលគេបានប៉ាន់ស្មានទុកដល់ទៅ ២ម៉ោង។ ប្រធានក្រុមជួយសង្រ្គោះថៃ លោក ណារ៉ុងសាក់ បានហៅប្រតិបត្តិការរំដោះក្មេងបានឆាប់លឿនជាងការគ្រោងទុក ថា ជាស្នាដៃឯករបស់ក្រុមអ្នកជួយសង្រ្គោះ។
អ្នកជំនាញមុជទឹក បរទេសមួយចំនួន ដែលបានផ្តល់បទសម្ភាសន៍ដល់ទូរទស្សន៍អង់គ្លេស BBC បានព្រមានថា ប្រតិបត្តិការរំដោះយកក្មេងដែលនៅសល់នៅក្នុងរូងភ្នំ អាចនឹងមិនងាយស្រួល ហើយនិងឆាប់រហ័ស ដូចកាលពីថ្ងៃអាទិត្យ។ អ្វីៗគឺអាស្រ័យទៅលើស្ថានភាពទឹក នៅក្នុងល្អាង ដែលនឹងអាចប្រែប្រួល កើនខ្ពស់ឡើងវិញ ដោយសារភ្លៀងវស្សា ដែលនឹងចាប់ធ្លាក់ជោគជាំ ចាប់ពីថ្ងៃចន្ទនេះ រហូតដល់ថ្ងៃព្រហស្បតិ៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ