ហេតុអ្វីបានជាមានប្រជាជនជប៉ុនស្លាប់ច្រើន នៅក្នុងទឹកជំនន់ ទឹកភ្លៀងលើកនេះ?
ចំនួន អ្នកស្លាប់ដោយសារគ្រោះធម្មជាតិទឹកជំនន់ នៅភាគខាងលិចជប៉ុន បានកើនឡើង ដល់ជាង១០០នាក់។ តាមកាសែតក្នុងស្រុកជប៉ុន ចុះផ្សាយនៅថ្ងៃចន្ទនេះ លោកនាយករដ្ឋមន្រ្តី លោកស៊្ហីនហ្សូ អាបេ បានសម្រេចលុបចោលទស្សនកិច្ចរបស់លោកទៅអឺរ៉ុប និងដើមបូព៌ា ដើម្បីនៅជិតប្រជាជនជប៉ុន ដែលកំពុងរងគ្រោះខ្លាំង មិនធ្លាប់មាន ដោយសារគ្រោះទឹកជំនន់ ទឹកភ្លៀង តាំងពីថ្ងៃសុក្រ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២១
រដ្ឋាភិបាលជប៉ុនបានអះអាងថា យ៉ាងហោចណាស់ មនុស្ស១០៣ នាក់បានស្លាប់នៅក្នុងគ្រោះមហន្តរាយទឹកជំនន់នៅភាគខាងលិចប្រទេសជប៉ុន។ តួលេខនេះនឹងអាចកើនឡើង ច្រើនជាងនេះ ព្រោះថា នៅមានមនុស្សច្រើនទៀត ដែលកំពុងនៅបាត់ខ្លួននៅឡើយ។ តាមអ្នកនាំពាក្យរបស់រដ្ឋាភិបាលជប៉ុន ក្រុមជួយសង្រ្គោះប្រមាណ ៧៣ ០០០នាក់ ដែលមានតាំងប៉ូលិស ក្រុមពន្លត់អគ្គិភ័យ ហើយនិងកងទ័ពជប៉ុន កំពុងស្វែង រុករក មនុស្សដែលបាត់ខ្លួន នៅតំបន់លិចទឹក។
ប្រឈមនឹងស្ថានភាពធ្ងន់ធ្ងរ ដោយសារតែគ្រោះមហន្តរាយទឹកជំនន់នៅក្នុងប្រទេស នាយករដ្ឋមន្រ្តីជប៉ុន លោកស្ហ៊ីនហ្សូ អាបេបានសម្រេចលុបចោលទស្សនកិច្ចរបស់លោក ដែលត្រូវចាប់ផ្តើមតាំងពីថ្ងៃពុធ នៅប្រទេសបារាំង ប៊ែលហ្សិក អារ៉ាប៊ី សាអូឌីត ហើយនិងនៅអេហ្ស៊ីប។
ជប៉ុនឧស្សាហ៍ជួបប្រទះ គ្រោះមហន្តរាយធម្មជាតិ ធំៗ ដែលមានតាំងពីខ្យល់ព្យុះ គ្រោះរញ្ជួយដី រលកយក្សស៊ូណាមី ឬផ្ទុះភ្នំភ្លើង។ ប៉ុន្តែ ហេតុអ្វី បានជាលើកនេះ គ្រាន់តែទឹកភ្លៀងបីថ្ងៃសោះ អាចបង្កឲ្យមានមនុស្សស្លាប់ច្រើនបែបនេះ? ភូមិសាស្រ្ត អាកាសធាតុ ហើយនិងទម្លាប់រស់នៅរបស់ប្រជាជនជប៉ុន ជាកត្តារួមចំណែកធ្វើឲ្យប្រជាជនរងគ្រោះស្លាប់ច្រើន នៅក្នុងគ្រោះទឹកជំនន់ទឹកភ្លៀង លើកនេះ។ តាមអ្នកព្យាករឧតុនិយមជប៉ុន ខ្យល់ព្យុះទីហ្វុង ដែលនាំមកជាមួយនឹងទឹកភ្លៀង ធ្លាក់ខ្លាំង ត្រូវបោកបក់យ៉ាងតិច ៦ដង លើប្រជុំកោះ ជប៉ុន ពី ខែកក្កដា រហូតដល់ខែតុលា។ ប៉ុន្តែ លើកនេះ នៅក្នុងរយៈពេលតែ ៣ថ្ងៃ បរិមាណទឹកភ្លៀងធ្លាក់មានច្រើន ដែលមិនធ្លាប់មានពីមុនមក។
នៅប៉ុន្មានថ្ងៃនេះ នៅពេលទឹកភ្លៀង ចាប់បង្អុរមិនឈប់ រដ្ឋាភិបាលជប៉ុនបានចេញបញ្ជាឲ្យជម្លៀសមនុស្ស ដែលបានកើនឡើងដល់៥លាននាក់ នៅភាគខាងលិចប្រទេស។ ប៉ុន្តែ គេវាយតម្លៃថា ចំនួនមនុស្សស្លាប់ច្រើន នៅក្នុងគ្រោះមហន្តរាយទឹកជំនន់លើកនេះ ដោយសារតែ បទបញ្ជារជម្លៀសមនុស្សរបស់រដ្ឋាភិបាល គ្មានលក្ខណៈចាប់បង្ខំ ឬយឺតពេល ព្រោះថា នៅពេលទឹកភ្លៀងឡើងជន់ខ្លាំងហើយនោះ មនុស្សជាច្រើនបានសម្រេចនៅផ្ទះទៅវិញ ជាជាងធ្វើដំណើរកាត់ទឹកដែលហូរខ្លាំង។ បើមើលទៅលើទីតាំងភូមិសាស្រ្តរបស់កន្លែងដែលលិចទឹកខ្លាំង ផ្ទះ របស់ប្រជាជន សង់ភាគច្រើននៅតំបន់ទំនាប ដែលអាចងាយរងគ្រោះដោយសារទឹកជំនន់។ ផ្ទះភាគច្រើន របស់ប្រជាជនជប៉ុន នៅតាមជនបទ ធ្វើឡើងពីឈើ ដើម្បីងាយទប់ទល់នឹងគ្រោះរញ្ជួយដី ប៉ុន្តែ ក៏ផុយស្រួយ និងគ្រោះថ្នាក់ណាស់ដែរសម្រាប់ជីវិតមនុស្ស នៅពេលមានគ្រោះទឹកជំនន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ