ពាណិជ្ជកម្ម៖ហេតុអ្វីបានជាសំណល់ពាណិជ្ជកម្មចិនជាមួយអាមេរិកមានកំណើនខ្ពស់?
នៅថ្ងៃសុក្រ ទី១៣ កក្កដានេះ អគ្គនាយកដ្ឋានពន្ធដារចិនបានផ្សព្វផ្សាយតួលេខប្រចាំខែស្តីពីសកម្មភាពពាណិជ្ជកម្មរវាងចិន និងអាមេរិក។ តួលេខប្រចាំខែមិថុនាកន្លងទៅបានបង្ហាញឲ្យឃើញពីសំណល់ពាណិជ្ជកម្មចិនជាមួយអាមេរិកដែលមានទឹកប្រាក់ដល់ទៅ ២៨ ៩៧០លានដុល្លារ ពោលច្រើនជាងខែឧសភាដែលមាន ២៤ ៥៨០លានដុល្លារ។ កំណើនសំណល់ពាណិជ្ជកម្មចិនជាមួយអាមេរិកឡើងខ្ពស់ក៏ដោយសារតែមានកំណើនការនាំទំនិញចិនចេញទៅអាមេរិក។ តួលេខថ្មីនេះនឹងរឹតតែធ្វើឲ្យទំនាក់ទំនងពាណិជ្ជកម្មរវាងចិន និងអាមេរិកដែលកំពុងតានតឹងខ្លាំងកាន់តែដុនដាបថែមទៀត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២០
តួលេខថ្មីស្តីពីកំណើនសំណល់ពាណិជ្ជកម្មចិនមានជាមួយអាមេរិកពេលនេះបានធ្លាក់មក ១សប្តាហ៍ក្រោយពីរដ្ឋបាលអាមេរិកបានសម្រេចដំឡើងពន្ធ ២៥% លើទឹកប្រាក់សរុប ៣៤ ០០០លានដុល្លារនៃការនាំទំនិញចិនចូលអាមេរិក។ ជាការឆ្លើយតបវិញភ្លាមៗ រដ្ឋាភិបាលចិនបានដំឡើងពន្ធលើទំនិញអាមេរិកនាំចូលចិនក្នុងអត្រា និងទឹកប្រាក់ដូចគ្នា។ បន្ទាប់មកក្នុងថ្ងៃអង្គារ ទី១០ កក្កដា រដ្ឋបាលអាមេរិកបានបន្ថែមឈ្មោះទំនិញចិនដែលត្រូវដំឡើងពន្ធក្នុងកម្រិត ២៥% ដូចគ្នាលើទឹកប្រាក់សរុប ២០០ ០០០លានដុល្លារ។
បន្ទាប់មកទៀត លោកប្រធានាធិបតីអាមេរិកដូណាល់ ត្រាំដែលបានស្នើចិនឲ្យកាត់បន្ថយសំណល់ពាណិជ្ជកម្មជាមួយអាមេរិកថែមទាំងព្រមានថាក្នុងពេលដ៏ខ្លីខាងមុខ គឺទឹកប្រាក់ជាង ៥០០ ០០០លានដុល្លារនៃការនាំទំនិញចិនចូលអាមេរិកទាំងស្រុងតែម្តងដែលលោកនឹងដំឡើងពន្ធបន្ថែម។ ឃើញថា តួលេខថ្មីស្តីពីកំណើនសំណល់ពាណិជ្ជកម្មចិនមានជាមួយអាមេរិកពេលនេះនឹងធ្វើឲ្យសង្រ្គាមពាណិជ្ជកម្មរវាងមហាអំណាចសេដ្ឋកិច្ចក្នុងលោកទាំងពីរធ្លាក់ដុនដាបកាន់តែខ្លាំង។
គិតត្រឹមឆមាសទី១ ឆ្នាំ ២០១៨ សំណល់ពាណិជ្ជកម្មចិនជាមួយអាមេរិកមានទឹកប្រាក់ ១៣៣ ៧៦០លានដុល្លារ ហើយពេញ ១ឆ្នាំ ២០១៧ កន្លងទៅ គឺមានទឹកប្រាក់ ៣៧៥ ២០០លានដុល្លារ។ កំណើនសំណល់ពាណិជ្ជកម្មចិនជាមួយអាមេរិកបានមកពីកំណើននៃការនាំទំនិញចិនចេញទៅអាមេរិក។ តែគេសង្ឃឹមថា ជាមួយនឹងចំណាត់ការដំឡើងពន្ធរបស់រដ្ឋបាលអាមេរិក កំណើននៃការទំនិញចិនចូលអាមេរិកអាចនឹងធ្លាក់ចុះបន្តិចមកវិញក្នុងឆមាសទី២ ឆ្នាំ ២០១៨ ដដែល។ បើនិយាយជាលក្ខណៈសកលវិញ ការនាំទំនិញចិនចេញទៅបរទេសបានកើន ១២,៨% ក្នុងចន្លោះពីខែមករា ដល់ខែមិថុនា ឆ្នាំ ២០១៨ ចំណែកការនាំចូលទំនិញពីបរទេសវិញបានកើន ១៩,៩% ក្នុងរយៈពេលដូចគ្នា។
ក្នុងសប្តាហ៍នេះ និងដើម្បីប្រឆាំងវាយបកដាក់អាមេរិក រដ្ឋាភិបាលចិនបានលើកទឹកចិត្តដល់ក្រុមហ៊ុន រោងចក្រក្នុងស្រុកដែលធ្លាប់ទិញផលិតផលពីអាមេរិកឲ្យបង្វែរទៅទិញពីប្រទេសផ្សេងវិញ ពិសេសប្រទេសនៅអាស៊ីដោយសុខចិត្តទម្លាក់តម្លៃពន្ធនាំចូលលើផលិផលមួយចំនួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ