ប្រធានាធិបតីចិនបរិហាររឿងអាស្រូវថ្នាំវ៉ាក់សាំងគ្មានគុណភាព
លោក ប្រធានាធិបតីចិន ស៊ី ជីនពីង បានចេញសេចក្តីអំពាវនាវ នៅថ្ងៃចន្ទនេះ ឱ្យអាជ្ញាធរពាក់ព័ន្ធដាក់គំនាបឱ្យធ្ងន់ធ្ងរបំផុត ប្រឆាំងនឹងក្រុមហ៊ុនឱសថណាដែលផលិតថ្នាំបន្លំ គ្មានគុណភាព។ សម្រាប់លោកប្រធានាធិបតីនេះជាទង្វើដ៏សាហាវអាក្រក់ណាស់។ ប្រតិកម្មរបស់លោក ស៊ី ជីនពីង ធ្លាក់មកក្នុងខណៈដែលចិនកំពុងជួបរឿងអាស្រូវថ្មីមួយទៀត បង្កឡើងដោយក្រុមហ៊ុនផលិតថ្នាំវ៉ាក់សាំងដ៏ធំលំដាប់ទីពីរក្នុងប្រទេស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០២
រឿងអាស្រូវក្រុមហ៊ុន Changchun Changsheng Biotechnology ផលិតថ្នាំបង្ការជំងឺឆ្កែឆ្កួតគ្មានគុណភាព បាននិងកំពុងបន្តខ្ចរខ្ចាយ រីករាលដាលយ៉ាងលឿនតាមបណ្តាញសង្គម ដូចទឹកបាក់ទំនប់ ទោះក្រុមសមត្ថកិច្ចចង់បិទខ្ទប់ លុបចោលយ៉ាងណាក៏មិនអស់។ សន្ធឹកនៃរឿងអាស្រូវ បានជំរុញឱ្យលោកស៊ីជីនពីង បញ្ចេញប្រតិកម្មនៅចន្ទនេះ ពីទ្វីបអាហ្វ្រិក ទីដែលកំពុងបំពេញទស្សនកិច្ចរហូតដល់ចុងសប្តាហ៍។ សម្រាប់លោកប្រធានាធិបតី ការរំលោភច្បាប់និងវិធាននៃការផលិតថ្នាំវ៉ាក់សាំង ជាអំពើដ៏សាហាវ និងគួរព្រឺរន្ធត់ខ្លាំងណាស់ ! ដូច្នេះអាជ្ញាធរ និងសមត្ថកិច្ចពាក់ព័ន្ធ ត្រូវតែចាត់វិធានការនិងបើកអង្កេតភ្លាម ដើម្បីវែករកមុខអ្នកទទួលខុសត្រូវ មកដាក់ទោសឱ្យធ្ងន់ ទៅតាមច្បាប់។
អ្នកទទួលត្រូវជាន់ខ្ពស់របស់ក្រុមហ៊ុនចំនួន៥នាក់ ក្នុងនោះម្នាក់ជាអគ្គនាយកផង ត្រូវបានឃាត់ខ្លួនយកសួរចម្លើយ។ នេះបើតាមការជូនដំណឹងរបស់ប៉ូលិសខេត្តឆង់ជុន Changchun (ក្រុងប៉ែកឦសានប្រទេស) នៅថ្ងៃចន្ទនេះ។
ក្រុមហ៊ុន Changchun Changsheng Biotechnology ក៏បានទទួលបញ្ជាឱ្យបញ្ឈប់ការផលិតថ្នាំវ៉ាក់សាំងប្រឆាំងនឹងឆ្កែឆ្កួត តាំងពីពេលត្រួតពិនិត្យឃើញមានទិន្នន័យបន្លំ និងបញ្ហាគុណភាពភ្លាម។ នេះបើតាមសេចក្តីប្រកាស អាជ្ញាធរគ្រប់គ្រងឱសថនិងចំណីអាហារចិន កាលពីថ្ងៃអាទិត្យ ដោយធានាអះអាងទៀតថា ថ្នាំវ៉ាក់សាំងគ្មានគុណភាពនោះមិនបាន ចេញពីរោងចក្រទេ។ ប៉ុន្តែទូរទស្សន៍ជាតិបានជូនដំណឹងផ្ទុយទៅវិញថា មានថ្នាំបង្ការចំនួន២៥ម៉ឺនដូស បានដាក់លក់នៅខេត្តShandong ភាគខាងកើតប្រទេស។
សូមបញ្ជាក់ថា មិនមែនជាការកម្រឡើយ ដែលចិនជួបរឿងអាស្រូវសុខភាព ផលិតថ្នាំគ្មានគុណភាព និងចំណីអាហារគ្មានសុវត្ថិភាពនោះ។ រឿងអាស្រូវបែបនេះ តែងតែបំផុសឱ្យមតិសាធារណៈព្រួយបារម្ភ និងខឹងសម្បារយ៉ាងខ្លាំង។ រឿងអាស្រូវថ្នាំវ៉ាក់សាំងគ្មានគុណភាព ដូចគ្នានេះ បានផ្ទុះឡើងម្តងហើយកាលពីឆ្នាំ២០១៦ នៅខេត្តចាន់ដុង។ កាលណោះមានថ្នាំបង្ការហួសថ្ងៃកំណត់ប្រើប្រាស់ និងរក្សាទុកមិនត្រឹមត្រូវរាប់ពាន់ដូសក្នុងតម្លៃទឹកប្រាក់រាប់សិបលានដុល្លារ ត្រូវបានលក់ឱ្យសាធារណជនប្រើប្រាស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ