ព្យុះសង្ឃរាដ៏កាចសាហាវមួយតម្រង់ទិសទៅកាន់តំបន់រងមហន្តរាយនៅភាគខាងលិចប្រទេសជប៉ុន
“ព្យុះសង្ឃរាដ៏សែនសហាវបំផុតមួយ កំពុងតម្រង់ទិសទៅកាន់តំបន់ភាគខាងលិចប្រទេសជប៉ុន-តំបន់ដែលត្រូវទទួលរងមហន្តរាយរួចមកហើយកាលពីដើមខែកក្កដានេះ ដោយសារតែ ទឹកភ្លៀងធ្លាក់ទាំងមេៗ- ទឹកជំនន់ និងការបាក់ដីសម្លាប់មនុស្ស"-នេះជាការព្រមានប្រាប់របស់ទីភ្នាក់ងារឧតុនិយមជប៉ុនកាលពីម្សិលមិញ។
ចុះផ្សាយនៅថ្ងៃ៖
ស្តាប់ - ០២:០៧
ព្យុះសង្ឃរាដ៏កាចសហាវបំផុតមួយឈ្មោះ Jongdari ដែលជាព្យុះរដូវលើកទី១២នៅតំបន់អាស៊ី នឹងត្រូវបោកបក់ទៅដល់កោះដ៏សំខាន់មួយរបស់ជប៉ុនឈ្មោះ Honshu នៅយប់ថ្ងៃសៅរ៍នេះ-នេះជាការបញ្ជាក់របស់ឧតុនិយមជប៉ុន។
ព្យុះសង្ឃរានេះ នៅរសៀលម្សិលមិញ បានស្ថិតនៅចម្ងាយប្រមាណតែ១ពាន់គីឡូម៉ែតប៉ុណ្ណោះពីទីក្រុងតូក្យូនិង ចម្ងាយ ២០០គ.ម ពីកោះ Chichijima។ ក៏ប៉ុន្តែព្យុះសង្ឃរានេះ ដោយមិនបន្តដំណើរទៅទិសឥសាន្ត អាចនឹងតម្រង់ទៅទិសពាយ័ព្យវិញ ហើយនឹងវាយលុកទៅលើភាគកណ្តាលនិងខាងលិចប្រទេសជប៉ុននៅចុងសប្តាហ៍នេះ។
អ្នកជំនាញឧត្តុនិយមជប៉ុនវិញ បានព្រមានប្រាប់ថា នឹងមាន ទឹកភ្លៀងធ្លាក់យ៉ាងខ្លាំងក្លា ការបាក់ស្រុតដី កម្លាំងខ្យល់បោកបក់ដ៏កាចសាហាវនិងមានរលកខ្ពស់ៗទៀតផង ដោយបានអំពាវនាវសុំអោយប្រជាជនខ្លួន ជម្លៀសចេញពីតំបន់ទឹកខាងលើ។
គួររំលឹកថា កាលពីដើមខែកក្កដានេះ តំបន់មួយភាគធំនៃប៉ែកខាងលិចប្រទេសជប៉ុន បានទទួលរងមហន្តរាយដោយសារទឹកជំនន់ដ៏គួរអោយខ្លាចជាទីបំផុត ជាអាទិ៍ ការហូរល្បប់ភក់ដែលបានសម្លាប់មនុស្សប្រមាណជា ២២០នាក់។
យោងទៅលើមហន្តរាយធម្មជាតិនៅដើមខែកក្កដានេះ អ្នកជំនាញក្រសួងឧតុនិយមជប៉ុន បានប្រមើលទុកជាថ្មីទៀ់តថា “ទឹកភ្លៀងនឹងធ្លាក់យ៉ាងកាចសាហាវបំផុត ហើយប្រជាជន ត្រូវតែមានភាពដ៏ប្រុងប្រយ័ត្នខ្ពស់ជានិច្ច"។ អ្នកជំនាញជប៉ុនដដែល បានបញ្ជាក់ទៀតថា នៅក្នុងតំបន់ដែលធ្លាប់ទទួលរងនូវមហន្តរាយ បើទោះបីជាមានភ្លៀងធ្លាក់ធម្មតាក៏ដោយ ក៏អាចនឹងជំរុញអោយមានការខូចខាតយ៉ាងសន្ធឹកសន្ធាប់ដែរដោយសារទឹកជំនន់និងការបាក់ដី។ នៅ Kumano តំបន់រងមហន្តរាយមួយនៅខេត្ត Hiroshima ត្រូវបានក្រសួងឧត្តុនិយមជប៉ុន រៀបចំដាក់បណ្តាញឧឃោសនស័ព្ទនៅគ្រប់ទិសទីក្នុងតំបន់សម្រាប់ប្រកាសជូនដំណឹងនានាដល់ប្រជាជន។ ទន្ទឹមនេះ អាជ្ញាធរតំបន់ បានអំពាវនាវផងដែរ សុំ ឲ្យប្រជាជន ស្ថិតនៅអោយឆ្ងាយពីតំបន់លំនៅដ្ឋានដែលត្រូវបានរងមហន្តរាយខ្លះៗរួចមកហើយ ពីព្រោះ យោងតាមអាជ្ញាធរ គឺជាតំបន់មួយដែលអាចនឹងងាយរងគ្រោះជាទីបំផុត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ