អាមេរិកដាក់ទណ្ឌកម្មលើមេបញ្ជាការកងទ័ពភូមាពីបទចូលរួមបោសសំអាតជនជាតិរ៉ូហ៊ីងយ៉ា
នៅថ្ងៃសុក្រ ទី១៧ សីហា អាមេរិកបានដាក់ទណ្ឌកម្មលើមេបញ្ជាការកងទ័ពភូមាចំនួន ៤នាក់ និងអង្គភាពកងទ័ពចំនួន ២កងពលពីបទបានចូលរួមប្រើអំពើហិង្សាបោសសំអាតជនជាតិភាគតិចរ៉ូហ៊ីងយ៉ាអ្នកកាន់សាសនាអ៊ីស្លាមរស់ក្នុងទឹកដីភូមា។ វិធានការទណ្ឌកម្មនេះត្រូវបានប្រកាសដោយរដ្ឋមន្រ្តីក្រសួងសេដ្ឋកិច្ចអាមេរិកតាមរយៈសេចក្តីប្រកាសព័ត៌មានមួយ។ សូមជម្រាបជូនថា អង្គការសហប្រជាជាតិក៏ធ្លាប់បានចាត់ទុកអំពើហិង្សាលើពួករ៉ូហ៊ីងយ៉ាថាជាទង្វើបំបាត់ពូជសាសន៍រ៉ូហ៊ីងយ៉ា តែត្រូវបានរដ្ឋអំណាចភូមាបដិសេធជានិច្ច។
ចុះផ្សាយនៅថ្ងៃ៖
ស្តាប់ - ០១:៥៨
មេបញ្ជាការភូមាទាំង ៤រូបដែលស្ថិតក្នុងផ្ទាំងស៊ីបទណ្ឌកម្មរបស់អាមេរិករួមមាន លោក Aung Kyaw Zaw លោក Khin Maung Soe លោក Khin Hlaing និងលោក Thura San Lwin រួមទាំងកងអង្គភាពចំនួន ២កងពលផងដែរ។ ក្រៅពីដៅចំឈ្មោះមេបញ្ជាកងទ័ពភូមាទាំង ៤រូប រួមទាំងកងអង្គភាពភូមាទាំងពីរកងពល រដ្ឋមន្រ្តីក្រសួងសេដ្ឋកិច្ចអាមេរិកបានថ្លែងជាលក្ខណៈទូទៅថា កម្លាំងសន្តិសុខភូមាបានចូលរួមនៅក្នុងអំពើហិង្សាប្រឆាំងលើជនជាតិភាគតិចនៅទូទាំងប្រទេសភូមា។ អំពើហិង្សាទាំងអស់រួមមាន ការបោសសំអាតជាតិពិន្ធុ ការសម្លាប់រង្គាល ការបំពានលើផ្លូវភេទ ការប្រហារជីវិតក្រៅប្រព័ន្ធតុលាការ និងការរំលោភសិទ្ធិមនុស្សតាមវិធីផ្សេងៗទៀតនៅក្នុងរដ្ឋរ៉ាក់ឃីន។
ជាតិពិន្ធុដែលទីក្រុងវ៉ាស៊ីនតោនចង់និយាយផ្តោតខ្លាំងជាងគេ គឺពួករ៉ូហ៊ីងយ៉ាអ្នកកាន់សាសនាអ៊ីស្លាមដែលរស់នៅក្នុងរដ្ឋរ៉ាក់ឃីន និងដែលពួកគេកំពុងបន្តទទួលរងការធ្វើទុក្ខបុកម្នេញខ្លាំងជាងគេពីរដ្ឋអំណាចភូមា។ ចន្លោះខែសីហា និងខែធ្នូ ឆ្នាំ ២០១៧ មានពួករ៉ូហ៊ីងយ៉ាជាង ៧០០ ០០០នាក់បានរត់ភៀសខ្លួនទៅរស់នៅក្នុងប្រទេសបង់ក្លាដែសក្បែរខាង ក្រោយពីកងទ័ពភូមាបានបើកការវាយប្រហារសងសឹកលើក្រុមឧទ្ទាមរ៉ូហ៊ីងយ៉ាដែលបានធ្វើការវាយឆ្មក់លើប៉ូស្តិ៍ប៉ូលិសភូមាក្នុងរដ្ឋរ៉ាក់ឃីន។ អង្គការសហប្រជាជាតិបានចាត់ទុកប្រតិបត្តិការសឹករបស់កងទ័ពភូមាកាលណោះថាជាការបោសសំអាតជនជាតិភាគតិចរ៉ូហ៊ីងយ៉ា តែរដ្ឋអំណាចភូមាតែងចេញមុខបដិសេធ។
យ៉ាងណាក៏ដោយ ក្រសួងសេដ្ឋកិច្ចអាមេរិកបានបញ្ជាក់ថា គេត្រូវតែរកយុត្តិធម៌ឲ្យជនរងគ្រោះ ហើយអ្នកដែលបានប្រព្រឹត្តអំពើឃោរឃៅត្រូវតែទទួលទោស។ ទណ្ឌកម្មរបស់ក្រសួងសេដ្ឋកិច្ចអាមេរិកលើមេបញ្ជាកងទ័ពភូមាទាំង ៤រូបនឹងអនុញ្ញាតឲ្យរដ្ឋបាលអាមេរិករឹបអូស ឬបង្កកទ្រព្យសម្បត្តិរបស់មេបញ្ជាការកងទ័ពភូមាទាំង ៤នាក់នោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ