ភូមា ៖ មួយឆ្នាំក្រោយការរត់ភៀសខ្លួន ជោគវាសនារ៉ូហ៊ីងយ៉ា នៅតែងងឹតឈឹង
នៅថ្ងៃទី ២៥សីហានេះ ជាគម្រប់ខួបមួយឆ្នាំគត់ដែលជនរ៉ូហ៊ីងយ៉ាបានចាប់ផ្តើមរត់ភៀសទាំងហ្វូងៗគេចពីការបង្ក្រាបធ្វើបាបនៅភូមា។ មួយឆ្នាំក្រោយជោគវាសនារបស់ជនជាតិភាគតិចកាន់សាសនាអ៊ីស្លាមនេះ នៅតែគ្មានពន្លឺ ! ពួកគេត្រូវរស់ក្នុងជំរំជនភៀសខ្លួន នៅតាមព្រំដែនក្នុងទឹកដីបង់ក្លាដែស ជំនួយហិរញ្ញវត្ថុកាន់តែស្តួចស្តើងទៅៗ ហើយកិច្ចព្រមព្រៀងធ្វើមាតុភូមិនិវត្តន៍ ត្រូវជាប់គាំងស្តូក។
ចុះផ្សាយនៅថ្ងៃ៖
ស្តាប់ - ០២:១៧
ថ្ងៃទី ២៥សីហា ២០១៧ ក្រោយការវាយប្រហារលើប៉ុស្តិ៍ត្រួតពិនិត្យ ភូមា ពីសំណាក់ពួកឧទ្ទាមរ៉ូហ៊ីងយ៉ា យោធាភូមា បានចាប់បើកយុទ្ធនាការបង្ក្រាបសហគមន៍ ជនជាតិភាគតិច កាន់សាសនាអ៊ីស្លាមមួយនេះ ដោយគ្មានប្រណី និងក្នុងទ្រង់ទ្រាយធំមិនធ្លាប់មាន រហូតដល់អង្គការសហប្រជាជាតិប្រើពាក្យថា “ជាការបោសសម្អាតជាតិពិន្ធុ”។
ជនរ៉ូហ៊ីងយ៉ាសរុបប្រមាណជិត៧សែននាក់ បាននាំគ្នារត់ភៀសខ្លួននិងទៅជ្រកកោន នៅក្នុងជំរំបណ្តោះអាសន្នដ៏ធំមួយនៅតំបន់Cox’s Bazar របស់បង់ក្លាដែសដែលជាប្រទេសដ៏ក្រីក្របំផុតមួយលើលោក។ ក្រោមគំនាបនិងអន្តរាគមន៍របស់សហគមន៍អន្តរជាតិ ភូមាបានសន្យាទទួលយកជនភៀសខ្លួនរ៉ូហ៊ីងយ៉ាត្រលប់ទៅកាន់ភូមិកំណើតវិញ និងបានចុះកិច្ចព្រមព្រៀងជាមួយបង់ក្លាដែស កាលពីខែមករាដើមឆ្នាំ។ ប៉ុន្តែ៨ខែក្រោយមក មានជនរ៉ូហ៊ីងយ៉ាប្រមាណ២០០នាក់បានត្រលប់ចូលស្រុកវិញ ឯកិច្ចព្រមព្រៀងធ្វើមាតុភូមិនិវត្តន៍ហាក់បានស្លាប់បាត់ឈឹង។
លោកស្រី អ៊ុងសានស៊ូជី ដែលរងការរិះគន់យ៉ាងខ្លាំងពីគ្រប់មជ្ឈដ្ឋាន ចំពោះចំណាត់ការប្រឆាំងនឹងជនជាតិភាគតិចនេះ បានទម្លាក់ទំនួលខុសត្រូវ កាលពីសប្តាហ៍មុន ទៅលើរដ្ឋាភិបាលបង់ក្លាដែស ថាជាអ្នកធ្វើឱ្យកិច្ចព្រមព្រៀងបរាជ័យ ព្រោះមិនចេះសម្រេចឱ្យឆាប់រហ័ស កំណត់ឈ្មោះជនណាត្រូវត្រលប់ទៅភូមាវិញ។
តាមការពិត ភាពយឺតយ៉ាវ និងការប្រើភាសាបែបការទូតរបស់ភូមា បានធ្វើឱ្យជនភៀសខ្លួនរ៉ូហ៊ីងយ៉ាកាន់តែភ័យខ្លាចអំពើហិង្សាពេលត្រលប់វិញ។ ហេតុដូច្នេះហើយបានជាពួកគេពិបាកសម្រេចចិត្ត និងចង់បានការធានាអះអាងជាមុន ថាតើពួកគេនឹងទទួល កា បានសំណងជំងឺចិត្តហិរញ្ញវត្ថុប៉ុន្មានចំពោះការបាត់បង់ដីធ្លី ដែលដុតបំផ្លាញដោយពួកយោធា ហើយអាចមានសិទ្ធិទទួលសេវាសិក្សា សុខាភិបាលប៉ុណ្ណា ...
ក្នុងពេលរង់ចាំ ជីវិតក្នុងជំរំកាន់តែលំបាកឡើងៗ។ តម្រូវការផ្នែកថវិកាកាន់តែខ្ពស់ ជំងឺរាតត្បាតមានកាន់តែច្រើន ឯថវិកាមានកាន់តែតិចទៅៗ។ កាលពីខែមីនា អង្គការសហប្រជាជាតិបានប្រកាសកម្មវត្ថុប្រមូលមូលនិធិ១ពាន់លាន តែសម្រេចបានតែមួយភាគបីប៉ុណ្ណោះ។ នៅខែមិថុនា ធនាគារពិភពលោក ថានឹងបញ្ចេញជំនួយជិតកន្លះពាន់លានសម្រាប់ជួយជនភៀសខ្លួននៅបង់ក្លាដែស។
សម្ពាធអន្តរជាតិ កំពុងបន្តដាក់លើភូមា។ សហរដ្ឋអាមេរិកទើបដាក់ទណ្ឌកម្មលើមេបញ្ជាការយោធាបួននាក់ និងលើកងយោធាភូមាពីផ្នែកពីបទប្រើអំពើហិង្សាបែបកំចាត់កំចាយពូជសាសន៍។ អង្គការសហប្រជាជាតិនឹងត្រូវជួបប្រជុំគ្នាអំពីបញ្ហានេះនៅសប្តាហ៍ក្រោយ ប៉ុន្តែភូមាអាចរំពឹងជានិច្ចលើមហាមិត្តចិន ដែលជាសមាជិកអចិន្ត្រៃយ៍នៃក្រុមប្រឹក្សាសន្តិសុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ