អូស្ត្រាលីមាននាយករដ្ឋមន្ត្រីថ្មី គម្រប់ទី ៧ ក្នុងរយៈពេល១១ឆ្នាំ
អូស្ត្រាលីបានប្តូរនាយករដ្ឋមន្ត្រីថ្មីជាលើកទី ៧ ក្នុងរយៈពេលតែ១១ឆ្នាំ ! ថ្ងៃនេះគណបក្សអំណាចអូស្ត្រាលី បានសម្រេចជ្រើសរើសនាយករដ្ឋមន្ត្រីថ្មី។ លោករដ្ឋមន្ត្រីក្រសួងហិរញ្ញវត្ថុ Scott Morrison ត្រូវបានជ្រើសតាំងឱ្យឡើងកាន់តំណែងនាយករដ្ឋមន្ត្រី ជំនួសលោក Malcolm Turnbull ដែលបក្សទើបធ្វើរដ្ឋប្រហារទម្លាក់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០០
ការធ្វើរដ្ឋប្រហារបក្សប្តូរនាយករដ្ឋមន្ត្រីមិនមែនជាករណីដំបូងទេ នៅអូស្ត្រាលី ! លោក Malcolm Turnbull ក៏បានផ្តួលនាយករដ្ឋមន្រ្តីមុន តាមគន្លងតែមួយ មុននឹងបានឡើងកាន់អំណាចនៅខែកញ្ញាឆ្នាំ២០១៥ដែរ។ នៅពេលនេះដល់វេនលោកម្តង !
ប៉ុន្តែគឺជម្រើសនាយករដ្ឋមន្ត្រីថ្មី ដែលបង្កការភ្ញាក់ផ្អើលខ្លាំង និងជាប្រៀបដូចជាព្រនង់វាយសំពងលើរូបអតីតរដ្ឋមន្ត្រីក្រសួងមហាផ្ទៃ លោក Petter Dutton ដែលជាមេក្រុមដឹកនាំចលនាប្រឆាំងក្នុងបក្សដើម្បីផ្តួលលោកនាយករដ្ឋមន្ត្រី Turnbull !
លោក Scott Morrison អតីតរដ្ឋមន្ត្រីក្រសួងហិរញ្ញវត្ថុ ជាជំនិតម្នាក់របស់លោកនាយករដ្ឋមន្ត្រីចាស់។ លោក បានទទួលសំឡេងគាំទ្រ ៤៥ទល់នឹង៤០សំឡេងសម្រាប់លោកDutton ជាគូប្រជែង។
ក្នុងវ័យ៥០ឆ្នាំ ជាគ្រិស្តិសាសនិក ដ៏ស្មោះស្ម័គ្របំផុត លោក ម៉ូរីសាន់ បានឡើងកាន់តំណែងតាំងពីខែកញ្ញា២០១៥មក ជារដ្ឋមន្ត្រីក្រសួងហិរញ្ញវត្ថុ ដែលជាតួនាទីឈ្នាន់សម្រាប់ឈោងទៅកាន់តំណែងជានាយករដ្ឋមន្ត្រី។
ប៉ុន្តែលោក ម៉ូរីសាន់ ជាអ្នកអភិរក្សស្តាំនិយមខ្លាំង ជាងនាយករដ្ឋមន្ត្រីមុន ! ជាមនុស្សដែលស្រលាញ់គ្រួសារ គោរពពាក្យសំដីខ្លួន ធ្វើការអស់ពីចិត្តពីថ្លើមនិងប្រកបដោយថាមពល តែក៏មានលក្ខណៈចម្រូងចម្រាសខ្លាំងដែរ ជាពិសេស ចំពោះសកម្មភាពនយោបាយដ៏តឹងតែង កាលលោកនៅជារដ្ឋមន្ត្រីក្រសួងអន្តោប្រវេសន៍ពីឆ្នាំ ២០១៣-២០១៤។ ដោយកាលណោះ លោកបានដឹកនាំបើកយុទ្ធនាការការពារព្រំដែន “Operation Frontieres souveraines” ដើម្បីបំបាក់ទឹកចិត្តជនភៀសខ្លួនដែលរត់ឆ្លងសមុទ្ទមកកាន់ទឹកដីអូស្ត្រាលី។
ជានយោបាយអន្តោប្រវេសន៍ដ៏តឹងតែងបំផុត ! រាល់គ្រប់ទូកអន្តោប្រវេសន៍ នឹងត្រូវទាហាន បញ្ជូនជាស្វ័យប្រវត្តិត្រលប់ទៅស្រុកដើមវិញ។ អន្តោប្រវេសន៍ដែលបានជាន់ដីអូស្ត្រាលីហើយ នឹងត្រូវចាប់ទៅជំរំឃុំឃាំងនៅតាមកោះកណ្តាលមហាសមុទ្ទប៉ាស៊ីហ្វិក ដែលអង្គការការពារសិទ្ធិមនុស្សតែងបរិហារជាញឹកញយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ