កាណាដា និងអាស៊ានកំពុងពិគ្រោះពិភាក្សាស្វែងរកកិច្ចព្រមព្រៀងដោះដូរសេរីរវាងគ្នា
រដ្ឋមន្រ្តីក្រសួងពាណិជ្ជកម្មនៃប្រទេសកាណាដាលោកយីម ខារផ្តើមទស្សនកិច្ចនៅក្នុងប្រទេសថៃពីថ្ងៃអង្គារ ទី២៨ដល់ថ្ងៃព្រហស្បតិ៍ ទី៣០សីហា រួចបន្តដំណើរឆ្លងចូលប្រទេសសិង្ហបុរីដើម្បីចូលរួមនៅក្នុងកិច្ចប្រជុំថ្នាក់រដ្ឋមន្រ្តីសេដ្ឋកិច្ចអាស៊ាន។ ថ្លែងនៅ ១ថ្ងៃមុនចេញដំណើរ លោកយីម ខារបានបញ្ជាក់ថា កាណាដា និងក្រុមប្រទេសសមាជិកអាស៊ានទាំង ១០ប្រទេសកំពុងជជែកគ្នាក្នុងទិសដៅឆ្ពោះទៅសម្រេចបាននូវកិច្ចព្រមព្រៀងដោះដូរសេរីមួយរវាងគ្នា។ សូមជម្រាបជូនថា ដោយប្រឈមនឹងសង្រ្គាមពាណិជ្ជកម្មជាមួយអាមេរិក កាណាដាបានផ្តើមស្វែងរកដៃគូពាណិជ្ជកម្មថ្មី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៨
នៅក្នុងប្រទេសថៃរយៈពេល ៣ថ្ងៃពីថ្ងៃទី២៨ ដល់ថ្ងៃទី៣០ សីហា លោករដ្ឋមន្រ្តីក្រសួងពាណិជ្ជកម្មកាណាដាយីម ខារចូលរួមនៅក្នុងវេទិកាលើកដំកើងការវិនិយោគ និងទំនាក់ទំនងពាណិជ្ជកម្មទ្វេភាគីរវាងទីក្រុងអូតាវ៉ា និងទីក្រុងបាងកក។ បន្ទាប់ពីប្រទេសថៃ លោកយីម ខារនឹងបន្តដំណើរទៅកាន់ប្រទេសសិង្ហបុរីដែលធ្វើជាប្រធានផ្លាស់វេនអាស៊ានក្នុងឆ្នាំ ២០១៨ នេះ។ នៅទីនោះ លោកយីម ខារនឹងជួបសន្ទនាជាមួយថ្នាក់ដឹកនាំរដ្ឋាភិបាល និងប្រធានរោងចក្រ សហគ្រាសសិង្ហបុរី រួចបន្តចូលរួមនៅក្នុងកិច្ចប្រជុំថ្នាក់រដ្ឋមន្រ្តីសេដ្ឋកិច្ចលើកទី៧ រវាងប្រទេសកាណាដា និងក្រុមប្រទេសសមាជិកអាស៊ានទាំង ១០ ប្រទេស។
រដ្ឋមន្រ្តីពាណិជ្ជកម្មកាណាដារូបនេះដដែលបានបញ្ជាក់ថា កិច្ចពិភាក្សារវាងកាណាដា និងអាស៊ានកំពុងបន្តធ្វើក្នុងគោលដៅឆ្ពោះទៅសម្រេចឲ្យបាននូវកិច្ចព្រមព្រៀងដោះដូរសេរីមួយរវាងអាស៊ាន និងកាណាដា។ ក្រៅពីចង់បានកិច្ចព្រមព្រៀងដោះដូរសេរីជាមួយអាស៊ាន កាណាដាក៏សង្ឃឹមបោះឆ្នោតទទួលយកកិច្ចព្រមព្រៀងអន្តរប៉ាស៊ីហ្វិកពីសភាកាណាដានារដូវស្លឹកឈើជ្រុះខាងមុខ។ កិច្ចព្រមព្រៀងដែលកាណាដា រួមជាមួយប្រទេសអូស្រ្តាលី ព្រុយណេ ឈីលី ជប៉ុន ម៉ាឡេស៊ី ម៉ិចស៊ិក នូវែលហ្សេឡង់ ប៉េរូ សិង្ហបុរី និងវៀតណាមបានចុះហត្ថលេខាកាលពីខែមីនាកន្លងទៅ។
កិច្ចព្រមព្រៀងអន្តរប៉ាស៊ីហ្វិកនេះត្រូវបានគេចាត់ទុកថាសំខាន់ ព្រោះផលិតផលសរុបក្នុងស្រុកបូកបញ្ជូលគ្នារវាងប្រទេសហត្ថលេខីទាំង ១១ប្រទេសមានយ៉ាងតិច ១៥% នៃផលិតផលសរុបក្នុងលោក។ សូមជម្រាបជូនថា តាំងពីមានភាពតានតឹងពាណិជ្ជកម្មជាមួយអាមេរិកដែលជាដៃគូពាណិជ្ជកម្មទី១ របស់ខ្លួនមក រដ្ឋាភិបាលកាណាដារបស់លោក Justin Trudeau កំពុងងាករកដៃគូថ្មី។ រវាងអឺរ៉ុប និងកាណាដា គឺមានកិច្ចព្រមព្រៀងសេតាដែលបានចូលជាធរមានតាំងពីរដូវស្លឹកឈើជ្រុះកន្លងមក។ ឥឡូវនេះ និងក្រៅពីជាមួយអាស៊ាន កាណាដាក៏កំពុងពិគ្រោះពិភាក្សាជាមួយចិនដើម្បីទទួលបានកិច្ចព្រមព្រៀងដោះដូរសេរីដូចគ្នា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ