រដ្ឋាភិបាលចិនផ្តើមចាត់វិធានការបោសសំអាតព័ត៌មានចចាមអារ៉ាមនៅតាមអ៊ីធ័រនែត
នៅថ្ងៃព្រហស្បតិ៍ ទី៣០ សីហានេះ រដ្ឋាភិបាលចិនបានផ្តើមពង្រឹងការឃ្លាំមើលអ៊ីនធ័រនែត ពិសេសចាត់វិធានការបោសសំអាតព័ត៌មានចចាមអារ៉ាមនៅតាមអ៊ីនធ័រនែត។ នៅក្នុងចំណាត់ការនេះ ចិនបានបង្កើតវេបសាយមួយ និងកម្មវីធីមួយសម្រាប់ទូរស័ព្ទដៃ។ ជាមួយនឹងវេបសាយ និងកម្មវិធីសម្រាប់ទូរស័ព្ទដៃនេះ អ្នកប្រើប្រាស់អ៊ីធ័រនែតអាចរាយការណ៍ប្រាប់រដ្ឋអំណាចពីព័ត៌មានចចាមអារ៉ាម។
ចុះផ្សាយនៅថ្ងៃ៖
ស្តាប់ - ០១:៣៣
« Piyao » ឬ « បដិសេធពាក្យចចាមអារ៉ាម » នេះជាឈ្មោះវេបសាយ និងឈ្មោះកម្មវិធីសម្រាប់ទូរស័ព្ទដៃដែលរដ្ឋាភិបាលចិនបានបង្កើតឡើងដើម្បីបោសសំអាតនូវព័ត៌មានចចាមអារ៉ាមនៅតាមអ៊ីនធ័រនែត។ ឈ្មោះវេបសាយ និងឈ្មោះកម្មវិធីសម្រាប់ទូរស័ព្ទដៃនេះក៏ត្រូវបានដាក់បញ្ចូលទៅក្នុងបណ្តាញសង្គមធំៗរបស់ចិន ដូចយ៉ាង Weibo ឬ WeChat ជាដើម។ តាមរយៈបណ្តាញទាំងនេះ « Piyao » នឹងធ្វើការផ្សព្វផ្សាយព័ត៌មានពិតដោយផ្អែកលើព័ត៌មានរបស់កាសែតផ្លូវការចិនដែលគ្រប់គ្រងដោយគណបក្សកុម្មុយនិស្ត និងទីភ្នាក់ងារផ្សេងៗរបស់រដ្ឋាភិបាល។
« ពាក្យចរចាមអារ៉ាមបំពានលើសិទ្ធិពលរដ្ឋ ពាក្យចរចាមអារ៉ាមបង្កើតឲ្យមានចលាចលសង្គម ពាក្យចរចាមអារ៉ាមបង្កឲ្យមានភាពជ្រួលច្របល់នៅផ្សារភាគហ៊ុន ពាក្យចរចាមអារ៉ាមមានផលប៉ះពាល់ដល់សកម្មភាពសេដ្ឋកិច្ច » ទាំងនេះជាសារវីដេអូដែលមានផ្សព្វផ្សាយនៅលើវេបសាយ Piyao។ សូមជម្រាបជូនថានៅចិន អ្នកដែលជាប់ចោទក្នុងបទផ្សព្វផ្សាយព័ត៌មានចចាមអារ៉ាមនឹងអាចដេកក្នុងគុកដល់ទៅ ៧ឆ្នាំ។ រីឯអ្នកដែលបានបង្ហោះសារបង្កប់ដោយព័ត៌មានចចាមអារ៉ាមក៏អាចមានទោសជាប់គុកដែរ ប្រសិនបើសារនោះមានអ្នកប្រើប្រាស់អ៊ីនធ័រនែតមើលយ៉ាងតិច ៥ ០០០នាក់ ឬមួយក៏សារនោះត្រូវបានបង្ហោះចែកចាយជាង ៥០០ដង។
រដ្ឋាភិបាលចិនបានប្រគល់ការគ្រប់គ្រងវេបសាយ « Piyao» ទៅឲ្យគណៈកម្មការទទួលបន្ទុកក្រមសីលធម៌អ៊ីនធ័រនែតរួមសហការណ៍ជាមួយនឹងទីភ្នាក់ងារសារព័ត៌មានផ្លូវការស៊ីនហួរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ