លោកស៊ី ជីនពីងបញ្ជូនមនុស្សជំនិត ទៅចូលរួមក្នុងខួប៧០ឆ្នាំ នៃការកកើត កូរ៉េខាងជើង
ប្រធានរដ្ឋសភា និងជាមនុស្សសំខាន់ទី៣នៃគណៈអចិន្ត្រៃយ៍របស់ការិយាល័យនយោបាយចិន នឹងធ្វើដំណើរ ទៅទីក្រុងព្យុងយ៉ាង នៅថ្ងៃសៅរ៍ ចុងសប្តាហ៍នេះ ដើម្បី ចូលរួមក្នុងពិធីប្រារព្ធ ខួប៧០ឆ្នាំ នៃការបង្កើតស្ថាបនា ប្រទេសកូរ៉េខាងជើង។ ការផ្សព្វផ្សាយ របស់ទីភ្នាក់ងារព័ត៌មានចិនថ្មី នៅថ្ងៃអង្គារទី ៤ កញ្ញា បានបិទបញ្ចប់ពាក្យចចាមអារ៉ាម ដែលថា លោកប្រធានាធិបតីចិន ស៊ី ជីនពីងនឹងធ្វើដំណើរជាលើកទី១ ទៅប្រទេសកូរ៉េខាងជើង។
ចុះផ្សាយនៅថ្ងៃ៖ កែប្រែថ្ងៃទី៖
សម្មតិកម្មដែលថា ប្រធានាធិបតីចិន លោកស៊ី ជីនពីង អាចធ្វើដំណើរទៅកូរ៉េខាងជើង នៅក្នុងឱកាសបុណ្យខួប៧០ឆ្នាំ របស់ប្រទេសនេះ ត្រូវបានគេលើកនិយាយច្រើន បន្ទាប់ពីលោកស៊ី ជីនពីងបានទទួល រាក់ទាក់ មេដឹកនាំកូរ៉េខាងជើង លោកគីម ជុងអ៊ុន ដល់ទៅ៣លើក នៅទីក្រុងប៉េកាំង។
ប៉ុន្តែ តាមការចុះផ្សាយរបស់ទីភ្នាក់ងារព័ត៌មានចិនថ្មី គឺប្រធានសភាប្រជាជនចិន លោក លី ចានស៊្ហូ ដែលត្រូវធ្វើដំណើរទៅតំណាងប្រទេសចិន នៅក្នុងពិធីបុណ្យខួប៧០ឆ្នាំ នៃការបង្កើតកូរ៉េខាងជើង ឬសាធារណរដ្ឋប្រជាមានិត ប្រជាធិបតេយ្យកូរ៉េ។ ទីភ្នាក់ងារព័ត៌មានកូរ៉េខាងជើង KCNA វិញបានបញ្ជាក់ដែរថា លោកលី ចានស៊្ហូ ដែលជាមនុស្សសំខាន់ទី៣របស់គណៈកម្មាធិការមជ្ឈិមបក្សកុម្មុយនិស្តចិន ត្រូវបានអញ្ជើញឲ្យចូលរួមជាអធិបតី នៅថ្ងៃព្យុហយាត្រា យោធារបស់កូរ៉េខាងជើង ដែលត្រូវធ្វើនៅថ្ងៃអាទិត្យ។
ធ្លាប់ថ្នាំងថ្នាក់នឹងគ្នា ដោយសារតែ ចិនបានចូលរួមជាមួយក្រុមប្រឹក្សាសន្តិសុខ ក្នុងការដាក់ទណ្ឌកម្មសេដ្ឋកិច្ច លើកូរ៉េខាងជើង សម្ព័ន្ធមិត្តទាំងពីរ បានត្រលប់មកចាប់ល្អូកល្អឺននឹងគ្នាវិញ នៅក្រោយពេលមេដឹកនាំកូរ៉េខាងជើង បានប្រកាសគម្រោងបើកជំនួបកំពូលជាមួយប្រធានាធិបតីអាមេរិក។ នៅមុន និងនៅក្រោយជំនួបកំពូលជាមួយលោកដូណាល់ ត្រាំ មេដឹកនាំកូរ៉េខាងជើង បានធ្វើដំណើរដល់ទៅ៣ដង ទៅជួប លោកស៊ី ជីនពីង នៅទីក្រុងប៉េកាំង។
តាំងពីចូលកាន់តំណែង ជាប្រធានាធិបតីចិន នៅឆ្នាំ ២០១២ លោកស៊ី ជីនពីងមិនដែលធ្វើដំណើរទស្សនកិច្ច នៅកូរ៉េខាងជើង ដែលជាសម្ព័ន្ធមិត្តរបស់ចិនម្តងណាទេ។ អ្នកតាមដាននយោបាយកូរ៉េ មួយចំនួនវាយតម្លៃថា ដោយមិនធ្វើដំណើរទៅប្រទេសកូរ៉េខាងជើង លើកនេះ លោកស៊ី ជីនពីងទំនងជាផ្ញើសារទៅមេដឹកនាំកូរ៉េខាងជើង ថា គួរតែកាត់បន្ថយភាពតានតឹងជាមួយសហគមន៍អន្តរជាតិ ជាមុនសិន មុននឹងមានដំណើរទស្សនកិច្ចរបស់ប្រធានាធិបតីចិន នៅកូរ៉េខាងជើង។
នៅក្នុងជំនួបកំពូលជាមួយប្រធានាធិបតីអាមេរិក មេដឹកនាំកូរ៉េខាងជើងបានសន្យាថា នឹងធ្វើការដើម្បីរំសាយចោលអាវុធនុយក្លេអ៊ែរ នៅឧបទ្វីបកូរ៉េ។ ប៉ុន្តែ នៅប៉ុន្មានសប្តាហ៍ចុងក្រោយនេះ ការចរចា កូរ៉េខាងជើង និងអាមេរិកបានជាប់គាំងទៅវិញ ដោយសារកូរ៉េខាងជើងមិនបានបង្ហាញសញ្ញាវិជ្ជមានណាមួយ ដើម្បី ឈានទៅលុបបំបាត់ចោលអាវុធនុយក្លេអ៊ែរ តាមការសន្យាជាមួយអាមេរិក។ លោកដូណាល់ ត្រាំ ដែលបានប្រកាសលុបចោលដំណើរទស្សនកិច្ចរបស់ប្រមុខការបរទេសអាមេរិកទៅកូរ៉េខាងជើង នៅបានចោទទីក្រុងប៉េកាំងថា កំពុងយករឿងនុយក្លេអ៊ែរកូរ៉េខាងជើង ជាកូនអុក ក្នុងការចរចាជម្លោះពាណិជ្ជកម្មជាមួយអាមេរិក។ ចិនវិញ បានបដិសេធ និងចាត់ទុកការចោទប្រកាន់របស់អាមេរិក ថា ជាការគ្មានទំនួលខុសត្រូវ ហើយនិងមិនទំនងទាល់តែសោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ