អាមេរិកបន្តមានសុទិដ្ឋិនិយមក្នុងការហៅពួកឧទ្ទាមតាលីបង់ឲ្យចូលតុចរចាសន្តិភាពជាមួយរដ្ឋាភិបាលអាហ្វហ្កានីស្ថាន
លោករដ្ឋមន្រ្តីក្រសួងការពារជាតិអាមេរិកជីម ម៉ាទីស (Jim Mattis) បានបំពេញទស្សនកិច្ចឥតព្រាងទុកនៅក្នុងប្រទេសអាហ្វហ្កានីស្ថាន។ នេះជាទស្សនកិច្ចលើកទី៤ តាំងពីលោកបានឡើងកាន់តំណែងក្នុងខែមករា ឆ្នាំ ២០១៧។ ទស្សនកិច្ចរបស់លោកម៉ាទីសនាថ្ងៃសុក្រ ទី៧ កញ្ញាបានធ្វើឡើង ក្នុងបរិបទនៃកំណើនអំពើហិង្សាបង្កឡើងដោយពួកឧទ្ទាមតាលីបង់។ តែទោះជាយ៉ាងនេះក្តី ប្រមុខការពារជាតិអាមេរិកនៅតែសង្ឃឹមផ្តល់ឲ្យមានឡើងវិញនូវកិច្ចចរចាសន្តិភាពរវាងពួកតាលីបង់ និងរដ្ឋាភិបាលអាហ្វហ្កានីស្ថាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៣
នៅក្នុងទីក្រុងកាប៊ូល លោកម៉ាទីសបានទទួលជួបដោយលោកប្រធានាធិបតីអាច្រាហ្វ ហ្កានី និងនាយករដ្ឋមន្រ្តីលោកអាប់ឌូឡា អាប់ឌូឡា។ តាមវិមានប្រធានាធិបតី ប្រធានបទនៃជំនួបបានផ្តោតសំខាន់លើដំណើរការស្វែងរកសន្តិភាព កំណែទម្រង់លើកម្លាំងទ័ពអាហ្វហ្កានីស្ថាន ការបោះឆ្នោតសភា និងប្រធានាធិបតីនាពេលខាងមុខ យុទ្ធនាការប្រឆាំងភេរវនិយម និងកិច្ចសន្ទនាជាមួយប្រទេសប៉ាគីស្ថានក្បែរខាង។ បច្ចុប្បន្ននេះ មានទាហានអាមេរិកចំនួន ១៤ ០០០នាក់កំពុងបំពេញបេសកកម្មលើទឹកដីអាហ្វហ្កានីស្ថានក្នុងក្របខណ្ឌអង្គការអូតង់។ បេសកកម្មរបស់ទ័ពអាមេរិក គឺជួយគាំទ្រ និងជួយហ្វឹកហ្វឺនកម្លាំងសន្តិសុខអាហ្វហ្កានីស្ថានដើម្បីប្រឈមទប់នឹងពួកឧទ្ទាមតាលីបង់។
តែមកទល់ពេលនេះ កម្លាំងអាហ្វហ្កានីស្ថាន និងកម្លាំងអាមេរិកហាក់ពិបាកទប់ទល់នឹងកំណើនឥទ្ធិពលរបស់ពួកតាលីបង់ដែលកំពុងបន្តបើកការវាយប្រហារនៅទីតាំងសំខាន់ៗទូទាំងប្រទេស រួមទាំងទីក្រុងកាប៊ូលផង។ ក្នុងខែមិថុនាថ្មីៗនេះ កិច្ចព្រមព្រៀងឈប់បាញ់មិនធ្លាប់មានមួយត្រូវបានរកឃើញរវាងពួកតាលីបង់ និងរដ្ឋាភិបាលក្រុងកាប៊ូល។ បន្ទាប់មកក្នុងខែកក្កដា មានជំនួបរវាងតំណាងភាគីអាមេរិក និងតាលីបង់ក្នុងប្រទេសកាតា។ នីតិវិធីទាំងនេះបានផ្តល់ក្តីសង្ឃឹមពីការបិទបញ្ចប់ជម្លោះ និងការផ្តើមកិច្ចចរចាសន្តិភាព។ តែសុទិដ្ឋិនិយមមួយនេះកំពុងត្រូវបានបំផ្លាញដោយកំណើនវាយប្រហាររបស់ពួកតាលីបង់ និងពួកជីហាតអង្គការរដ្ឋអ៊ីស្លាម។
ថ្មីចុងក្រោយគឺការវាយប្រហារលើអាគារកីឡាមួយកាលពីថ្ងៃពុធ ទី៥ កញ្ញាដែលបណ្តាលឲ្យស្លាប់មនុស្សយ៉ាងតិច ២៦នាក់ និងរបួស ៩១នាក់។ គួររម្លឹកថាក្នុងខែសីហា ឆ្នាំ ២០១៧ លោកប្រធានាធិបតីអាមេរិកដូណាល់ ត្រាំបានប្រកាសពីយុទ្ធសាស្រ្តថ្មីសម្រាប់អាហ្វហ្កានីស្ថានដោយដំឡើងចំនួនទ័បអាមេរិក។ គោលដៅរបស់លោកត្រាំ គឺដាក់គំនាបលើពួកតាលីបង់ឲ្យចូលតុចរចាសន្តិភាពជាមួយទីក្រុងកាប៊ូល។ តែបញ្ហានៅត្រង់ថា ពួកឧទ្ទាមមួយនេះតែងបដិសេធការបោះដៃចរចារបស់ក្រុងកាប៊ូល និងបន្តទាមទារចង់បានការចរចាផ្ទាល់ជាមួយក្រុងវ៉ាស៊ីនតោន។
ទោះជាយ៉ាងនេះក្តី លោកម៉ាទីសធ្លាប់បានបង្ហើបឲ្យដឹងពីក្តីសង្ឃឹមរបស់លោកដែលថា ពួកតាលីបង់នឹងយល់ព្រមចូលតុចរចាសន្តិភាពជាមួយរដ្ឋាភិបាលអាហ្វហ្កានីស្ថាននាពេលខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ