បរិស្ថាន៖ក្បួនបាតុកម្មនៅទូទាំងសកលលោកដើម្បីទាញសញ្ញាអាសន្នពីការប្រែប្រួលអាកាសធាតុ
នៅថ្ងៃសៅរ៍ ទី៨ កញ្ញា ក្រុមសកម្មជនបរិស្ថាននៅក្នុងគ្រប់ប្រទេសទូទាំងសកលលោកបានរៀបចំក្បួនបាតុកម្មដើម្បីទាមទាររដ្ឋាភិបាលឲ្យយកចិត្តទុកដាក់បន្ថែមលើបញ្ហាអាកាសធាតុ។ អ្វីដែលពួកគេចង់បាន គឺវិធានការជាក់ស្តែងក្នុងការទប់ស្កាត់កំណើនសីតុណ្ហភាពនៅក្នុងបរិយាកាស។ ក្បួនបាតុកម្មសកលដើម្បីអាកាសធាតុពេលនេះបានធ្វើឡើង ក្នុងពេលដែលកិច្ចប្រជុំក្នុងទីក្រុងបាងកក ប្រទេសថៃដើម្បីត្រៀមរៀបចំជំនួបកំពូលស្តីពីអាកាសធាតុ COP២៤ ត្រូវបិទបញ្ចប់នៅថ្ងៃអាទិត្យ ទី៩ កញ្ញា។
ចុះផ្សាយនៅថ្ងៃ៖
ស្តាប់ - ០១:៤២
ក្បួនបាតុកម្មសកលដើម្បីអាកាសធាតុត្រូវបានគេឲ្យឈ្មោះថា « ក្រោកឈរឡើងដើម្បីអាកាសធាតុ »។ ពីប្រទេសអូស្រ្តាលីឆ្លងចូលប្រទេសហ្វីលីពីនដោយកាត់តាមប្រទេសថៃដែលកំពុងធ្វើជាម្ចាស់ផ្ទះរៀបចំកិច្ចប្រជុំសម្រាប់ត្រៀមជំនួបកំពូលស្តីពីអាកាសធាតុ COP២៤ ក្នុងប្រទេសប៉ូឡូញនាពេលខាងមុខ ក្បួនបាតុកម្មរបស់ក្រុមសកម្មជនបរិស្ថានពេលនេះបានចាប់ផ្តើមមុនគេនៅអាស៊ី មុននឹងបន្តនៅអឺរ៉ុប បន្ទាប់មកនៅអាមេរិក។ ក្នុងទីក្រុងបាងកក មានបាតុករចូលរួមជិត ២០០នាក់ជាមួយនឹងផ្ទាំងបដា រួមនឹងសម្រែកបរិហារអាមេរិករបស់លោកដូណាល់ ត្រាំដែលបានដកអាមេរិកចេញពីកិច្ចព្រមព្រៀងក្រុងប៉ារីស COP២១ ស្តីពីអាកាសធាតុ។
« អាមេរិកជាភាគីដែលមានចំណែកធំណាស់នៅក្នុងបញ្ហាអាកាសធាតុ ដូច្នេះ អាមេរិកត្រូវតែចូលរួមដោះស្រាយ » នេះជាការថ្លែងរបស់បាតុករស្រ្តីម្នាក់។ « ជាមួយនឹងការដកខ្លួនចេញពី COP២១ អាមេរិកលែងស្ថិតក្នុងវង់ល្បែងទៀតឡើយ តែគឺអាមេរិកដែលកំពុងបន្តដាក់ច្បាប់ » នេះជាពាក្យរិះគន់របស់បាតុករម្នាក់ទៀត។ នៅក្នុងទីក្រុងម៉ានីល ប្រទេសហ្វីលីពីន ចំនួនបាតុករមានរហូតដល់ទៅ ៨០០នាក់ជាមួយនឹងបដាទាមទារឲ្យបិទបញ្ចប់ថាមពលបានមកពីធ្យូងថ្មទៅជាថាមពលបៃតងដែលមិនបំពុលបរិយាកាស។ គួររម្លឹកជូនថា ហ្វីលីពីនជាប្រទេសដែលប្រភពថាមពលបានពឹងសឹងតែទាំងស្រុងលើមជ្ឈមណ្ឌលដើរដោយធ្យូងថ្ម។
នៅអាមេរិក ក្បួនបាតុកម្មដើម្បីអាកាសធាតុនឹងត្រូវរៀបចំក្រោមទ្រង់ទ្រាយក្នុងទីក្រុង San Francisco ដែលជាទីកន្លែងត្រូវរៀបចំជំនួបកំពូលពិភពលោកនៃទីក្រុង និងរោងចក្រ សហគ្រាសដើម្បីអាកាសធាតុចាប់ពីថ្ងៃទី១២ កញ្ញាខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ