ឧបទ្វីបកូរ៉េ៖ទីក្រុងព្យុងយ៉ាង និងទីក្រុងសេអ៊ូលបើកការិយាល័យទំនាក់ទំនងរវាងគ្នា
នៅថ្ងៃសុក្រ ទី១៤ កញ្ញា កូរ៉េខាងជើង និងកូរ៉េខាងត្បូងបានបើកសម្ពោធអាគារទំនាក់ទំនងរវាងគ្នាមួយដែលបំពាក់ដោយការិយាល័យជាច្រើន។ អាគារដែលមានកម្ពស់ ៤ជាន់បានសាងសង់ឡើងនៅក្នុងតំបន់កេសុងស្ថិតក្នុងទឹកដីកូរ៉េខាងជើង។ នេះជាសញ្ញាថ្មីមួយទៀតនៃការរំកិលជិតគ្នារវាងបងប្អូនបង្កើតគូសត្រូវទាំងពីរក្នុងពេលដែលប្រមុខដឹកនាំកូរ៉េខាងជើងលោកគីម ជុងអ៊ុន និងលោកប្រធានាធិបតីកូរ៉េខាងត្បូងមូន ចៃអ៊ីនគ្រោងជួបគ្នាជាថ្មីនៅថ្ងៃអង្គារ ទី១៨ កញ្ញាក្នុងទីក្រុងព្យុងយ៉ាង។
ចុះផ្សាយនៅថ្ងៃ៖
នៅពិធីបើកសម្ពោធអាគារទំនាក់ទំនងរវាងកូរ៉េខាងជើង និងកូរ៉េខាងត្បូងក្នុងតំបន់កេសុង ភាគីកូរ៉េខាងត្បូងបានចូលរួមដោយរដ្ឋមន្រ្តីក្រសួងរួបរួមកូរ៉េខាងត្បូងលោក Cho Myoung-gyon ចំណែកខាងភាគីកូរ៉េខាងជើងចូលរួមដោយលោក Ri Son Gwon។ « ថ្ងៃនេះ ទំព័រថ្មីនៃប្រវត្តិសាស្រ្តបានបើកនៅទីនេះ » នេះជាការថ្លែងរបស់លោក Cho Myoung-gyon។ រីឯលោក Ri Son Gwon បានឆ្លើយតបវិញដោយចាត់ទុកអាគារទំនាក់ទំនងថា ជាផ្លៃផ្កាបានមកពីដំណាំរួមគ្នារវាងពលរដ្ឋខាងជើង និងខាងត្បូង។
នៅក្នុងអាគារកម្ពស់ ៤ជាន់មានបំពាក់ដោយសាលប្រជុំរួមមួយ និងការិយាល័យជាច្រើនដែលមានការខ័ណ្ឌចែកសម្រាប់អ្នកធ្វើការមកពីខាងជើង និងខាងត្បូង។ តាមគម្រោង មានអ្នកតំណាងប្រមាណជា ២០នាក់ពីភាគីម្ខាងៗ ហើយអាគារនោះនឹងបើកទ្វារ ២៤ម៉ោងលើ២៤ម៉ោង និង ៣៦៥ថ្ងៃក្នុង១ឆ្នាំ។ គោលដៅនៃការបង្កើតឲ្យមានអាគារទំនាក់ទំនងនេះឡើង គឺដើម្បីជួយសម្រួលលើការងារដោះដូររវាងគ្នានៅតាមព្រំដែន បង្កើនទំនាក់ទំនងរវាងកូរ៉េខាងជើង និងអាមេរិក ហើយជួយកាត់បន្ថយភាពតានតឹងផ្នែកយោធា។
គួររម្លឹកថា តាំងពីដំណាច់ខែមេសា និងតាំងពីក្រោយជំនួបកំពូលលើកទី១ រវាងប្រមុខដឹកនាំកូរ៉េខាងជើងលោកគីម ជុងអ៊ុន និងលោកប្រធានាធិបតីកូរ៉េខាងត្បូងមូន ចៃអ៊ីនក្នុងស្រុក Panmunjom មក បងប្អូនបង្កើតគូសត្រូវទាំងពីរបានព្យាយាមបង្កើតឲ្យមានគម្រោងរួមគ្នានៅក្នុងវិស័យជាច្រើន។ តាមគម្រោង លោកគីម ជុងអ៊ុន និងលោកមូន ចៃអ៊ីនត្រូវជួបគ្នាជាលើកទី៣ នៅថ្ងៃទី១៨ កញ្ញាក្នុងទីក្រុងព្យងយ៉ាង។ គួររម្លឹកជូនថា លោកគីម ជុងអ៊ុន និងលោកមូន ចៃអ៊ីនបានជួបគ្នាចំនួនពីរដង លើកទី១ ក្នុងខែមេសាជាជំនួបកំពូល និងលើកទី២ ក្នុងខែឧសភាជាការជួបប្រាស្រ័យគ្នាដោយគ្មានការគ្រោងទុក។
អ្វីជាការកត់សម្គាល់ ការរំកិលខិតរកគ្នាកាន់តែជិតរវាងកូរ៉េទាំងពីរពេលនេះបានធ្វើឡើង ក្នុងពេលដែលកិច្ចចរចារវាងកូរ៉េខាងជើង និងអាមេរិកស្តីពីការរំសាយនុយក្លេអ៊ែរកូរ៉េខាងជើងហាក់កំពុងជាប់គាំង។ តែគេសង្ឃឹមថា ភាពជាប់គាំងនេះអាចនឹងត្រូវជួយផ្តល់សន្ទុះឡើងវិញនៅក្នុងគម្រោងជួបគ្នាជាថ្មីរវាងលោកគីម ជុងអ៊ុន និងលោកមូន ចៃអ៊ីននាថ្ងៃទី១៨ កញ្ញាក្នុងទីក្រុងព្យុងយ៉ាង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ