ជំនួបកំពូលអន្តរកូរ៉េលើកទីបី ប្រព្រឹត្តទៅដូចការគ្រោងទុកនៅព្យុងយ៉ាង
ប្រធានាធិបតីកូរ៉េខាងត្បូង លោក មូន ចែអ៊ីន បានអញ្ជើញទៅដល់ក្រុងព្យុងយ៉ាងនៅព្រឹកថ្ងៃអង្គារទី ១៨ កញ្ញានេះ ដើម្បីជួបប្រមុខដឹកនាំកូរ៉េខាងជើងលោក គីម ជុងអ៊ុន។ នេះជាជំនួបកំពូលអន្តរកូរ៉េ លើកទីបី ក្នុងរយៈពេលតែ៦ខែ និងជាលើកទីមួយ គិតចាប់តាំងពីឆ្នាំ២០០៧មក ដែលប្រធានាធិបតីកូរ៉េខាងត្បូង បំពេញទស្សនកិច្ច នៅក្នុងរដ្ឋធានីរបស់កូរ៉េខាងជើង។ លោកមូន ចែអ៊ីន នឹងស្នាក់នៅក្នុងក្រុងព្យុងយ៉ាងរយៈពេលបីថ្ងៃ។
ចុះផ្សាយនៅថ្ងៃ៖ កែប្រែថ្ងៃទី៖
លោក គីម ជុងអ៊ុន បានមកទទួលស្វាគមន៍លោកប្រធានាធិបតី មូន ចែអ៊ីន ដល់ព្រលានយន្តហោះអន្តរជាតិ កន្លែងដែលបុរសខ្លាំងកូរ៉េខាងជើងធ្លាប់បានមកឈរចាំមើលដំណើរការបាញ់សាកល្បងមីស៊ីល។ ក្នុងទឹកមុខញញឹមរីករាយ ចាប់ដៃគ្នាយ៉ាងរលាក់ និងអោបគ្នាយ៉ាងហោចបីដង មេដឹកនាំកូរ៉េទាំងពីរ បានបង្ហាញភាពល្អូនល្អើននឹងគ្នាយ៉ាងខ្លាំង។
ដូចទម្លាប់ កូរ៉េខាងជើង បានរៀបចំការទទួលស្វាគមន៍ភ្ញៀវ ដ៏អស្ចារ្យ ពលរដ្ឋស៊ីវិលរាប់សិបពាន់នាក់ បានមកប្រមូលផ្តុំគ្នាឈរអបតាមបណ្តោយផ្លូវ គ្រវីបាច់ផ្កា ទង់ជាតិ និងស្រែកជ័យឃោសចម្រៀងបង្រួបបង្រួមជាតិ ដែលក្បួនរថយន្តរបស់ប្រមុខដឹកនាំដង្ហែបើកចេញពីអាកាសយានដ្ឋាន ឆ្ពោះទៅកណ្តាលរដ្ឋធានីព្យុងយ៉ាង ដោយឆ្លងកាត់វិមាន គុនស៊ូសាន ដែលជាកន្លែងកម្តល់សពលោកគីម អ៊ីលស៊ុង ជាជីតា និងលោក គីម ជុងអ៊ីលជាឪពុករបស់លោក គីម ជុងអ៊ុន។
កូរ៉េខាងជើង ដែលបានចូលឈ្លានពានកូរ៉េខាងត្បូងនៅឆ្នាំ១៩៥០ ថ្ងៃផ្តើមសង្គ្រាមកូរ៉េ នាពេលនេះតែបានគូសបញ្ជាក់ជាញឹកញយអំពីសារសំខាន់នៃការបង្រួបបង្រួមជាមួយកូរ៉េខាងត្បូងដែលមានបានជាង។ មានឪពុកម្តាយបង្កើតជាជនរត់ភៀសខ្លួនគេចពីកូរ៉េខាងជើង ក្នុងពេលសង្គ្រាម លោក មូន ចែអ៊ីន ជាប្រមុខដឹកនាំកូរ៉េខាងត្បូងទីបី ដែលធ្វើដំណើរទៅព្យុងយ៉ាង តាមគន្លងរបស់ប្រធានាធិបតីរៀមច្បងមុនលោក គីម ដៃជុង (នៅឆ្នាំ២០០០) និងលោករ៉ូ មូយុន (នៅឆ្នាំ២០០៧)។
លោក មូន ចែអ៊ីន ត្រូវមានជំនួបជាមួយលោក គីម ជុងអ៊ុនយ៉ាងហោចក៏ពីរដង ក្នុងរយៈពេលបំពេញទស្សនកិច្ចបីថ្ងៃនេះ ជាមួយនឹងបន្ទុកការងារដ៏លំបាក គឺ ៖ លោកចង់ជជែកជាមួយកូរ៉េខាងជើងអំពី ការអភិវឌ្ឍន៍កិច្ចសហប្រតិបត្តិការអន្តរកូរ៉េ ជាពិសេសលើវិស័យសេដ្ឋកិច្ច។ ដើម្បីសម្រេចបំណងនេះ លោក មូន ចែអ៊ីន ត្រូវការការលើកទណ្ឌកម្ម និងផ្តល់សន្ទុះថ្មីដល់ការចរចារំសាយនុយក្លេអ៊ែររវាងកូរ៉េខាងជើងនិងសហរដ្ឋអាមេរិក។ សំណុំរឿងដែលត្រូវជាប់គាំងស្តូក នាពេលនេះ និងដែលព្យុងយ៉ាងទើបបានបន្ទោសជាថ្មីថាបណ្តាលមកពីវ៉ាស៊ីនតោន។
ដូច្នេះ លោកមូន ចែអ៊ីន ត្រូវបញ្ចុះបញ្ចូល បុរសខ្លាំងគីម ជុងអ៊ុន ឱ្យធ្វើសម្បទានបំពេញចិត្តអាមេរិក ដូចជាត្រូវធ្វើបញ្ជីរាយមុខអាវុធនុយក្លេអ៊ែរ ឱ្យបានពេញលេញដែលលោកដូណាល់ ត្រាំអាចទទួលយកបាន សម្រាប់ប្រកាសជាផ្លូវការបិទបញ្ចប់សង្គ្រាមកូរ៉េផង និងជាចាប់ផ្តើមបន្តកិច្ចចរចាផង។ ក្នុងករណីបរាជ័យ សេអូលទំនងជាត្រូវប្រឈមនឹងទង្វើផ្គើន ព្រមទាំងការប្រកាសសង្គ្រាមពីសំណាក់ព្យុងយ៉ាងជាថ្មី ដូចអ្វីដែលមានកើតឡើងកាលពីឆ្នាំទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ