ប្រធានាធិបតីវៀតណាមទទួលមរណភាព នៅអាយុ៦១ឆ្នាំ
ប្រធានាធិបតីវៀតណាម លោក ចិន ដាយគ័ង Tran Dai Quang បានទទួលមរណភាពហើយ នៅថ្ងៃសុក្រនេះ។ តាមប្រព័ន្ធផ្សព្វផ្សាយរដ្ឋ វៀតណាម ប្រមុខរដ្ឋវៀតណាម បានទទួលអនិច្ចកម្ម នៅក្នុងអាយុ ៦១ឆ្នាំ ដោយសារជម្ងឺដ៏ធ្ងន់ធ្ងរ។ ប្រធានាធិបតីវៀតណាមបានលាចាកលើកទៅ ដោយបន្សល់នូវ កេរ្តិ៍ឈ្មោះ មេដឹកនាំដែលបញ្ជាឲ្យមានការបង្រ្កាប ចាប់ដាក់ពន្ធនាគារ ក្រុមប្រឆាំង ហើយនិងក្រុមសកម្មជនសិទ្ធិមនុស្ស។ តើលោកប្រធានាធិបតីវៀតណាមមានប្រវត្តិដើមយ៉ាងណា?
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៦
កើតនៅឆ្នាំ ១៩៥៦ នៅខេត្តនិញប៊ិញ ភាគខាងជើង វៀតណាម លោកចិន ដាយគ័ង Tran Dai Quangបានចូលរៀនសាលាប៉ូលិស តាំងពីនៅវ័យក្មេង។ លោកបានចាប់ផ្តើមការងារ លើកដំបូង នៅក្រសួងសន្តិសុខ ឬក្រសួងមហាផ្ទៃ នៅឆ្នាំ ១៩៧៥។ នៅក្នុងរយៈពេល ៤០ឆ្នាំ នៅក្រសួងសន្តិសុខសាធារណៈ លោកចិន ដាយគ័ង ធ្លាប់ជាប្រធានប៉ូលិស និងស៊ើបការណ៍សម្ងាត់ មុននឹងក្លាយជារដ្ឋមន្រ្តីក្រសួងសន្តិសុខវៀតណាម អស់រយៈពេល ៥ឆ្នាំ។
នៅឆ្នាំ ២០១៦ លោកចិន ដាយគ័ង ជារដ្ឋមន្រ្តីក្រសួងសន្តិសុខ ដំបូងគេ នៅវៀតណាមដែលត្រូវបានបក្សកុម្មុយនិស្តវៀតណាម ជ្រើសតាំងឲ្យកាន់តំណែងជាប្រធានាធិបតី។ លោកជាមនុស្សម្នាក់ ក្នុងចំណោមមនុស្សសំខាន់៤រូបរបស់ការិយាល័យនយោបាយរបស់បក្សកុម្មុយនិស្ត ដែលជាក្បាលម៉ាស៊ីនដឹកនាំប្រទេសវៀតណាម។ នៅវៀតណាម បុគ្គលដែលមានឥទ្ធិពល និងអំណាចពិតប្រាកដ គឺ អគ្គលេខាធិការបក្ស។ ចំណែកប្រធានាធិបតីគ្រាន់តែដើរតួនាទីជាប្រមុខរដ្ឋ សម្រាប់ទទួលថ្នាក់ដឹកនាំបរទេសតែប៉ុណ្ណោះ ដូចជាទទួលគារវកិច្ចប្រធានាធិបតីចិន ស៊ី ជីនពីងជាដើម។
ប៉ុន្តែ ទោះជាយ៉ាងនេះក្តី គេវាយតម្លៃថា បើទោះបីស្ថិតក្នុងឯកសណ្ឋានស៊ីវិល ជាប្រធានាធិបតី លោកចិន ដាយគ័ង មកពីក្រុមអភិរក្សនិយមវៀតណាម នៅតែឆ្លៀត បង្គាប់បញ្ជាឲ្យក្រសួងសន្តិសុខវៀតណាម បន្តរឹតបន្តឹងបង្រ្កាបក្រុមប្រឆាំង ដូចកាលដែលលោកធ្លាប់ធ្វើជារដ្ឋមន្រ្តីមហាផ្ទៃ។
តាមអង្គការការពារសិទ្ធិមនុស្ស Amnesty International នៅក្នុងនាមជាប្រធានាធិបតី លោកចិន ដាយគ័ងបានបញ្ជាឲ្យបង្ក្រាប ចាប់ដាក់ពន្ធនាគារ ក្រុមប្រឆាំង អ្នកដែលសរសេរBlogរិះគន់រដ្ឋាភិបាល។ អង្គការAmnesty International រកឃើញថា រហូតមកដល់ខែ មេសា មានអ្នកទោសនយោបាយវៀតណាម ១០០នាក់ ហើយត្រូវបានអាជ្ញាធរវៀតណាមចាប់ដាក់ពន្ធនាគារ។ អ្នកតំណាងរបស់អង្គការការពារសិទ្ធិមនុស្សFIDHវិញវាយតម្លៃថា ទោះបីលោក ចិន ដាយគ័ង មេដឹកនាំកណ្តាប់ដៃដែកម្នាក់របស់វៀតណាមបានស្លាប់បាត់បង់ជីវិត ទៅនៅថ្ងៃនេះ ប៉ុន្តែ ស្ថានភាពនៅរបបកុម្មុយនិស្ត វៀតណាមនឹងមិនធូរស្រាល ផ្លាស់ប្តូរខុសពីមុននោះទេ។ សម្រាប់អ្នកជំនាញ កិច្ចការអាស៊ីអាគ្នេយ៍ នៅសកលវិទ្យាល័យ Canberra ប្រទេសអូស្ត្រាលី បក្សកុម្មុយនិស្តវៀតណាមមានរចនាសម្ព័ន្ធរឹងមាំ និងបានត្រៀមខ្លួនជានិច្ច ដើម្បីរកមនុស្ស នៅក្នុងការិយាល័យនយោបាយរបស់បក្ស សម្រាប់តំណែង អនាគតប្រធានាធិបតី ក្នុងពេលខាងមុខ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ