ចិន និងបុរីវ៉ាទីកង់បានចុះកិច្ចព្រមព្រៀងជាប្រវត្តិសាស្រ្តស្តីពីការតែងតាំងមន្រ្តីសង្ឃកាតូលិកចិន
នៅថ្ងៃសៅរ៍ ទី២២ កញ្ញា បុរីវ៉ាទីកង់ និងរដ្ឋាភិបាលចិនបានចុះហត្ថលេខាលើកិច្ចព្រមព្រៀងមួយស្តីពីការតែងតាំងមន្រ្តីសង្ឃកាតូលិកនៅក្នុងប្រទេសចិន។ ជាមួយនឹងកិច្ចព្រមព្រៀងនេះ ប្រមុខសង្ឃកាតូលិកសម្តេចប៉ាបហ្រ្វង់ស័របានទទួលស្គាល់មន្រ្តីសង្ឃកាតូលិកចិនចំនួន ៨អង្គដែលទីក្រុងប៉េកាំងទើបបានតែងតាំងដោយគ្មានការយល់ព្រមពីបុរីវ៉ាទីកង់។ សូមជម្រាបជូនថានៅចិនសព្វថ្ងៃ មានវត្តមានវិហារកាតូលិកស្នេហាមាតុភូមិដែលគ្រប់គ្រងដោយរដ្ឋាភិបាលចិន និងវិហារកាតូលិកលួចលាក់ដែលគាំទ្រដោយបុរីវ៉ាទីកង់ ហើយភាពចម្រូងចម្រាសរវាងបុរីវ៉ាទីកង់ និងចិនបានផ្តោតតែលើការតែងតាំងមន្រ្តីសង្ឃកាតូលិក។
ចុះផ្សាយនៅថ្ងៃ៖
ស្តាប់ - ០២:២២
មិនមែនជាកិច្ចព្រមព្រៀងនយោបាយស្តីពីការភ្ជាប់ទំនាក់ទំនងការទូតឡើងវិញរវាងទីក្រុងប៉េកាំង និងបុរីវ៉ាទីកង់ទេ តែជាកិច្ចព្រមព្រៀងមួយដែលមានលក្ខណៈសាសនាស្តីពីនីតិវិធីនៃការតែងតាំងមន្រ្តីសង្ឃកាតូលិកនៅក្នុងប្រទេសចិន។ តាមរយៈកិច្ចព្រមព្រៀងដែលទើបចុះហត្ថលេខាក្នុងទីក្រុងប៉េកាំង ប្រទេសចិនរវាងអនុរដ្ឋមន្រ្តីការបរទេសចិន និងអគ្គលេខាធិការរងបុរីវ៉ាទីកង់ ការជ្រើសតាំងមន្រ្តីសង្ឃកាតូលិកចិននឹងត្រូវធ្វើឡើងជា ៣ដំណាក់កាល ដំបូង សហគមន៍កាតូលិកចិនជាអ្នករៀបចំបញ្ជីឈ្មោះសង្ឃការតូលិក បន្ទាប់មក បញ្ជីឈ្មោះនោះត្រូវមានការយល់ព្រមពីវិហារកាតូលិកទទួលស្គាល់ដោយរដ្ឋាភិបាលចិន និងចុងក្រោយ សម្តេចប៉ាបជាអ្នកសម្រេចថា យល់ព្រម ឬមិនយល់ព្រមតែងតាំងសង្ឃកាតូលិកដែលមាននៅក្នុងបញ្ជីនោះ។
បុរីវ៉ាទីកង់បានចាត់ទុកថ្ងៃចុះហត្ថលេខាលើកិច្ចព្រមព្រៀងជាមួយចិនស្តីពីការតែងតាំងមន្រ្តីសង្ឃកាតូលិកចិនថាជាថ្ងៃប្រវត្តិសាស្រ្ត និងសង្ឃឹមអាចចូលរួមជួយកាត់បន្ថយភាពតានតឹងរវាងគ្នាក្នុងសំណុំរឿងសាសនាកាតូលិកនៅចិន។ « កិច្ចព្រមព្រៀងមួយនេះមិនមែនជាទីបញ្ចប់នៃនីតិវិធីទេ តែជាការចាប់ផ្តើម » នេះជាចំណាប់អារម្មណ៍របស់អ្នកនាំពាក្យបុរីវ៉ាទីកង់ដែលកំពុងអមដំណើរទស្សនកិច្ចរយៈពេល ៤ថ្ងៃរបស់សម្តេចប៉ាបហ្រ្វង់ស័រនៅក្នុងប្រទេសបាល់ទិកក្នុងថ្ងៃសៅរ៍ ទី២២ កញ្ញា។ គួររម្លឹកជូនថា ចិន និងបុរីវ៉ាទីកង់បានផ្តាច់ទំនាក់ទំនងការទូតរវាងគ្នាតាំងពីឆ្នាំ ១៩៥១ មកម្ល៉េះ ពោល ២ឆ្នាំក្រោយពីការឡើងកាន់អំណាចរបស់គណបក្សកុម្មុយនិស្ត។
សព្វថ្ងៃនេះនៅចិន អ្នកកាន់សាសនាគ្រិស្តមានតិចតួច ពោលប្រមាណជា ១២លាននាក់ប៉ុណ្ណោះក្នុងចំណោមពលរដ្ឋសរុបទាំងជិត ១ ៤០០លាននាក់។ តែបញ្ហានៅត្រង់ថា គ្រិស្តសាសនិកជនចិនទាំង ១២លាននាក់កំពុងបន្តបែកខ្ញែកគ្នារវាងវិហារកាតូលិកស្នេហាមាតុភូមិដែលទទួលស្គាល់ដោយរដ្ឋាភិបាលចិន និងវិហារកាតូលិកលួចលាក់ដែលទទួលស្គាល់ដោយបុរីវ៉ាទីកង់។ តាំងពី ៣ឆ្នាំកន្លងទៅ បុរីវ៉ាទីកង់បានព្យាយាម និងប្រើគ្រប់មធ្យោបាយដើម្បីផ្តល់សន្ទុះកិច្ចចរចាដែលបានចាប់ផ្តើមក្នុងទសវត្សឆ្នាំ ៨០ ក្នុងការបង្រួបបង្រួមវិហារកាតូលិកទាំងពីរ ក៏ដូចជាក្នុងការភ្ជាប់ទំនាក់ទំនងការទូតរវាងចិន និងបុរីវ៉ាទីកង់ឡើងវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ