សម្តេចប៉ាប François អំពាវនាវអោយប្រជាជនចិនអ្នកកាន់សាសនាកាតូលិកមានការផ្សះផ្សាជាតិ
សម្តេចប៉ាបសាសនាកាតូលិក François បានអំពាវនាវកាលពីថ្ងៃពុធម្សិលមិញ សុំឲ្យប្រជាជនចិនអ្នកកាន់សាសនាកាតូលិកទាំងអស់នៅក្នុងប្រទេសចិន មានការផ្សះផ្សាជាតិ។ ជាការអំពាវនាវមួយដែលបានប្រព្រឹត្តទៅបន្ទាប់ពីមានកិច្ចព្រមព្រៀងជាប្រវត្តិសាស្ត្រមួយជាមួយទីក្រុងប៉េកាំង នៅ ក្នុងការតែងតាំងសង្ឃកាតូលិកចិននៅក្នុងប្រទេស។ ទន្ទឹមនេះ សម្តេចប៉ាប បានទទួលស្គាល់ដែរថា ការអំពាវនាវរបស់ព្រះអង្គនេះ អាចនឹងបណ្តាលអោយមាន ការភ័ន្តច្រឡំ ច្រើន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៧
នៅក្នុងសារមួយដែលផ្សព្វផ្សាយនៅថ្ងៃពុធម្សិលមិញ ជូនដល់ប្រជាជនចិនដែលជាអ្នកកាន់សាសនាកាតូលិកនោះ សម្តេចប៉ាប François បានអំពាវនាវសុំអោយ ប្រជាជនចិនទាំងអស់ មានការផ្សះផ្សាជាតិនៅក្នុងប្រទេសចិន ដោយ ទ្រង់ បានទទួលស្គាល់ដែរថា ការអំពាវនាវរបស់ទ្រង់នេះ អាចនឹងធ្វើឲ្យមានការភ័ន្តច្រឡំច្រើន នៅក្នុងរង្វង់ អ្នកកាន់សាសនាកាតូលិកចិន ជាពិសេស អារម្មណ៍របស់ពួកគេ ដែលគិតថា សម្តេចប៉ាប បានបោះបង់ចោលពួកគេហើយ។
នៅក្នុងយន្តហោះដែលដឹកសម្តេចប៉ាបពីប្រទេស Estonie កាលពីថ្ងៃអង្គារមុន សម្តេចប៉ាប François បានលើកឡើងដែរ អំពីការឈឺចាប់រងទុក្ខវេទនាឥតល្ហែរបស់ប្រជាជនចិនដែលជាអ្នកកាន់សាសនាកាតូលិកនៅក្នុងប្រទេស។ អ្នកកាន់សាសនាកាតូលិកចិន ដែលមានគ្នាប្រមាណ ១២លាននាក់ នៅក្នុងប្រទេសចិននេះ ជាចំនួន ភាគតិចបំផុតនៅក្នុងប្រទេសចិន ដែលមានប្រជាជន រហូតទៅដល់ជិត ១ ៤០០ លាននាក់ មានការបែកបាក់គ្នា ជាច្រើនទស្សវត្សរ៍មកហើយ រវាង ព្រះវិហារកាតូលិកដែលគាំទ្ររដ្ឋាភិបាលចិននិងព្រះវិហារកាតូលិកលួចលាក់ដែលទទួលស្គាល់តែរដ្ឋអំណាចសម្តេចប៉ាបប៉ុណ្ណោះគត់។
គួររំលឹកថា កាលពីថ្ងៃសៅរ៍មុន វិមានវ៉ាទីកង់ បានចុះកិច្ចព្រមព្រៀងជាប្រវត្តិសាស្ត្រមួយជាមួយនឹងរបបកុម្មុយនិស្តប៉េកាំងនៅក្នុងការតែងតាំងសង្ឃកាតូលិកក្នុងប្រទេសចិន នៅខណៈពេលដែលព្រះវិហារកាតូលិកនានានៅក្នុងប្រទេសចិន ត្រូវបានគេឈូសឆាយកំទេចចោល។
ម្យ៉ាងទៀត នៅលើកិច្ចព្រមព្រៀងជាប្រវត្តិសាស្ត្រនោះ ដែលត្រូវបានចាត់ទុកជាកិច្ចព្រមព្រៀងបណ្តោះអាសន្ន សម្តេចប៉ាប François បានធ្វើការទទួលស្គាល់ សង្ឃ កាតូលិក ចិនចំនួន ៧រូប ដែល តែងតាំងឡើង ដោយទីក្រុងប៉េកាំងនិង គ្មានការយល់ព្រម ពីសម្តេចប៉ាប ក៏ព្រមទាំង សង្ឃ កាតូលិកចិន ទី៨ ដែលបានសុគតទៅហើយ។
សូមបញ្ជាក់ថានៅក្នុងសាររបស់ព្រះអង្គ កាលពីថ្ងៃពុធម្សិលមិញ សម្តេចប៉ាប François បានសុំ ឲ្យ សង្ឃ កាតូលិក ចិនទាំង៧រូបនេះ សម្តែងនូវកាយវិការឲ្យបានជាក់ច្បាស់ នៅលើការស្វែងរកជំហរឯកភាពមួយ ជាមួយនឹងវិមានវ៉ាទីកង់របស់សម្តេចប៉ាប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ