Amal Clooney អំពាវនាវឲ្យលោកស្រីអ៊ុងសាន ស៊ូជី លើកលែងទោសអ្នកកាសែតភូមាទាំងពីររូប
Amal Clooney ភរិយារបស់តារាភាពយន្តអាមេរិកាំង និងជាមេធាវីការពារសកម្មជន សិទ្ធិមនុស្ស បានអំពាវនាវនៅថ្ងៃសុក្រម្សិលមិញ សុំឲ្យលោកស្រីអ៊ុងសាន ស៊ូជី អន្តរាគម ជួយដោះលែងអ្នកកាសែតភូមា។ សម្រាប់លោកស្រីមេធាវី Cloony លោកស្រីស៊ូជី ជ័យលាភីណូបែលសន្តិភាព ដើរតួសំខាន់ និងមានសិទ្ធិលើកលែងទោសដល់អ្នកកាសែតទាំងពីរ ដែលត្រូវបានតុលាការភូមាផ្តន្ទាទោស កាលពីដើមខែកញ្ញានេះ ឲ្យជាប់ពន្ធនាគារ ៧ឆ្នាំ ក្នុងបទទម្លាយការសម្ងាត់របស់រដ្ឋ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:០៤
នៅក្នុងសន្និសីទ ដែលមានឈ្មោះថា អ្នកកាសែត ក្នុងពន្ធនាគារ ដែលរៀបចំឡើង នៅក្រៅក្របខ័ណ្ឌ មហាសន្និបាត អង្គការសហប្រជាជាតិ នៅទីក្រុងញូវយ៉ក លោកស្រី Amal Cloony ភរិយារបស់តារាភាពយន្ត អាមេរិកាំង George Cloony និងដែលជាមេធាវី ចេញមុខការពារសកម្មជនការពារសិទ្ធិមនុស្ស បានអំពាវនាវសុំឲ្យលោកស្រី អ៊ុងសាន ស៊ូជីជួយអន្តរាគម ដោះលែង អ្នកកាសែតភូមាទាំងពីររូប ដែលទើបត្រូវបានតុលាការភូមាផ្តន្ទាទោសឲ្យជាប់ពន្ធនាគារ ៧ឆ្នាំ ដោយសារពួកគេបានសរសេរអត្ថបទស៊ើបអង្កេត លើសកម្មភាពកាប់សម្លាប់របស់កងទ័ពភូមាទៅលើប្រជាជនភាគតិច រ៉ូហ៊ីងយ៉ា។
លោកស្រីមេធាវី Amal Clooneyបាននិយាយថា ក្រុមគ្រួសាររបស់អ្នកកាសែតបានផ្ញើរួចហើយ សំបុត្រសុំការលើកលែងទោសពីប្រធានាធិបតី។ តាមAmal Clooney ប្រធានាធិបតីភូមាអាចលើកលែងទោសឲ្យអ្នកកាសែត បើសិនមានភ្លើងខៀវពីលោកស្រីអ៊ុងសាន ស៊ូជី។
សម្រាប់មេធាវី ការពារសកម្មជនសិទ្ធិមនុស្ស លោកស្រីអ៊ុងសាន ស៊ូជី ត្រូវផ្តល់អាទិភាពដល់ការដោះលែងអ្នកទោសមនសិការ និងរក្សាធានាសេរីភាពសារព័ត៌មាន បើសិនលោកស្រី ចង់ឲ្យភូមាមានលទ្ធិប្រជាធិបតេយ្យពិតប្រាកដ។ “ លោកស្រីអ៊ុងសាន ស៊ូជី ដឹងច្បាស់ណាស់ថា ការសម្លាប់រង្គាលមិនមែនជាកិច្ចការសម្ងាត់របស់រដ្ឋ ហើយអ្នកកាសែត មិនអាចក្លាយជាចារកិច្ច យកការណ៍សម្ចាត់ ឲ្យបរទេស ដោយសារតែស៊ើបអង្កេតលើរឿងនេះ ដែរ។ លោកស្រីស៊ូជី ដឹងច្រើនជាងនរណាៗទាំងអស់ ថា តើអ្វីទៅជាស្ថានភាពរបស់អ្នកទោសនយោបាយនៅប្រទេសភូមា” នេះជាប្រសាសន៍របស់លោកស្រី Amal មុននឹងបន្ថែមថា កាលនៅជាសិស្សសាលា លោកស្រី ធ្លាប់ចាត់ទុក លោកស្រី អ៊ុងសាន ស៊ូជី នេះជាវីរនារីគំរូរបស់លោកស្រី។
កាលនៅជាមេបក្សប្រឆាំងនឹងរបបសឹកភូមា លោកស្រីអ៊ុងសាន ស៊ូជី ធ្លាប់ត្រូវបានពិភពលោកកោតសរសើរ សម្រាប់សេចក្តីក្លាហានទាមទារការគោរពសិទ្ធិមនុស្សនៅភូមា។ ប៉ុន្តែ ចាប់តាំងពីឈ្នះឆ្នោត ចូលដឹកនាំរដ្ឋាភិបាលស៊ីវិល ភូមា ដោយមានចែករំលែកអំណាចជាមួយក្រុមយោធា លោកស្រីបានរងការរិះគន់ជាបន្តបន្ទាប់ ជាពិសេស នៅក្នុងករណីអំពើហិង្សាទៅលើជនជាតិរ៉ូហ៊ីងយ៉ានៅរដ្ឋរ៉ាឃីន។
ថ្មីៗនេះទៀតសោត នៅក្រោយ តុលាការភូមា បានកាត់ទោសអ្នកកាសែត២នាក់ ឲ្យជាប់ពន្ធនាគារ លោកស្រីអ៊ុងសាន ស៊ូជី ដែលកម្រនឹងចេញមុខ និយាយពីរឿងរ៉ូហ៊ីងយ៉ា បាននិយាយការពារ ការសម្រេចរបស់តុលាការ ដោយថា “អ្នកកាសែតទាំង២នាក់ ត្រូវបានកាត់ទោសឲ្យជាប់ពន្ធាគារ មិនមែនដោយសារតែពួកគេជាអ្នកកាសែតទេ។ ប៉ុន្តែ គឺដោយសារពួកគេទាំងពីរ បានបំពានច្បាប់ជាធរមាន”។ លោកស្រីបានបន្តថា “ភូមា ជាប្រទេសនីតិរដ្ឋ ដែលតុលាការមានឯករាជ្យ ដូច្នេះ បើពួកគេមិនសុខចិត្ត ពួកគេអាចប្តឹងទាស់ ឡើងទៅសាលាឧទ្ធរណ៍បាន”។
ជំហរចុងក្រោយរបស់លោកស្រីស៊ូជី បានបង្កឲ្យមានរលករិះគន់ ខឹងសម្បារ ពីក្រុមការងារសិទ្ធិមនុស្សអន្តរជាតិ។ នៅដើមសប្តាហ៍ ប្រទេសកាណាដា ទើបបានប្រកាសដកហូតមកវិញ សញ្ជាតិកិត្តិយសកាណាដា ពីលោកស្រីអ៊ុងសានស៊ូជី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ