កាសែត៖ ចំនួនអ្នកឆ្លងមេរោគអេដស៍កើនឡើង ១៤%នៅប្រទេសចិន
ចំនួនអ្នកផ្ទុក និងមានជម្ងឺអេដស៍បានកើនឡើង ១៤ភាគរយនៅ ប្រទេសចិន។ តាមទីភ្នាក់ងារព័ត៌មានស៊ីនហួរ ដែលដកស្រង់ប្រភពពីមន្រ្តីសុខាភិបាលចិន ប្រមាណ៩០ភាគរយ នៃអ្នកឆ្លងថ្មី គឺឆ្លងតាមរយៈការរួមភេទ ប៉ុន្តែ មិនមែន ឆ្លងតាមរយៈឈាម ដូចដែលប្រទេសចិនធ្លាប់ជួបប្រទះ កាលពីមុននោះទេ។
ចុះផ្សាយនៅថ្ងៃ៖
អ្នកផ្ទុក និងកើតជម្ងឺអេដស៍ នៅប្រទេសចិន មានសរុប ជាង ៨សែននាក់ នៅឆ្នាំ២០១៨ គឺកើនឡើងប្រមាណ ១សែននាក់ ឬ ១៤ភាគរយ បើប្រៀបធៀប នឹងឆ្នាំមុន។ តាមមន្រ្តីសុខាភិបាលចិន ដែលដកស្រង់សំដីដោយទីភ្នាក់ងារព័ត៌មានចិនស៊ីនហួរ គ្រាន់តែក្នុងរយៈពេល ២ត្រីមាសដើមឆ្នាំនេះ ចំនួនអ្នកផ្ទុកមេរោគអេដស៍ថ្មី មានដល់ទៅ ៤ម៉ឺននាក់ ហើយអ្វីដែលគួរឲ្យកត់សំគាល់ គឺភាគច្រើននៃអ្នកឆ្លងមេរោគអេដស៍ថ្មី ប្រមាណ ៩៣ភាគរយ ឆ្លងតាមរយៈការរួមភេទ ដែលខុសប្លែកពីពេលមុន។
តាមទម្លាប់កន្លងមក មេរោគអេដស៍ ឆ្លងរាតត្បាតខ្លាំង នៅប្រទេសចិន គឺតាមរយៈការចាក់បញ្ចូលឈាម។ រឿងអាស្រូវ ឆ្លងមេរោគអេដស៍តាមឈាម បានផ្ទុះឡើងខ្លាំង នៅទសវត្សរ៍ ឆ្នាំ ១៩៩០ នៅពេលរដ្ឋាភិបាលចិនធ្វើយុទ្ធនាការបរិច្ចាគឈាម នៅទូទាំងប្រទេស ជាពិសេសនៅតាមទីជនបទ។ កាលណោះ មេរោគអេដស៍បានរាតត្បាតឆ្លងមនុស្សរាប់ពាន់នាក់ ដែលអាចមានមួយភូមិក៏មាន។
ប៉ុន្តែ តាមមន្រ្តីសុខាភិបាលចិន ដែលបានធ្វើបទបង្ហាញ នៅក្នុងសន្និសីទស្តីពីមេរោគអេដស៍ នៅខេត្តយូណាន នៅចុងសប្តាហ៍នេះ ការឆ្លងមេរោគអេដសន៍តាមឈាមត្រូវបានកាត់បន្ថយ សឹងដល់កម្រិតសូន្យនៅប្រទេសចិន។ ចំណែក ៨០ភាគរយនៃអ្នកជម្ងឺអេដស៍បានទទួលប្រើថ្នាំពន្យារជីវិត គិតមកនៅត្រឹមចុងឆ្នាំ ២០១៧។
ករណីឆ្លងមេរោគអេដស៍តាមឈាម ត្រូវបានកាត់បន្ថយសឹងទាំងស្រុង ប៉ុន្តែ ភាគច្រើននៃករណីឆ្លងមេរោគអេដស៍ថ្មីកើតឡើង តាមរយៈការរួមភេទ។ នៅក្នុងអត្ថបទចុះផ្សាយ របស់ប្រព័ន្ធផ្សព្វផ្សាយព័ត៌មានអង់គ្លេស BBC ការឆ្លងមេរោគអេដស៍តាមការរួមភេទ កើតឡើងច្រើនក្នុងចំណោមអ្នកដែលស្រឡាញ់ភេទដូចគ្នា នៅប្រទេសចិន។ ទោះបីជា ការស្រឡាញ់ភេទដូចគ្នា លែងជាទោសឧក្រិដ្ឋ នៅប្រទេសចិន តាំងពីឆ្នាំ ១៩៩៧ ប៉ុន្តែ ការរើសអើងនៅតែមាន។ ការសិក្សាជាច្រើនបានបង្ហាញថា ដោយសារតែសង្គមចិន នៅតែអភិរក្ស ប្រកាន់ប្រពៃណីតឹងរ៉ឹង ៧០ ទៅ ៩០ភាគរយនៃមនុស្សប្រុសដែលស្រឡាញ់មនុស្សប្រុសដូចគ្នា នៅទីបំផុត បានសម្រេចចិត្តទៅរៀបការរស់នៅជាមួយមនុស្សស្រី។ ហើយភាគច្រើននៃការឆ្លងមេរោគអេដស៍ ពីប្តីទៅប្រពន្ធ ធ្វើឡើង ដោយសារតែគ្មានការការពារ ឬការការពារដោយមិនត្រឹមត្រូវ តាមក្បួនខ្នាត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ