តើអ្វីខ្លះជាកម្មវត្ថុនៃទស្សនកិច្ចរបស់លោក ប៉ុមប៉េអូ នៅតូក្យូ ព្យុងយ៉ាង សេអ៊ូល ?
ចុះផ្សាយនៅថ្ងៃ៖
ស្តាប់ - ០៦:៣៩
ប្រមុខការទូតអាមេរិក លោក មាយ ប៉ុមប៉េអូ Mike Pompeo បានចាប់បំពេញទស្សនកិច្ចមួយជុំតូចនៅ ជប៉ុន-កូរ៉េខាងជើង-ខាងត្បូងចិន រយៈពេលបីថ្ងៃ ពីថ្ងៃទី ៦-៨តុលា។ អ្វីជាការកត់សម្គាល់ នៅក្នុងដំណើរទស្សនកិច្ចលើកនេះ លោក ប៉ុមបេអូ នឹងមានជំនួបជាមួយលោក គីម ជុងអ៊ុន ជាថ្មី ថ្ងៃស្អែក ដោយសង្ឃឹមថានឹងអាចពន្លឿនដំណើរការរៀបចំជំនួបកំពូលលើកទីពីររវាងលោកដូណាល់ ត្រាំ និងលោកគីមជុនអ៊ុន។ នៅថ្ងៃនេះលោកកំពុងស្ថិតនៅក្នុងប្រទេសជប៉ុន។
កម្មវត្ថុចំបងនេះទស្សនកិច្ចនៅអាស៊ីរបស់លោក ប៉ុមប៉េអូនេះ គឺផ្តល់សន្ទុះថ្មីដល់ការចរចារំសាយកម្មវិធីនុយក្លេអ៊ែរកូរ៉េខាងជើង។ តាំងពីព្យុងយ៉ាងនិងសេអ៊ូល ចាប់ផ្តើមមានទំនាក់ទំនងល្អនឹងគ្នាមក សកម្មភាពការទូតក្នុងតំបន់ក៏ផុសផុលខ្លាំង ស្ថានភាពក្រលាប់ចាក់ ប្រែពីសា្ថនការណ៍ហៀបនឹងផ្ទុះសង្គ្រាម ទៅជាជំនួបឆ្ពោះទៅរកសន្តិភាពរវាងប្រធានាធិបតី កូរ៉េខាងជើងនិងខាងត្បូង។ គ្រប់ប្រទេសក្នុងតំបន់ ចាប់ពង្រឹងជំហររបស់ខ្លួន ក្រោយការប្តូរផ្លាស់នេះ និងក្រោយពីវ៉ាស៊ីនតោន ត្រៀមរៀបចំជំនួបកំពូលរវាងលោក ដូណាល់ ត្រាំ និងលោក គីមជុងអ៊ុន ជាលើកទីពីរ នាពេលដ៏ខ្លីខាងមុខ ដែលអាចមានលក្ខណៈ សំខាន់ជាងជំនួបលើកទីមួយកាលពីថ្ងៃទី ១២ មិថុនា នៅសិង្ហបុរីទៅទៀត។
លួងលោមជប៉ុន
អញ្ចឹងហើយបានជាលោកប៉ុមប៉េអូ ត្រូវបំពេញទស្សនកិច្ចជាច្រើនដំណាក់ ដោយផ្តើមដំបូងគេ នៅថ្ងៃនេះ នៅប្រទេសជប៉ុន។ ជប៉ុនមានជំហរជាប្រពៃណី តឹងតែងខ្លាំងជាមួយកូរ៉េខាងជើង។ តូក្យូយឺតយ៉ាវជាងគេ តាំងពីមានការវិវឌ្ឍការទូត និងកូរ៉េទាំងពីរខិតចូលគ្នាខ្លាំង នារយៈពេលប៉ុន្មានខែនេះមក និងទន្ទេញពាក្យដដែលៗកុំឱ្យទុកចិត្តលើកូរ៉េខាងជើង លើពាក្យសន្យារំសាយនុយក្លេអ៊ែរខ្លាំងពេក។
តូក្យូមានភាពសង្ស័យច្រើន ព្រោះជប៉ុនធ្លាប់បានសាកល្បងស្នើរៀបចំជំនួបកំពូលរវាងលោក ស្ហ៊ីនហ្សូអាបេ និងលោកគីមជុងអ៊ុន ជាញយដងតែមិនសម្រេច។ ផ្ទុយទៅវិញ ព្យុងយ៉ាងតែងដំឡើងលក្ខខណ្ឌជាថ្នូរនឹងជំនួប ដោយទាមទារឱ្យជប៉ុនសងលុយចំពោះការខូចខាតបង្កឡើងដោយអាណានិគមន៍ជប៉ុនលើឧបទ្វីបកូរ៉េ និងទាមទារឱ្យបញ្ចប់ជម្លោះ រឿងចាប់ខ្លួនជនជាតិជប៉ុនជាចំណាប់ថ្នូរ នៅរវាងឆ្នាំ១៩៧០-៨០។
ក្នុងនាមជាអ្នកដឹកនាំចរចា និងដោយជប៉ុនជាសម្ព័ន្ធមិត្តជាប្រវត្តិសាស្ត្ររបស់អាមេរិកតាំងពីក្រោយសង្គ្រាមលោកលើកទីពីរមក លោកប្រមុខការទូតប៉ុមប៉េអូ ត្រូវតែឆៀងចូលជួបជប៉ុន ដើម្បីបញ្ជាក់អំពីការគាំទ្រអាមេរិកចំពោះជប៉ុន ថាមិនដោះស្រាយបញ្ហានុយក្លេអ៊ែរកូរ៉េខាងជើង ដោយមិនភ្ជាប់លក្ខខណ្ឌដែលជប៉ុនចង់បានឡើយ។ ក្រោយជំនួបជាមួយលោក ស្ហ៊ីនហ្សូ អាបេ លោក ប៉ុមប៉េអូ បានប្រកាសនឹងលើកយកបញ្ហា ចាប់ខ្លួនជនជាតិជប៉ុន ទៅនិយាយជាមួយរបបដឹកនាំកូរ៉េខាងជើង។
កូរ៉េខាងជើង-អាមេរិក មានទៅ-មានមក
គេមិនរង់ចាំលទ្ធផលអ្វីជាប្រវត្តិសាស្ត្រ ប្រសូតចេញពីជំនួបថ្ងៃស្អែកនេះទេ ក្នុងបញ្ហាចរចានុយក្លេអ៊ែរកូរ៉េខាងជើង។ នេះជាការព្រលយឱ្យដឹងរបស់លោកប៉ុមប៉េអូ។ ប៉ុន្តែនៅពេលថ្លែងទៅកាន់អ្នកសារព័ត៌មាន ពេលជិះយន្តហោះទៅតូក្យូនោះ លោក ប៉ុមប៉េអូបានបញ្ជាក់ថា បំណងនៃជំនួបស្អែកនេះ គឺផ្តល់ទំនុកចិត្តដល់អតីតគូសត្រូវជាប្រវត្តិសាស្ត្រដើម្បីបោះជំហានរួមគ្នាទៅរកសន្តិភាព និងពិសេសគឺដើម្បីពន្លឿនដំណើរការរៀបចំជំនួបកំពូលជាលើកទីពីរ រវាងលោកដូណាល់ ត្រាំ និងលោក គីម ជុងអ៊ុន ឱ្យបានមុនថ្ងៃទី ៦វិច្ឆិកា ២០១៨ ថ្ងៃបោះឆ្នោតពាក់កណ្តាលអាណត្តិនៅអាមេរិក។ បើអាចសម្រេចបានអំពីកាលបរិច្ឆេទ និងទីកន្លែងដែលប្រមុខគីម ជុងអ៊ុន ត្រូវជួបជាមួយលោកដូណាល់ត្រាំ ជាថ្មី នោះជាការប្រសើរបំផុតហើយ ! នេះបើតាមលោក ប៉ុមប៉េអូ។
លោកប្រមុខការទូត មិនសម្តែងមោទនៈហួសហេតុ ដូចលោកត្រាំ រហូតដល់ថ្នាក់ប្រើពាក្យថា “ជាប់ស្នេហ៍”លោកគីមនោះឡើយ ! ព្រោះលោកប៉ុមប៉េអូ ធ្លាប់ភ្លក្សបរាជ័យម្តងនៅក្នុងដំណើរទស្សនកិច្ចកាលពីខែកក្កដា និងធ្លាប់លុបចោលទស្សនកិច្ចកាលពីចុងខែសីហាម្តងទៀត ដោយសារការចរចាមិនត្រូវគ្នា។ ទើបតែសប្តាហ៍មុន នៅពេលបានទទួលលិខិតរបស់លោកគីម ដែលលោកត្រាំ ចាត់ទុកថា “អស្ចារ្យ”ទេ ដែលការចរចាបានតភ្ជាប់វិញ។ លោក គីម ជុងអ៊ុន បានសន្យារំលាយមជ្ឈមណ្ឌលបាលីស្ទិក ក្រោមវត្តមានអធិការបរទេស និងបិទមជ្ឈមណ្ឌលនុយក្លេអ៊ែរ yongbyon បើអាមេរិកព្រមចាត់វិធានការតបវិញ។
តើ ពាក្យប៉ុណ្ណោះអាចគ្រប់គ្រាន់នឹងប្តូរផ្លាស់ពាក្យសន្យា ទៅជាកិច្ចព្រមព្រៀងលម្អិតស្តីពីការរំសាយនុយក្លេអ៊ែរ ទាំងស្រុង ជារហូត និងអាចផ្ទៀងផ្ទាត់បាន ដូចអ្វីដែលអាមេរិកចង់បានដែរឬក៏អត់ទេ។ លោកប៉ុមប៉េអូ បានបដិសេធមិនធ្វើអត្ថាធិប្បាយអំពីលក្ខខណ្ឌដែលត្រូវតថ្លៃគ្នានេះ ដោយត្រឹមធានាថាកិច្ចពិភាក្សាកំបាំងជឿនលឿនទៅមុខ។ ប៉ុន្តែបើតាមដឹង កូរ៉េខាងជើង បានទាមទារឱ្យមានការធានាសន្តិសុខ និងចង់បានការប្រកាសបិទបញ្ចប់សង្គ្រាម មុននឹងផ្តើមរំសាយកម្មវិធីនុយក្លេអ៊ែរ។ ពីវេទិកាអង្គការសហប្រជាជាតិ ប្រមុខការទូតកូរ៉េខាងជើង បានអះអាងថា បង្ខំឱ្យកូរ៉េខាងជើងបោះបង់នុយក្លេអ៊ែរទៅមិនរួចទេ បើដរាបណាអាមេរិកមិនបង្ហាញកាយវិការធានាសន្តិភាពឱ្យរបបព្យុងយ៉ាងនោះ។
វិសមភាពនេះជាអ្វីដែលលោកប៉ុមប៉េអូ ត្រូវមកជជែកនៅថ្ងៃស្អែក។ តែនេះអាចចាត់ទុកថាភាគីទាំងពីរកំពុងស្វែងរកវិធីធ្វើសម្បទានគ្នា ឱ្យទៅ-ឱ្យមក។
នៅកូរ៉េខាងត្បូង
លោកប៉ុមប៉េអូ ត្រូវចាកចេញពីព្យុងយ៉ាង ទៅសេអ៊ូល នៅល្ងាចថ្ងៃអាទិត្យទី៧ តុលា ដើម្បីជួបប្រធានាធិបតីកូរ៉េខាងត្បូង លោកមូន ចែអ៊ីន ដែលសកម្មនិងដើរតួយ៉ាងសំខាន់ចង់បានសន្តិភាពជាមួយកូរ៉េខាងជើង។ ហើយលោកមូនចែអ៊ីន ក៏ត្រូវផ្តល់របាយការណ៍ផ្ទាល់អំពីជំនួបរបស់លោកជាមួយគីមជុងអ៊ុន កាលពីខែមុនវិញដែរ។ ភាគីទាំងពីរ ត្រូវពិគ្រោះឆ្លងយោបល់គ្នាឱ្យបានល្អ ដើម្បីធានាថាការរំសាយអាវុធនុយក្លេអ៊ែរកូរ៉េខាងជើង ជាគ្រឹះនៃសន្តិភាពក្នុងឧបទ្វីប។ កូរ៉េខាងត្បូង មិនអាចធ្វើអ្វីដែលនាំឱ្យ អាមេរិកអាចមានអារម្មណ៍ថាសេអ៊ូលធ្វើតែម្នាក់ឯង ភ្លេចកម្មវត្ថុកំណត់ដោយអាមេរិក ហើយអាមេរិកក៏ត្រូវយល់និងដឹងពីសេចក្តីត្រូវការដ៏ចាំបាច់របស់កូរ៉េខាងត្បូង ថាត្រូវធ្វើសេចក្តីប្រកាសបញ្ចប់សង្គ្រាម ដើម្បីឱ្យសំណុំរឿងនុយក្លេអ៊ែរបានទៅមុខ។
នៅប៉េកាំង
តាមគម្រោង លោកប៉ុមប៉េអូត្រូវបញ្ចប់ទស្សនកិច្ចមួយជុំនៅអាស៊ី នៅប៉េកាំង នៅថ្ងៃចន្ទទី ៨ តុលា។ ចិនគាំទ្ររបបព្យុងយ៉ាងតែរហូតមក ដូច្នេះគេមិនអាចមើលរំលងចិន ក្នុងដំណោះស្រាយបញ្ហាកូរ៉េនេះបានឡើយ។ ប៉ុន្តែនេះមិនមែនជាឱកាសល្អទេ ! គ្មានគម្រោងជួបជាមួយប្រធានាធិបតីចិនស៊ីជិនពីង លោកប្រមុខការទូតអាមេរិក មានកម្មវិធីត្រឹមជួបជាមួយសមភាគីចិន ដើម្បីជជែកអំពីបញ្ហាទ្វេភាគី តំបន់ និងពិភពលោក បែបសោះអង្គើយផង។ តាំងពីដើមឆ្នាំមក អាមេរិកនិងចិន មើលមុខគ្នាមិនចំទេ ! ចិននិងរុស្ស៊ីបានទាមទារឱ្យអាមេរិកបន្ធូរបន្ថយទណ្ឌកម្មលើកូរ៉េខាងជើង។ សង្គ្រាមពាណិជ្ជកម្ម និងការទូតបច្ចុប្បន្ននេះ បានត្រឹមតែធ្វើឱ្យជំហរប៉េកាំងកាន់តែរឹងម៉ាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ