តើអ្នកណានៅពីក្រោយការបាត់ខ្លួនប្រធានប៉ូលិសអាំងទែរប៉ូលជនជាតិចិនលោកម៉េង ហុងវៃ?
នៅថ្ងៃសៅរ៍ ទី៦ តុលា ប៉ូលិសអាំងទែរប៉ូលដែលមានទីស្នាក់ការក្នុងទីក្រុងលីយ៉ុង ប្រទេសបារាំងបានដាក់សំណើជាផ្លូវការឲ្យដ្ឋាភិបាលចិនបំភ្លឺជុំវិញការបាត់ខ្លួនប្រធានប៉ូលិសអាំងទែរប៉ូលជនជាតិចិនលោកម៉េង ហុងវៃ។ នៅក្នុងសារលើបណ្តាញសង្គម Twitter អគ្គលេខាធិការប៉ូលិសអាំងទែរប៉ូលលោក Jürgen Stock បានបញ្ជាក់ពីការរង់ចាំចម្លើយពីចិន។ ចិនដែលរហូតមកដល់ពេលនេះបានបន្តបិទមាត់មិននិយាយអ្វីមួយម៉ាត់សោះ។ គួររម្លឹកថា ដំណឹងបាត់ខ្លួនលោកម៉េង ហុងវៃត្រូវបានភរិយារបស់លោកប្រាប់ឲ្យដឹងកាលពីយប់ថ្ងៃព្រហស្បតិ៍ ទី៤ តុលា។ តាមភរិយារបស់គាត់ លោកហុងវៃបានធ្វើដំណើរទៅចិនកាលពីចុងខែកញ្ញា ហើយក៏បានបាត់ដំណឹងឈឹងសូន្យតាំងពីពេលនោះមក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១២
ក្នុងពេលកំពុងរង់ចាំការបំភ្លឺជាផ្លូវការពីរដ្ឋាភិបាលចិន មានសំណួរជាច្រើនបានចោទសួរឡើងដើម្បីចង់ដឹងថា តើលោកម៉េង ហុងវៃមិនមែនជាជនរងគ្រោះមា្នក់ថ្មីទៀតនៃយុទ្ធនាការប្រឆាំងអំពើពុករលួយរបស់លោកប្រធានាធិបតីចិនស៊ី ជីនពីងទេ ឬយ៉ាងណា?។ គួររម្លឹកថាតាំងពីឡើងកាន់តំណែងប្រធានាធិបតីចិនក្នុងឆ្នាំ ២០១២ លោកស៊ីបានផ្តើមយុទ្ធនាការបោសសំអាតជនពុករលួយគ្រប់ជាន់ថ្នាក់តាំងពីថ្នាក់កំពូលដល់ថ្នាក់ទាប។ តាមតួលេខផ្លូវការ មានអ្នកទទួលខុសត្រូវចិនចំនួន ១លាន ៥សែននាក់បានជាប់ក្នុងសំណាញ់យុទ្ធនាការមួយនេះ។ តែក្រុមអង្គការការពារសិទ្ធិមនុស្សបានបរិហារចិនពីបទបានប្រើយុទ្ធនាការមួយនេះធ្វើជាលេសដើម្បីបំបិទមាត់អ្នកប្រឆាំងខ្លួន។
ករណីបាត់ខ្លួនលោកម៉េង ហុងវៃអាចជាភស្តុតាងជាក់ស្តែងមួយ ព្រោះមុននឹងជាប់ឆ្នោតជាប្រធានប៉ូលិសអាំងទែរប៉ូលសម្រាប់រយៈពេល ៤ឆ្នាំក្នុងខែវិច្ឆិកា ឆ្នាំ ២០១៦ លោកម៉េង ហុងវៃធា្លប់បានកាន់តំណែងជាអនុរដ្ឋមន្រ្តីក្រសួងសន្តិសុខសាធារណៈចិនដែលលោកហ្ស៊ូ យ៉ុងកាងបានប្រគល់ឲ្យក្នុងឆ្នាំ ២០០៤។ តែគេមិនត្រូវភ្លេចនិយាយទេថា លោកហ្ស៊ូ យ៉ុងកាងដែលជាគូប្រជែងរបស់លោកស៊ី ជីនពីង និងជាឥស្សរជនជាន់ខ្ពស់ម្នាក់របស់ចិនត្រូវបានកាត់ទោសញាត់គុកក្នុងខែមិថុនា ឆ្នាំ ២០១៥ ពីបទពុករលួយ រំលោភអំណាច និងទម្លាយព័ត៌មានសម្ងាត់របស់រដ្ឋ។ បន្ទាប់មកក្នុងឆ្នាំ ២០១៦ ភរិយា និងកូនប្រុសរបស់លោកយ៉ុងកាងក៏ត្រូវបានកាត់ទោសដាក់គុកពីបទពុករលួយ។
អ៊ីចឹងហើយបានជាមានការលើកឡើងថា តើការបាត់ខ្លួនលោកម៉េង ហុងវៃពេលនេះមិនមែនជាចំណាត់ការរបស់រដ្ឋាភិបាលចិនក្នុងការតាមកំចាត់មនុស្សជំនិត ឬមនុស្សមានឥទ្ធិពលរបស់លោកហ្ស៊ូ យ៉ុងកាងទេ ឬយ៉ាងណា?។ មានតែរដ្ឋាភិបាលចិនម្នាក់គត់ដែលអាចឆ្លើយនឹងសំណួរនេះបាន។ គួររម្លឹកថាក្នុងរយៈពេលប៉ុន្មានឆ្នាំចុងក្រោយនេះ មានអ្នកទទួលខុសត្រូវជាន់ខ្ពស់ចិនជាច្រើននាក់បានបាត់ខ្លួនដោយគ្មានមូលហេតុអស់ជាច្រើនសប្តាហ៍ ឬច្រើនខែ មុននឹងចិនបានចេញមុខសារភាពថា អ្នកទាំងនោះត្រូវបានខ្លួនចាប់ឃុំដើម្បីសួរចម្លើយនៅក្នុងក្របខណ្ឌអំពើពុករលួយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ