ធនាគារពិភពលោក៖គម្រោងផ្លូវមួយ ខែ្សក្រវ៉ាត់មួយនឹងជួយការខ្វះខាតផ្នែកហេដ្ឋារចនាសម្ព័ន្ធ
ប្រទេសដែលត្រូវឆ្លងកាត់ ដោយសារ ផ្លូវមួយខ្សែក្រវ៉ាត់មួយរបស់ចិន នឹងមានបំណុលកើនឡើងមែនហើយ ប៉ុន្តែ ជាមួយគ្នានោះ គម្រោងវិនិយោគរបស់ចិន ក៏ជាការឆ្លើយតបផងដែរ ទៅនឹងការខ្វះខាតហេដ្ឋារចនាសម្ព័ន្ធ ដ៏ចំបង នៅក្នុងបណ្តាប្រទេសក្រីក្រ និងកំពុងអភិវឌ្ឍ។ នេះបើតាមការវាយតម្លៃរបស់មន្រ្តីធនាគារពិភពលោក ដែលកំពុងបើកការប្រជុំប្រចាំឆ្នាំរបស់ខ្លួននៅថ្ងៃសៅរ៍ នេះ នៅកោះ បាលី ប្រទេសឥណ្ឌូណេស៊ី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៥
ធនាគារពិភពលោកទទួលស្គាល់ ថា ផ្លូវមួយ ខ្សែក្រវ៉ាត់មួយ ដែលជាគម្រោងវិនិយោគមហាសាលរបស់ចិនធ្វើឲ្យប្រទេសមួយចំនួន ធ្លាក់ខ្លួន ជាប់បំណុលកាន់តែច្រើន។ ក៏ប៉ុន្តែ ជាមួយ គ្នានេះ គម្រោងវិនិយោគរបស់ចិន តម្លៃ ៦០ពាន់លានដុល្លារ ដែលមានប្រទេសចូលរួម ចំនួន ៧០ នៅក្នុងពិភពលោក ក៏នឹងជួយស្តារហេដ្ឋារចនាសម្ព័ន្ធ ដែលកំពុងខ្វះខាតច្រើន ជាពិសេស នៅតំបន់អាស៊ី។
និយាយនៅក្រៅកិច្ចប្រជុំប្រចាំឆ្នាំ នៅកោះបាលី ប្រធានផ្នែកម៉ាក្រូសេដ្ឋកិច្ចរបស់ធនាគារពិភពលោក លោកស្រី Caroline Freund បានវាយតម្លៃថា គម្រោងការផ្លូវមួយ ខ្សែក្រវ៉ាត់មួយរបស់ចិន នឹងផ្តល់ប្រយោជន៍ច្រើនដល់ការដោះដូរពាណិជ្ជកម្មពិភពលោក ទៅថ្ងៃអនាគត។
គម្រោងផ្លូវមួយ ខ្សែក្រវ៉ាត់មួយ ត្រូវបានប្រធានាធិបតីចិន លោកស៊ី ជីនពីង ប្រកាសបង្កើតឡើងនៅឆ្នាំ ២០១៣។ គម្រោងការរបស់ទីក្រុងប៉េកាំង ផ្តោតទៅលើការកសាងកំពង់ផែ ស្ពាន ផ្លូវថ្នល់ ផ្លូវដែក ដើម្បីតភ្ជាប់ ពីអាស៊ី ទៅតំបន់អឺរ៉ុប។ សម្រាប់មន្រ្តីធនាគារពិភពលោក ឱកាសបានមកពីគម្រោងការផ្លូវមួយ ខ្សែក្រវ៉ាត់មួយមានច្រើនណាស់ តាំងពីការកសាងហេដ្ឋារចនាសម្ព័ន្ធក្នុងប្រទេស ឬដើម្បីតភ្ជាប់រវាងប្រទេស និងប្រទេស ក្នុងតំបន់។ រចនាសម្ព័ន្ធអន្តរប្រទេសនេះនឹងជួយកាត់បន្ថយការចំណាយលើការដឹកជញ្ជូន ជំរុញឲ្យមានកំណើនសេដ្ឋកិច្ច ហើយនិងការអភិវឌ្ឍន៍តំបន់ដែលធ្លាប់ តែនៅដាច់ស្រយាល ពីគេឯង។
ប្រធានមូលនិធិរូបិយវត្ថុអន្តរជាតិប្រចាំ តំបន់អាស៊ីកណ្តាលយល់ស្របជាមួយ ធនាគារពិភពលោក ដោយថា ដោយមកតែពីផ្លូវមួយ ខ្សែក្រវ៉ាត់មួយ ប្រទេសជាច្រើននៅតំបន់អាស៊ីកណ្តាលនឹងទទួលបានអត្ថប្រយោជន៍ច្រើនពីការដោះដូរពាណិជ្ជកម្មអន្តរតំបន់។
សម្រាប់មជ្ឈមណ្ឌល ការអភិវឌ្ឍន៍ជាសកល គម្រោងការផ្លូវមួយ ខ្សែក្រវ៉ាត់មួយរបស់ចិន នៅតែជាគ្រោះថ្នាក់ និងការប្រឈមខ្លាំង សម្រាប់ប្រទេសមួយចំនួន ដែលកំពុងមានវិបត្តិប្រាក់បំណុល។ ឧទាហរណ៍ ប្រទេសចំនួន ៨ ដូចជា ប៉ាគីស្ថាន ឡាវ ម៉ុងហ្គោលី ជាដើម ដែលមានប្រាក់បំណុលខ្ពស់ច្រើនរួចហើយនោះ។ ប៉ាគីស្ថានដែលបានចុះហត្ថលេខាចូលរួមក្នុងគម្រោងផ្លូវមួយ ខ្សែក្រវ៉ាត់មួយជាមួយ ទីក្រុងប៉េកាំង នៅសប្តាហ៍នេះ កំពុងរត់រកប្រាក់កម្ចីបន្ទាន់ ពីមូលនិធិរូបិយវត្ថុអន្តរជាតិIMF។ ចំណែកស្រីលង្កាវិញ ដែលមានគ្មានសមត្ថភាពសងប្រាក់បំណុលទៅឲ្យប្រទេសចិន បានសុខចិត្តប្រគល់កំពង់ផែ ទឹកជ្រៅមួយរបស់ខ្លួន ទៅឲ្យក្រុមហ៊ុនរដ្ឋចិនកាន់កាប់។ មន្រ្តីរបស់IFMបានព្រមានពីការកើនឡើងប្រាក់បំណុលរបស់ប្រទេសទន់ខ្សោយ ដែលគ្មានសមត្ថភាពបង់សងម្ចាស់បំណុល ដែលគ្មានអ្នកណាក្រៅតែពីប្រទេសចិន។
នៅសប្តាហ៍នេះ របាយការណ៍មួយរបស់ក្រសួងសេដ្ឋកិច្ចបារាំង បានកោតសរសើរគម្រោងផ្លូវមួយ ខ្សែក្រវ៉ាត់មួយរបស់ចិន ប៉ុន្តែ ជាមួយគ្នានោះ គេបានវាយតម្លៃថា នៅក្នុងគម្រោងដែលមានការចូលរួមតិចតួចបំផុត ប្រមាណ ៣ភាគរយ របស់ក្រុមហ៊ុនបរទេស នឹងផ្តល់ប្រយោជន៍៩១ភាគរយ ដល់ទីក្រុងប៉េកាំង។ គេបានលើកយកករណីជាក់ស្តែង នៅប្រទេសប៉ាគីស្ថាន ដែលថា នៅក្នុង៤០ឆ្នាំខាងមុខ ប្រាក់ចំណូលដែលបានមកពីការអភិវឌ្ឍនៅកំពង់ផែGwadar នឹងបានទៅលើក្រុមហ៊ុន ចិន ដែលប្រើសុទ្ធតែពលករមកពីស្រុកចិន សម្រាប់ការដ្ឋានសាងសង់នៅប៉ាគីស្ថាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ