រដ្ឋមន្ត្រីការពារជាតិអាមេរិក ធ្វើទស្សនកិច្ចទៅអតីតឃ្លាំងស្តុកធាតុគីមីក្នុងសម័យសង្គ្រាមវៀតណាម
រដ្ឋមន្ត្រីការពារជាតិអាមេរិកលោក Jim Mattis នៅថ្ងៃពុធទី១៧ តុលានេះ បានធ្វើដំណើរទៅដល់ភាគខាងត្បូងនៃប្រទេសវៀតណាម ជាតំបន់ដែលសហរដ្ឋអាមេរិកធ្លាប់ប្រើសម្រាប់ស្តុកសារធាតុគិមី Agent Orange ក្នុងសម័យសង្គ្រាម។ ដំណើរទស្សនកិច្ចនេះ ត្រូវបានគេមើលឃើញថា ជាសញ្ញាវិជ្ជមានបង្ហាញពីការប្តេជ្ញាចិត្តរបស់សហរដ្ឋអាមេរិក ក្នុងការដោះស្រាយវិបត្តិដែលបន្សល់ទុកដោយសារធាតុគីមី ជាមួយនឹងប្រទេសវៀតណាម រាប់សិបឆ្នាំមកហើយ។។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៥
“អាមេរិកបានសន្យាហើយថានឹងជួយ...ដូច្នេះហើយអាមេរិកត្រូវតែរក្សាពាក្យសន្យារបស់ខ្លួនដើម្បីដោះស្រាយបញ្ហាពីអតីតកាលជាមួយប្រទេសវៀតណាម"។ នេះជាការថ្លែងរបស់លោក Jim Mattis រដ្ឋមន្ត្រីការពារជាតិអាមេរិក ប្រាប់ទៅកាន់អ្នកសារព័ត៌មាន នៅក្បែរកន្លែងដែលគេធ្លាប់ស្តុកសារធារតុគីមី ក្នុងប្រទេសវៀតណាម។
ទាញចេញពីការលើកឡើងរបស់លោក Jim Mattis អង្គការសង្គមស៊ីវិលមើលឃើញថា វាជាការវិវឌ្ឍវិជ្ជមានមួយ ពីព្រោះថាវាឆ្លុះបញ្ចាំងឲ្យឃើញពីការប្តេជ្ញាចិត្ត របស់ក្រសួងការពារជាតិអាមេរិក ក្នុងការដោះស្រាយបញ្ហាដែលបន្សល់ទុកដោយសារធាតុគីមី។ ដែលនេះខុសផ្ទុយស្រឡះ ពីគ្រាកន្លងមក ដែលរដ្ឋាភិបាលសហរដ្ឋអាមេរិក មិនដែលធ្លាប់បានបង្ហាញជំហរជាក់លាក់ណាមួយ ក្នុងការទទួលខុសត្រូវចំពោះបញ្ហានេះឡើយ។
សូមរំឭកថា ក្នុងចន្លោះឆ្នាំ១៩៦២ ដល់ ឆ្នាំ១៩៧១ សហរដ្ឋអាមេរិកបានបាញ់សារធាតុគីមី Agent Orange ចំនួន៨០ លានលីត្រ ដើម្បីវាយប្រហារទ័ពព្រៃកុម្មុយនិស្តវៀតកុង នៅភាគខាងត្បូងនៃប្រទេសវៀតណាម។ ហើយបើតាមរដ្ឋាភិបាលវៀតណាម មានប្រជាជនវៀតណាមរហូតដល់ ៣លាននាក់ បានទទួលរងគ្រោះថ្នាក់ដោយសារចំហាយសារធាតុគីមី។ មិនតែប៉ុណ្ណោះ នាពេលបច្ចុប្បន្ននេះ ប្រជាជនវៀតណាមចំនួនមួយលាននាក់ កំពុងរងផលប៉ះពាល់សុខភាពយ៉ាងធ្ងន់ធ្ងរ ពីឥទ្ឋិពល ដែលនៅតែបន្តមាន ពីសារធាតុគីមី ហើយដែលក្នុងនោះក៏មានកុមារចំនួន ១៥ម៉ឺននាក់ផងដែររងគ្រោះ ដោយពិការភាពពីកំណើត។
គួរជ្រាបផងដែរថា មានខេត្តចំនួន៣ ក្នុងប្រទេសវៀតណាមដែលរងគ្រោះដោយសារធាតុគីមី បន្សល់ទុកតាំងពីសម័យសង្គ្រាមវៀតណាម បើទោះវាបានបញ្ចប់ទៅអស់រយៈពេលជាង៤ ទសវត្សរ៍ទៅហើយក្តី។ ដោយឡែក បើយោងតាមមន្រ្តីរដ្ឋាភិបាលអាមេរិក មានទឹកប្រាក់ចំនួនប្រមាណជា ៣៩០ លានដុល្លារ ត្រូវបានអនុម័តនៅក្រោមរដ្ឋបាល លោកបារ៉ាក់អូបាម៉ា គឺដើម្បីបោសម្អាតកន្លែងដែលនៅតែមានសារធាតុគីមី នៅក្នុងប្រទេសវៀតណាម នាពេលបច្ចុប្បន្ននេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ