ប្រមុខរដ្ឋាភិបាលថៃ និងម៉ាឡេស៊ីជួបគ្នាដើម្បីនិយាយពីបញ្ហានៅប៉ែកខាងត្បូងប្រទេសថៃ
នៅថ្ងៃពុធ ទី២៤ តុលា លោកនាយករដ្ឋមន្រ្តីថៃប្រាយុទ្ធ ចាន់អូចា និងសមភាគីម៉ាឡេស៊ីលោកម៉ាហាទារ ម៉ូហាម៉ាដជួបពិភាក្សាគ្នាក្នុងទីក្រុងបាងកក។ កម្មវត្ថុនៃជំនួប គឺដើម្បីព្យាយាមផ្តល់សន្ទុះឡើងវិញនូវអភិក្រមសន្តិភាពនៅតំបន់ប៉ែកខាងត្បូងដែលសំបូរដោយអ្នកកាន់សាសនាអ៊ីស្លាមរស់នៅ។ តាំងពីជិត ១៥ឆ្នាំកន្លងទៅ តំបន់មួយនេះបានទទួលរងការងើបបះបោរពីក្រុមអ្នកទាមទារផ្តាច់ទឹកដីនិយម និងបណ្តាលឲ្យមានមនុស្សសម្លាប់ជិត ៧ ០០០នាក់ដែលភាគច្រើនជាជនស៊ីវិល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៧
តាំងពីបានជាប់ឆ្នោតក្លាយជានាយករដ្ឋមន្រ្តីម៉ាឡេស៊ីក្នុងខែឧសភាមក នេះជាលើកទី១ ដែលលោកម៉ាហាទារ ម៉ូហាម៉ាដអញ្ជើញទៅបំពេញទស្សនកិច្ចក្នុងប្រទេសថៃក្បែរខាង។ តែកម្មវត្ថុអាទិភាពនៅក្នុងជំនួបជាមួយសមភាគីថៃលោកប្រាយុទ្ធ ចាន់អូចា គឺផ្តល់សន្ទុះកិច្ចចរចាសន្តិភាពនៅតំបន់ប៉ែកខាងត្បូងប្រទេសថៃជាប់ព្រំដែនម៉ាឡេស៊ី។ គួររម្លឹកថាតាំងពីឆ្នាំ ២០០៤ តំបន់ដែលសំបូរដោយអ្នកកាន់សាសនាអ៊ីស្លាមរស់នៅមួយនេះបានទទួលរងការតស៊ូប្រដាប់អាវុធពីក្រុមឧទ្ទាមអ្នកទាមទារផ្តាច់ទឹកដីនិយមដោយបណ្តាលឲ្យមានមនុស្សស្លាប់ជិត ៧ ០០០នាក់ដែលភាគច្រើនជាជនស៊ីវិល។
តែគេសង្កេតឃើញថាក្នុងរយៈពេលប៉ុន្មានឆ្នាំចុងក្រោយនេះ ពោលតាំងពីក្រោយរដ្ឋប្រហារយោធាក្នុងឆ្នាំ ២០១៤ មក អំពើភេរវកម្ម និងការវាយឆ្មក់របស់ពួកឧទ្ទាមហាក់មិនសូវកើតឡើងញឹកញាប់ទេ។ នេះក៏ដោយសារថា របបសឹកបានចាត់វិធានការចាស់ដៃមួយចំនួន ដូចយ៉ាងពង្រឹងកម្លាំងបន្ថែម និងការដាក់បំរាមគោចរនៅក្នុងតំបន់ជាដើម។ គិតក្នុងរយៈពេល ១០ឆ្នាំ ចំនួនមនុស្សស្លាប់បានធ្លាក់ពី ៩០០នាក់ក្នុងឆ្នាំ ២០០៧ មកនៅត្រឹម ២៣៥នាក់ក្នុងឆ្នាំ ២០១៧ កន្លងទៅ។ តែទោះជាយ៉ាងណាក្តី ការតស៊ូ និងការទាមទាររបស់ពួកឧទ្ទាមនៅបន្តក្តៅគគុកដដែល។
ចំណែកដំណើរការចរចារវាងរដ្ឋាភិបាលក្រុងបាងកង និងពួកឧទ្ទាមក៏កំពុងបន្តជាប់គាំងដោយសារតែរដ្ឋាភិបាលពិបាកក្នុងការប្រមូលក្រុមឧទ្ទាមឲ្យចូលតុចរចាបាន។ មួយវិញទៀត ពួកឧទ្ទាមក៏ត្រូវបានបំបែកជាក្រុម ឬចលនាជាច្រើនដែលរដ្ឋាភិបាលពិបាកនឹងកំណត់អត្តសញ្ញាណឲ្យបានច្បាស់លាស់។ កាលពីប៉ុន្មានសប្តាហ៍កន្លងទៅ ថៃ និងម៉ាឡេស៊ីបានបង្កើតក្រុមអ្នកតំណាងថ្មីដើម្បីដឹកនាំការចរចា។
តែក្រុមអ្នកសង្កេតការណ៍បានមើលឃើញថា ក្នុងពេលដែលថៃគ្រោងរៀបចំបោះឆ្នោតជាតិនៅដើមឆ្នាំ ២០១៩ ខាងមុខ ពេលវេលាដើម្បីធ្វើការងារសំខាន់ និងរសើប ដូចយ៉ាងកិច្ចចរចាសន្តិភាពជាមួយពួកឧទ្ទាមប្រហែលមិនអាចទៅរួចទេ។ នៅខាងក្រុមឧទ្ទាមវិញ មានក្រុមឧទ្ទាមខ្លះបានបញ្ជាក់ថា ខ្លួននឹងមិនចូលតុចរចាទេ ដរាបណាថៃគ្មានរដ្ឋាភិបាលប្រជាធិបតេយ្យជាប់ឆ្នោតតាមរយៈការបោះឆ្នោតទេនោះ។ រីឯក្រុមឧទ្ទាមខ្លះទៀតមិនត្រូវបានរដ្ឋាភិបាលរាប់បញ្ចូលជាភាគីដែលត្រូវចរចាជាមួយឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ