គណបក្សប្រឆាំង ភឿថៃរបស់អតីតនាយករដ្ឋមន្រ្តីទម្លាក់ចេញពីតំណែង បោះឆ្នោតរើសប្រធានបក្ស
ភឿថៃ គណបក្សប្រឆាំងធំជាងគេនៅប្រទេសថៃ បានបោះឆ្នោតជ្រើសរើសប្រធានបក្សថ្មី នៅថ្ងៃអាទិត្យម្សិលមិញ ដើម្បីត្រៀមចូលរួម នៅក្នុងការបោះឆ្នោតសភា ដែលរបបសឹកបានប្រកាសគម្រោងរៀបចំ នៅចុងខែកុម្ភៈ ឆ្នាំក្រោយ។ ការបោះឆ្នោតជ្រើសរើសក្បាលម៉ាស៊ីនបក្សភឿថៃ ធ្វើឡើង នៅក្រោយគណបក្សប្រឆាំងមួយនេះ រងការគំរាម រំលាយចោល ពីខាងគណៈកម្មាធិការរៀបចំការបោះឆ្នោត ក្នុងករណីគេរកឃើញថា គណបក្សនៅមានជាប់ពាក់ព័ន្ធជាមួយ លោកថាក់ស៊ីន ហើយនិងលោកស្រីយីងឡាក់ ដែលកំពុងរស់នៅនិរទេសខ្លួននៅបរទេស។
ចុះផ្សាយនៅថ្ងៃ៖ កែប្រែថ្ងៃទី៖
នៅថ្ងៃអាទិត្យ នៅទីក្រុងបាងកក គណបក្សភឿថៃ ដែលធ្លាប់គាំទ្រអតីតនាយករដ្ឋមន្រ្តីថៃ ត្រកូលស៊ីណាវ៉ាត បានសម្រេចបោះឆ្នោតជ្រើសរើសប្រធានបក្ស ដែលគ្មានជាប់សាច់ញាតិទាល់តែសោះ នឹងគ្រួសាររបស់លោកថាក់ស៊ីន។ ដឹកនាំគណបក្សភឿថៃ ចាប់តាំងពីរដ្ឋប្រហារ នៅឆ្នាំ ២០១៤ លោកវីរោធ ប៉ៅអីន ត្រូវបានគណបក្សបោះឆ្នោត ឲ្យធ្វើជាប្រធានបក្សជាផ្លូវការសម្រាប់ការបោះឆ្នោតសភា នៅឆ្នាំក្រោយ។ លោកវីរោធ ប៉ៅអ៊ីន ក្លាយជាប្រធានបក្ស ប៉ុន្តែ មិនប្រាកដថា នឹងក្លាយជាបេក្ខជនសម្រាប់តំណែងនាយករដ្ឋមន្រ្តីនោះទេ។ តាមលោកស្រី សុដារ៉ាត់ កេយូរ៉ាផាន់ អ្នកនាំពាក្យ និងប្រធានគណៈកម្មាធិការយុទ្ធសាស្រ្តរបស់គណបក្សភឿថៃ ពីពេលនេះ រហូតដល់ដើមឆ្នាំក្រោយ គណបក្សនឹងចុះពង្រឹងតាមមូលដ្ឋាន ស្វែងរកមតិគាំទ្រ មុនសម្រេចជ្រើសរើសបេក្ខជនសម្រាប់តំណែងនាយករដ្ឋមន្រ្តី។
គណបក្សភឿថៃ បានសម្រេចបោះឆ្នោត ជ្រើសរើសប្រធានបក្ស នៅពេលនេះ ដើម្បីត្រៀមចូលរួមក្នុងការបោះឆ្នោតនៅឆ្នាំក្រោយផង និងបញ្ជាក់ច្បាស់ថា គណបក្សគ្មានបានរងឥទ្ធិពលពីខាងគ្រួសាររបស់លោកថាក់ស៊ីននោះទេ។ ថ្មីៗ មានការចុះផ្សាយពីខាងកាសែតក្នុងស្រុកថៃ ថា គណៈកម្មាធិការ រៀបចំការបោះឆ្នោត ថៃ បានគំរាមរំលាយចោលគណបក្សភឿថៃ ដែលគេសង្ស័យថា បានរំលោភច្បាប់បោះឆ្នោត តាមរយៈ ការបើកឱកាសឲ្យមនុស្សខាងក្រៅ (លោកថាក់ស៊ីន) ជាអ្នកមានសិទ្ធិសម្រេច លើខ្សែបន្ទាត់នយោបាយរបស់គណបក្ស។
សម្រាប់អ្នកតាមដាននយោបាយប្រទេសថៃ គេនៅមិនទាន់ច្បាស់ទេថា គណបក្សភឿថៃ នឹងអាចឈ្នះឆ្នោត ដោយគ្មានការជួយគាំទ្រ ពីខាងត្រកូលស៊ីណាវ៉ាត់។ គ្រួសាររបស់លោកមហាសេដ្ឋី ថាក់ស៊ីន ដែលទទួលបានការគាំទ្រពីប្រជាជននៅតាមទីជនបទ តែងតែឈ្នះឆ្នោត ដឹកនាំរដ្ឋាភិបាលតាំង ពីឆ្នាំ ២០០១។ ប្អូនស្រីរបស់លោកថាក់ស៊ីនគឺលោកស្រីយីងឡាក់ ទើបតែរត់គេច ទៅនិរទេសខ្លួន នៅបរទេស នៅក្រោយ ក្រុមយោធា ធ្វើរដ្ឋប្រហារទម្លាក់ចេញពីតំណែងនាយករដ្ឋមន្រ្តី កាលពីឆ្នាំ ២០១៤។
ថ្មីៗនេះ លោកប្រាយុទ្ធ ចាន់អូចា ដែលបានធ្វើរដ្ឋប្រហារ ដឹកនាំរដ្ឋាភិបាលសឹកថៃ ៤ឆ្នាំមកហើយ និងបន្ទាប់ពីប្រកាសលើកពេលបោះឆ្នោត ជាច្រើនសា ទើបបានប្រកាសរៀបចំការបោះឆ្នោតសភា នៅឆ្នាំក្រោយ។ របបសឹកថៃ បានលើកបម្រាមមួយផ្នែក ដើម្បីអនុញ្ញាតឲ្យគណបក្សនយោបាយអាចដំណើរការឡើងវិញ ដើម្បីត្រៀមចូលរួម ក្នុងការបោះឆ្នោត នៅចុងខែកុម្ភៈឆ្នាំក្រោយ។
លោកប្រាយុទ្ធចាន់អូចា វិញ ក៏កំពុងត្រួសត្រាយផ្លូវ ដើម្បី ចូលរួម នៅក្នុងការបោះឆ្នោត ជ្រើសរើសរដ្ឋាភិបាលស៊ីវិលដែរ។ ការបង្កើតគណនីហ្វេសប៊ុក ផ្ទាល់ខ្លួន របស់លោកចាន់អូចា ជាភស្តុតាងស្រាប់។ ម្យ៉ាងទៀត មន្រ្តីសំខាន់ៗ ៤រូបរបស់លោក កាលពីចុងខែកញ្ញា បានចេញទៅបង្កើតគណបក្សថ្មី មួយឈ្មោះថា ប៉ាឡង់ ប្រាចារ៉ាត់ ដែលគេជឿថា នឹងបោះឆ្នោត ជ្រើសរើសលោកប្រាយុទ្ធ ចាន់អូចា ឲ្យធ្វើជាបេក្ខជននាយករដ្ឋមន្រ្តី តំណាងគណបក្ស។ នៅក្នុងបទសម្ភាសន៍កន្លងទៅ លោកប្រាយុទ្ធ ចាន់អូចា មិនបានលាក់លៀមទេថា លោកចង់នៅបន្ត ស្ថិតនៅក្នុងរដ្ឋាភិបាល ដើម្បីឲ្យប្រាកដក្នុងចិត្ត ថា ខ្សែបន្ទាត់នយោបាយ ដែលលោកបានកំណត់ ត្រូវបានអនុវត្តទាំងស្រុង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ