ប្រទេសចិន អនុញ្ញាតឱ្យមានការជួញដូរសត្វខ្លា-រមាស តែមានលក្ខខណ្ឌ
ប្រទេសចិន កាលពីថ្ងៃចន្ទទី២៩ តុលាបានប្រកាសអនុញ្ញាតឱ្យមានការជួញដូរសត្វខ្លា និង សត្វរមាស ប៉ុន្តែសម្រាប់ប្រើតែក្នុងគោលបំណងទាក់ទងនឹងការងារ វិទ្យាសាស្ត្រ-វេជ្ជសាស្រ្ត និងវប្បធម៌ប៉ុណ្ណោះ។ ការប្រកាសនេះធ្វើឡើង ក្រោយពីអាជ្ញាធរចិនរកឃើញថា ការលួចជួញដូរប្រភេទសត្វកម្រទាំងនេះ កំពុងមានការកើនឡើង នារយៈពេលចុងក្រោយនេះ។
ចុះផ្សាយនៅថ្ងៃ៖ កែប្រែថ្ងៃទី៖
ក្រុមប្រឹក្សាពាណិជ្ជកម្មចិន បាននិយាយនៅក្នុងសេចក្តីថ្លែងការណ៍មួយថា ការលួចជួញដូរប្រភេទសត្វកម្រ ជារឿងមិនអាចលើកលែងបានឡើយ ហើយរដ្ឋាភិបាលទីក្រុងប៉េកាំង នឹងអនុម័តលើការដាក់ពិន័យទោសថ្មីមួយ ទៅលើជនល្មើស ក្នុងពេលចាប់ៗខាងមុខនេះ។
តែទោះជាយ៉ាងនេះក្តី អាជ្ញាធរចិន ក៏បានប្រកាសឲ្យបន្តមានទីផ្សារទិញ-លក់ សត្វរមាស និងសត្វខ្លាផងដែរ ប៉ុន្តែការអនុវត្តន៍នេះ អាចធ្វើបានតែក្នុងករណីពិសេសៗប៉ុណ្ណោះ ដែលក្នុងនោះរួមមាន ការប្រើប្រាស់សម្រាប់មន្ទីរពិសោធន៍ខាងផ្នែកវិទ្យសាស្ត្រ ការស្រាវជ្រាវវេជ្ជសាស្ត្រ និងក្នុងលក្ខខណ្ឌផ្សព្វផ្សាយវប្បធម៌ជាតិ គឺយកធ្វើជាវត្ថុបុរាណ។
ទាក់ទងនឹងរឿងនេះដែរ អ្នកអភិរក្សសត្វព្រៃ នាពេលថ្មីៗនេះ បានសម្តែងនូវការព្រួយបារម្ភចំពោះការបន្តអនុញ្ញាតឱ្យមានការជួញដូរសត្វខ្លាសត្វរមាសរបស់អាជ្ញាធរចិននេះ។ ជាក់ស្តែង អ្នកភិរក្សសត្វព្រៃរបស់មូលនិធិសត្វព្រៃពិភពលោក WWF បានលើកឡើងថា ការជួញដូរក្នុងរូបភាពណាក៏ដោយ វានឹងជំរុញឲ្យមានការបាត់បង់ជីវិតប្រភេទសត្វកម្រទាំងនោះ។ ហើយក្នុងបរិបទនេះ ការបង្ក្រាបការជួញដូរសត្វព្រៃនឹងត្រូវជួបឧបសគ្គ។
គួររឭកថា ប្រទេសចិនបានផ្តើមហាមឃាត់ការជួញដូរឆ្អឹងសត្វខ្លានិងរមាស ដំបូងក្នុងឆ្នាំ១៩៩៣ និងបានដាក់ហាមឃាត់លើការលក់ភ្លុកដំរី ជាធរមាននៅក្នុងខែធ្នូ ឆ្នាំ ២០១៧។ ប៉ុន្តែទន្ធឹកនៃចរាចរណ៍លក់ដូរតាមទីផ្សារងងឹត នៅតែមានច្រើន ចូលក្នុងប្រទេសចិនពីប្រទេសវៀតណាម។ នេះបើយោងតាមការស៊ើបអង្កេត ដែលបានធ្វើឡើងកាលពីឆ្នាំមុន ដោយក្រុមអភិរក្សសត្វដំរី។
សូមជម្រាបផងដែរថា ភ្លុកដំរី ត្រូវបានគេចាត់ទុកថាជានិមិត្តសញ្ញាមួយ របស់ប្រទេសចិន។ មួយវិញទៀត បើទោះជាអាជ្ញាធរចិន នៅក្នុងប៉ុន្មានឆ្នាំថ្មីៗនេះ បានខិតខំប្រឹងប្រែងបង្ក្រាបការលក់ដូរផលិតផលសត្វព្រៃខុសច្បាប់ ដូចជាប្រភេទភ្លុកដំរី ខ្នាយរមាស យ៉ាងណាក៏ដោយ ក៏ការលួចជួញដូរសត្វព្រៃ នៅតែបន្តកើតក្នុងស្រុកចិនដដែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ