សន្និសីទអន្តរជាតិ នៅម៉ូស្គូ ដើម្បីស្វែងរកសន្តិភាពឲ្យអាហ្វហ្កានីស្ថាន
រុស្ស៊ី-អាហ្វហ្កានីស្ថាន ថ្ងៃសុក្រ ៩ វិច្ឆិកា រុស្ស៊ី ធ្វើជាម្ចាស់ផ្ទះទទួល សន្និសីទអន្តរជាតិស្តីអំពីអាហ្វហ្កានីស្ថាន ដើម្បី រួមវិភាគទាន ទៅក្នុងបុព្វហេតុបើកជា កិច្ចចរចាត្រង់ផ្ទាល់ រវាងរដ្ឋាភិបាលក្រុង កាប៊ូល និងពួកឧទ្ទាម តាលីបង់ ហើយ ស្វែងរកដំណោះស្រាយដោយសន្តិវិធី ឲ្យជម្លោះអាហ្វហ្កានីស្ថាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤០
ថ្លែងពេលបើកសន្និសីទនេះ រដ្ឋមន្ត្រីការបរទេសរុស្ស៊ីជាម្ចាស់ផ្ទះ លោក ស៊ែរហ្គៃ ឡាវ្រ៉ូវ បានអំពាវនាវ បណ្តាភាគីដែលចូលរួម ក្នុងនោះមានគណៈប្រតិភូ តាលីបង់ផង ឲ្យគិត ជាបឋម គឺ អំពី ផលប្រយោជន៍ ប្រជាជនអាហ្វហ្កានីស្ថាន មិនមែន ផលប្រយោជន៍ផ្ទាល់ខ្លួនឡើយ។ តាមសំដីគាត់ ៖ យើងប្តេជ្ញាធ្វើរាល់លទ្ធភាព ដែលយើងមាន ដើម្បីបើកទំព័រថ្មី ក្នុងប្រវត្តិអាហ្វហ្កានីស្ថាន ដោយសារការខំប្រឹងប្រែងរួមគ្នា។ លោក ឡាវ្រ៉ូវ គូសបញ្ជាក់ថា ការចូលរួមក្នុងកិច្ចប្រជុំនេះ ទាំងភាគីរដ្ឋាភិបាលអាហ្វហ្កានីស្ថាន ទាំងភាគីតាលីបង់ មានន័យ ជា ”វិភាគទានសំខាន់ផ្តល់ទៅក្នុង ការបង្កើតលក្ខណៈអនុគ្រោះ សម្រាប់បើកកិច្ចចរចាត្រង់ផ្ទាល់ រវាង ភាគី បដិបក្ខ។ លោកប្រមុខការទូតរុស្ស៊ី សង្កេតឃើញថា ៖ គ្មានជម្រើសណាផ្សេងឡើយ ក្រៅពីដំណោះស្រាយ តាមផ្លូវនយោបាយ ឲ្យអាហ្វហ្កានីស្ថាន និងតម្រូវជាចាំបាច់ ឲ្យមានការខំខ្នះខ្នែង ដោយស្រាក់កម្លាំងគ្នា ពីខាង បណ្តាប្រទេសដែលនៅជិតខាងនឹងអាហ្វហ្កានីស្ថាន និង បណ្តាប្រទេសដៃគូនៅតំបន់។
មានប្រទេសជាច្រើន ជាអាទិ៍ គឺ ចិន អ៊ីរ៉ង់ ឥណ្ឌា ប៉ាគីស្ថាន តាហ្ស៊ីគីស្ថាន តួគ្មេនីស្ថាន បានបញ្ជូន តំណាងខ្លួន ឲ្យមកចូលរួមក្នុង សន្និសីទនេះ។
សហរដ្ឋអាមេរិកបានប្រកាសថា គឺ តំណាងម្នាក់របស់ស្ថានទូតអាមេរិកាំង នៅម៉ូស្គូ ដែលចូលរួមក្នុងសន្និសីទនេះ ដើម្បី “តាមដានអំពីការពិភាក្សា”។ អ្នកនាំពាក្យរង នៃក្រសួងការបរទសអាមេរិក លោក Robert Palladino បានថ្លែងថា ៖ គ្រប់តែប្រទេស ត្រូវតែគាំទ្រដល់កិច្ចចរចាត្រង់ផ្ទាល់ រវាងរដ្ឋាភិបាលអាហ្វហ្កានីស្ថាន និង ពួកតាលីបង់ ដើម្បី នៅទីបំផុត ខ័ណ្ឌបញ្ចប់សង្គ្រាម។ គាត់គូសបញ្ជាក់ព្រមជាមួយនេះថា ទោះរដ្ឋាភិបាលណាក៏ដោយ បូកទាំងរដ្ឋាភិបាលរុស្ស៊ីផង មិនត្រូវជំនួសរដ្ឋាភិបាលអាហ្វហ្កានីស្ថានឡើយ នាកិច្ចចរចាត្រង់ផ្ទាល់ ជាមួយពួកតាលីបង់។
គណៈប្រតិភូរដ្ឋាភិបាលអាហ្វហ្កានីស្ថាន ផ្សំឡើងពី តំណាង ៤ នាក់ នៃ ឧត្តមក្រុមប្រឹក្សាដើម្បីសន្តិភាព ជា អង្គការទទួលបន្ទុកផ្សះផ្សារ ជាមួយពួកបះបោរ -នេះបើតាមសំដីអ្នកនាំពាក្យគណៈប្រតិភូ លោក Sayed Ihsan Taheri ។
ចំណែកអ្នកនាំពាក្យភាគីតាលីបង់ បានឲ្យដឹងថា គណៈប្រតិភូ” ជាន់ខ្ពស់”ពួកគេ ដែលវត្តមាននៅម៉ូស្គូ មានគ្នា ៥ នាក់ ដែលតំណាងឲ្យ “ ការិយាល័យនយោបាយ” ហើយក្នុងក្របខ័ណ្ឌនៃ សន្និសីទ នៅម៉ូស្គូ គេ នឹងពុំជួបចរចាអ្វីណា ជាមួយ គណៈប្រតិភូ រដ្ឋបាលក្រុងកាប៊ូលឡើយ។
ក្នុងសេចក្តីថ្លែងការណ៍ផ្សព្វផ្សាយសប្តាហ៍នេះ ភាគីតាលីបង់ សង្កត់ធ្ងន់ថា ៖ សន្និសីទ នៅម៉ូស្គូ ត្រូវតែបើកផ្លូវ ឲ្យមានការពិភាក្សាស៊ីជម្រៅ ដើម្បីស្វែងរកដំណោះស្រាយដោយសន្តិវិធីឲ្យជម្លោះអាហ្វហ្កានីស្ថាន និង ខ័ណ្ឌ បញ្ចប់ ការកាន់កាប់អាមេរិកាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ