មេដឹកនាំពិភពលោករំលឹកខួប១០០ឆ្នាំ នៃថ្ងៃបិទបញ្ចប់សង្រ្គាមលោកលើកទី១ នៅទីក្រុងប៉ារីស
ចុះផ្សាយនៅថ្ងៃ៖
១១វិច្ឆិកា ១៩១៨ និង ១១វិច្ឆិកា ២០១៨ នៅថ្ងៃខួប១០០ឆ្នាំ នៃការបិទបញ្ចប់សង្រ្គាមលោកលើកទី១ ថ្នាក់ដឹកនាំធំៗ ក្នុងពិភពលោក កំពុងមានវត្តមាន នៅទីក្រុងប៉ារីស នៅថ្ងៃអាទិត្យ នេះ ដើម្បី ចូលរួមប្រារព្ធពិធីបុណ្យរំលឹកដល់ថ្ងៃ ចុះហត្ថលេខាបិទបញ្ចប់សង្រ្គាមលោកលើកទី១។
ទៅតាមការអញ្ជើញរបស់ប្រធានាធិបតី បារាំង លោកអេម៉ានុយអែលម៉ាក្រុង មេដឹកនាំ និងអ្នកតំណាងរបស់ប្រទេសជាង ៧០បានមកចូលរួម រំលឹក ខួប ១០០ឆ្នាំ នៃថ្ងៃបិទបញ្ចប់សង្រ្គាមលោកលើកទី១។ ពិធីបុណ្យប្រព្រឹត្តទៅនៅវិមានជ័យជំនះ ក្នុងទីក្រុងប៉ារីស ជាទីដែលមានកំណត់ត្រាទាហានដែលបានស្លាប់នៅក្នុងសម័យសង្រ្គាមលោក។ ក្រៅតែពីប្រធានាធិបតីអាមេរិក លោកដូណាល់ ត្រាំ ដែលបានអញ្ជើញមកដល់ទីក្រុងប៉ារីស តាំងពីថ្ងៃសៅរ៍ម្សិលមិញ គេឃើញមានវត្តមានប្រធានាធិបតីរុស្ស៊ី លោកវ្លាឌីមៀរ ពូទីន លោកស្រីនាយករដ្ឋមន្រ្តី អង់ហ្គេឡា ម៉ែរកិល ប្រធានាធិបតីតួកគី ស្តេចម៉ារ៉ុក អគ្គលេខាធិការអង្គការសហប្រជាជាតិ មេដឹកនាំបណ្តាប្រទេសអាហ្វ្រិក រដ្ឋមន្រ្តីការបរទេសជប៉ុន នៅក្នុងវេទិការបស់ថ្នាក់ដឹកនាំដែលចូលរួមនៅថ្ងៃនេះ។ ហើយពីខាងភាគីកម្ពុជា ដែលត្រូវបានអញ្ជើញ នៅក្នុងឱកាសខួប១០០ឆ្នាំ នៃការបិទបញ្ចប់ សង្រ្គាមលោកលើកទី១ នៅទីក្រុងប៉ារីស គឺមានលោកជា សុផារ៉ា ឧបនាយករដ្ឋមន្រ្តី និងជារដ្ឋមន្រ្តីសំណង់ និងនគររូបនីយកម្ម។
ប៉ារីស ផ្តួចផ្តើមបង្កើតវេទិការដើម្បីសន្តិភាព ដើម្បី ប្រឆាំងនឹងគំនិតជាតិនិយម
រដ្ឋាភិបាលបារាំងរបស់លោកអេម៉ានុយអែលម៉ាក្រុងបានឆ្លៀតឱកាស ផ្តួចផ្តើម រៀបចំ ព្រឹត្តិការណ៍ពិសេសមួយបន្ថែមទៀត នោះ គេវេទិកាដើម្បីសន្តិភាព។ នៅថ្ងៃអាទិត្យ បន្ទាប់ពីពិធី ដាក់កម្រងផ្កា ថ្លែងសាររំលឹកដល់គុណូបក្ការៈរបស់ទាហាន ប្រជាជនដែលបានពលីជីវិត ក្នុងសង្រ្គាម ថ្នាក់ដឹកនាំពិភពលោកមួយចំនួន ដូចជាលោកស្រី នាយករដ្ឋមន្រ្តីអាល្លឺម៉ង់ជាដើម នឹងទៅបើកសម្ពោធ វេទិកា ដើម្បីសន្តិភាព ដែលរៀបចំជាលើកទី១ នៅទីក្រុងប៉ារីស។ តាមរយៈវេទិកានេះ ប្រធានាធិបតីបារាំង លោកម៉ាក្រុង ចង់ផ្ញើសារសំខាន់ គឺសារៈសំខាន់នៃ នយោបាយ ពហុភាគីនិយម ពោល គឺការរួបរួមគ្នា ដើម្បី សន្តិភាព ដើម្បីជួយគ្នាដោះស្រាយទប់ស្កាត់ជាមុន កុំឲ្យមានផ្ទុះសង្រ្គាមនៅក្នុងពិភពលោក។
នៅក្នុងវេទិកាដែលមានការចូលរួមពីភាគីរដ្ឋាភិបាល សង្គមស៊ីវិល និងក្រុមហ៊ុនឯកជន និងពិភាក្សា គេផ្តោតសំខាន់ទៅលើសន្តិសុខអ៊ីនធ័រនែត ហើយនិងតម្លៃនៃនយោបាយពហុភាគីនិយម នៅក្នុងបរិបទដែលពិភពលោកកំពុងប្រឈមនឹងការកើនឡើងខ្លាំងនៃសំលេងរបស់ក្រុមជាតិនិយម ដែលលែងជឿលើសារៈសំខាន់ នៃសកលភាវូបនីយកម្ម ហើយនិងពហុភាគីតទៅទៀត។ ដោយសារតែ វេទិកាផ្តោតទៅលើសារៈសំខាន់នៃពហុភាគីនោះហើយ មើលទៅ បានជា លោកដូណាល់ ត្រាំ ប្រធានាធិបតីជាតិនិយម ដែល មាននយោបាយធ្វើអ្វីៗដើម្បីប្រយោជន៍មុនដំបូងគេរបស់ជនជាតិអាមេរិក បដិសេធមិនទៅចូលរួមក្នុងវេទិកានៅថ្ងៃនេះ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ