អាមេរិកថា ខ្លួនមិនចង់ក្លាយជាបងធំទេ តែចង់រួមសហការណ៍ជាមួយគ្រប់ប្រទេសនៅក្នុងតំបន់
ចុះផ្សាយនៅថ្ងៃ៖
ស្តាប់ - ០៦:១១
នៅថ្ងៃព្រហស្បតិ៍ ទី១៥ វិច្ឆិកានេះជាថ្ងៃទី៣ និងជាថ្ងៃចុងក្រោយនៃកិច្ចប្រជុំកំពូលអាស៊ានលើកទី៣៣ និងអាស៊ានជាមួយក្រុមប្រទេសដៃគូក្នុងប្រទេសសិង្ហបុរី។ មានកិច្ចប្រជុំកំពូលចំនួន ៣ នៅថ្ងៃចុងក្រោយនេះ ទី១ ជាកិច្ចប្រជុំកំពូលរវាងអាស៊ាន សហរដ្ឋអាមេរិកលើកទី៦ ទី២ ជាកិច្ចប្រជុំកំពូលអាស៊ានបូកបីលើកទី២១ និងទី៣ ជាកិច្ចប្រជុំកំពូលអាស៊ីបូព៌ាលើកទី១៣។ កិច្ចប្រជុំកំពូលទាំង ៣ សុទ្ធតែសំខាន់ដូចគ្នា តែកិច្ចប្រជុំកំពូលអាស៊ីបូព៌ាត្រូវបានគេចាត់ទុកសំខាន់ជាងគេ ព្រោះមាន ១៨ប្រទេសចូលរួម ក្នុងនោះមានសមាជិកអាស៊ានទាំង ១០ ប្រទេសបូក ៨ប្រទេសដៃគូសន្ទនា។
នៅក្នុងកិច្ចប្រជុំកំពូលអាស៊ាន សហរដ្ឋអាមេរិកលើកទី៦ លោកនាយករដ្ឋមន្រ្តីលី សៀនឡុងបានគូសបញ្ជាក់ពីទំនាក់ទំនងសេដ្ឋកិច្ចរឹងមាំរវាងសហរដ្ឋអាមេរិក និងអាស៊ានក្នុងនាមជាដែគូលំដាប់ទី៣ ហើយថា ការរួមចំណែករបស់សហរដ្ឋអាមេរិកគឺធំធេងណាស់ ទាំងក្នុងផ្នែកសេដ្ឋកិច្ច និងសន្តិសុខ។ ចំណែកសុន្ទរកថារបស់លោក Mike Pence បានចាប់អារម្មណ៍លើប្រធានបទច្រើនដែលលាតសន្ធឹងឆ្ងាយហួសពីព្រំដែនអាស៊ានទៅទៀត។ ក្រៅពីបានចាត់ទុកអាស៊ានជាដៃគូយុទ្ធសាស្រ្តមិនអាចខ្វះបាន និងមិនអាចជំនួសបាន លោក Mike Pence បានប្រើច្រើននូវពាក្យ « ឥណ្ឌូប៉ាស៊ីហ្វ៊ិក » ដែលអាមេរិក និងជប៉ុនបានបង្កើតរួមគ្នា។
កន្លងមក អាមេរិកច្រើនប្រើពាក្យអាស៊ីប៉ាស៊ីហ្វិក តែដោយជប៉ុនបានប្រើញឹកញាប់នារយៈពេលចុងក្រោយនេះ អាមេរិកក៏ចាប់ផ្តើមប្រើជាផ្លូវការ។ ឥណ្ឌូប៉ាស៊ីហ្វិកមានបូកបញ្ចូលប្រទេសឥណ្ឌាដែលអាមេរិក និងជប៉ុនចង់បន្ថែមទម្ងន់ដើម្បីប្រឆាំងទប់នឹងឥទ្ធិពលរបស់ចិននៅក្នុងតំបន់។ សុន្ទរកថារបស់លោក Pence បានវាយប្រហារលើចិន ទោះលោក Pence មិនបាននិយាយចំឈ្មោះចិនក៏ដោយដូចឃ្លាថា អនុត្តរភាព ការវាតទី និងការឈ្លានពាននឹងគ្មានកន្លែងរបស់វានៅក្នុងតំបន់ឥណ្ឌូប៉ាស៊ីហ្វិកទេ។
រីឯពាក្យសមុទ្រខាងត្បូងដែលចិនកំពុងមានជម្លោះជាមួយប្រទេសអាស៊ានខ្លះក៏លោក Mike Pence មិនបានប្រើដែរ តែបានឆ្លៀតសៀតស៊កថា អាមេរិកប្តេជ្ញាការពារសេរីភាពធ្វើចរាចរណ៍ផ្លូវសមុទ្រ និងបន្ថែមថា គ្រប់ប្រទេសទាំងអស់អាចចូលខ្លួនទៅក្នុងឥណ្ឌូប៉ាស៊ីហ្វិកបាន តែត្រូវគោរពគ្នាទៅវិញ ទៅមកឲ្យស្មើភាព។ ទាក់ទងនឹងបញ្ហានុយក្លេអ៊ែរកូរ៉េខាងជើង លោក Pence បានអំពាវនាវឲ្យបន្តដាក់គំនាបដើម្បីឲ្យរបបក្រុងព្យុងយ៉ាងបោះបង់ចោលកម្មវិធីនុយក្លេអ៊ែរ។
អាស៊ានបូកបីទទួលបានប្រយោជន៍ពាណិជ្ជកម្មធំធេងក្នុងរយៈពេលជាង ២០ឆ្នាំ
នេះជាលើកទី២១ ដែលកិច្ចប្រជុំកំពូលអាស៊ានបូកបី ពោលសមាជិកអាស៊ាន ១០ប្រទេសបូកចិន ជប៉ុន និងកូរ៉េខាងត្បូងត្រូវបានរៀបចំឡើង។ នៅក្នុងកិច្ចប្រជុំកំពូល អាស៊ានបូកបីបានទទួលស្គាល់ថាក្នុងរយៈពេលជាង ២០ឆ្នាំកន្លងទៅ កិច្ចសហប្រតិបត្តិការរវាងអាស៊ាន និងប្រទេសមហាយក្សអាស៊ីទាំង ៣ ក្នុងផ្នែកពាណិជ្ជកម្មទទួលបានលទ្ធផលគួរឲ្យស្ញប់ស្ញែង និងអាចនាំឲ្យអាស៊ានបូកបីក្លាយទៅជាតំបន់ដ៏វិបុលភាពជាងគេមួយក្នុងលោក។ នៅក្នុងន័យនេះ លោកនាយករដ្ឋមន្រ្តីសិង្ហបុរីលី សៀនឡុងបានប្រាប់ថាក្នុងឆ្នាំ ២០១៧ ទឹកប្រាក់នៃការដោះដូរពាណិជ្ជកម្មរវាងអាស៊ាន និងប្រទេសទាំង ៣ មានជាង ៨០០ ០០០លានដុល្លារ។
ទន្ទឹមគ្នានេះ កិច្ចសហប្រតិបត្តិរវាងអាស៊ាន និងប្រទេសទាំងបីក៏បានផ្តោតសំខាន់លើផ្នែកដែលទាក់ទងផ្ទាល់នឹងជីវិតរស់នៅប្រចាំថ្ងៃរបស់ប្រជាជន ដូចយ៉ាងផ្នែកអប់រំ ឬសន្តិសុខចំណីអាហារជាដើម។ នាឱកាសកិច្ចប្រជុំកំពូលលើកទី២១ ឆ្នាំនេះ អាស៊ានបូកបីបានបន្តផ្តោតសំខាន់លើបញ្ហាសុខភាពដោយចេញសេចក្តីថ្លែងការណ៍មួយស្តីពីកិច្ចសហប្រតិបត្តិការក្នុងការប្រយុទ្ធប្រឆាំងនឹងភាពស៊ាំនៃថ្នាំអង់ទីប៊ីយោទិក។ តែទន្ទឹមគ្នានេះ អាស៊ីបូកបីក៏បានសម្តែងក្តីបារម្ភចំពោះបរិយាកាសមិនល្អដែលកើតចេញពីសង្រ្គាមពាណិជ្ជកម្មសព្វថ្ងៃ។ នៅក្នុងន័យនេះ លោកលី សៀនឡុងបានអំពាវនាវដល់សមាជិកទាំងអស់ឲ្យប្រឹងប្រែងទ្វេដងក្នុងការការពារកិច្ចព្រមព្រៀងពហុភាគី។
អាស៊ីបូព៌ាប្តេជ្ញាបង្កើនជំនឿទុកចិត្តគ្រប់កម្រិតដើម្បីប្រសិទ្ធិភាពខ្ពស់
កិច្ចប្រជុំកំពូលអាស៊ីបូព៌ាលើកទី១៣ ដែលមានសមាជិក ១៨ ប្រទេស គឺសមាជិកអាស៊ាន ១០ប្រទេសបូកចិន ជប៉ុន កូរ៉េខាងត្បូង ឥណ្ឌា អូស្រា្តលី នូវែលហ្សេឡង់ សហរដ្ឋអាមេរិក និងរុស្ស៊ីបានពិភាក្សាគ្នាលើទិសដៅអនាគតដើម្បីឆ្លើយតបនឹងបញ្ហាប្រឈមដែលពិភពលោកកំពុងជួបប្រទះសព្វថ្ងៃ។ កិច្ចប្រជុំបានយល់ឃើញថា ការពង្រឹងជំនឿទុកចិត្តលើគ្រប់កម្រិតជារឿងសំខាន់ដើម្បីឲ្យអាស៊ីបូព៌ាមានដំណើរការដោយរលូន និងកាន់តែមានប្រសិទ្ធិភាព។ មានសេចក្តីថ្លែងការណ៍មួយចំនួនដែលបានអនុម័តស្តីពីសន្តិសុខនុយក្លេអ៊ែរ ការប្រយុទ្ធប្រឆាំងនឹងការគំរាមកំហែងពីភេរវជនបរទេស ឬមួយស្តីពីសន្តិសុខផ្នែកបច្ចេកវិទ្យាព័ត៌មាន និងសេដ្ឋកិច្ចឌីជីថលជាដើម។
ប្រទេសសិង្ហបុរីផ្ទេរប្រធានផ្លាស់វេនអាស៊ានឲ្យប្រទេសថៃសម្រាប់ឆ្នាំ ២០១៩
កិច្ចប្រជុំកំពូលអាស៊ានលើកទី៣៣ និងអាស៊ានជាមួយប្រទេសដៃគូបានបិទបញ្ចប់ដោយជោគជ័យ។ ជោគជ័យសម្រាប់ប្រទេសសិង្ហបុរីដែលបានរៀបចំកិច្ចប្រជុំកំពូលអាស៊ានលើកទី៣៣ និងអាស៊ានជាមួយដៃគូដោយរលូន និងគ្មានឧប្បត្តិហេតុអ្វីកើតឡើងគួរឲ្យកត់សម្គាល់។ សន្តិសុខ និងសុវត្ថិភាពសម្រាប់ថ្នាក់ដឹកនាំគ្រប់រូប នៅក្នុង និងខាងក្រៅនៃអាគាររៀបចំកិច្ចប្រជុំក៏ដូចជានៅទីតាំងសំខាន់ៗមួយចំនួនត្រូវបានការពារយ៉ាងតឹងរឹងជាមួយនឹងវត្តមានកម្លាំងទាហាន និងប៉ូលិសជិត ៧ ០០០នាក់។
កិច្ចប្រជុំកំពូលបានបិទបញ្ចប់ជាមួយនឹងការឡើងថ្លែងសុន្ទរកថារបស់លោកនាយករដ្ឋមន្រ្តីសិង្ហបុរីលី សៀនឡុង។ នៅក្នុងពាក្យចុងក្រោយនៃសុន្ទរកថា លោកលី សៀនឡុងបាននិយាយជាភាសាថៃថា សាវ៉ាត់ឌីខាប់។ សាវ៉ាត់ឌីខាប់ដែលលោកលី សៀនឡុងចង់និយាយសំដៅសមភាគីថៃលោកប្រាយុទ្ធ ចាន់អូចាដែលនឹងត្រូវធ្វើជាប្រធានផ្លាស់វេនអាស៊ាននៅឆ្នាំ ២០១៩៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ