កាសែត៖ វ៉ាស៊ីនតោនបញ្ចុះបញ្ចូលប្រទេសសម្ព័ន្ធមិត្តកុំឲ្យប្រើ បចេ្ចកវិទ្យារបស់ក្រុមហ៊ុនHuawei
អាជ្ញាធរអាមេរិកាំងកំពុងព្យាយាមដើរបញ្ចុះបញ្ចូល ក្រុមហ៊ុន ទូរស័ព្ទ នៅក្នុងប្រទេសសម្ព័ន្ធមិត្តអាមេរិក កុំឲ្យប្រើប្រាស់បច្ចេកវិទ្យារបស់ក្រុមហ៊ុនចិន ហួវៃ Huawei។ តាមការចុះផ្សាយរបស់កាសែតអាមេរិកាំង Wall Street Journal ដែលបានដកស្រង់ប្រភព ពីមន្រ្តីអាមេរិកាំង ក្រុងវ៉ាស៊ីនតោនបារម្ភថា ក្រុមហ៊ុនទូរស័ព្ទចិន ហួវៃ អាចចូលលួចយកការណ៍សម្ងាត់ ពីបណ្តាញទាក់ទងយោធារបស់អាមេរិក នៅបរទេស ដូចជាអាល្លឺម៉ង់ ជប៉ុន ឬអ៊ីតាលីជាដើម សម្រាប់ក្រសួងការពារជាតិចិន។
ចុះផ្សាយនៅថ្ងៃ៖ កែប្រែថ្ងៃទី៖
ក្រុមហ៊ុនទូរស័ព្ទ ហួវៃ ត្រូវបានហាមឃាត់ តិច ឬច្រើន នៅទីផ្សារ អាមេរិក បន្ទាប់ពីរបាយការណ៍របស់សភាអាមេរិកបានចង្អុរ ចោទប្រកាន់ថា ជាគ្រោះថ្នាក់សម្រាប់សន្តិសុខជាតិអាមេរិក។ គឺក្នុងហេតុផលសន្តិសុខជាតិដដែលនេះឯង ដែលមន្រ្តីអាមេរិកាំងខំប្រឹងលើកយកមកបញ្ចុះបញ្ចូលបណ្តាក្រុមហ៊ុនទូរស័ព្ទ នៅក្នុងប្រទេសសម្ព័ន្ធមិត្ត ឲ្យឈប់ប្រើ ឬទិញ បច្ចេកវិទ្យាពីក្រុមហ៊ុនចិន ហួវៃ។
តាមការចុះផ្សាយរបស់កាសែតWall Street Journal កាលពីថ្ងៃព្រហស្បតិ៍ អ្នកទទួលខុសត្រូវជាន់ខ្ពស់អាមេរិកាំងកំពុងដើរប្រជុំជាមួយសមភាគីនិងមេដឹកនាំរបស់ក្រុមហ៊ុនទូរគមនាគមន៍ នៅក្នុងបណ្តាប្រទេសសម្ព័ន្ធមិត្តអាមេរិក ដូចជាអាល្លឺម៉ង់ អ៊ីតាលី ឬជប៉ុន ជាទីដែលកងទ័ពអាមេរិកាំងប្រើប្រាស់បណ្តាញទូរគមនាគមន៍ ក្នុងស្រុក។
តាមមន្រ្តីអាមេរិក នៅក្នុងបណ្តាប្រទេសសម្ព័ន្ធមិត្តរបស់អាមេរិក ដែលមានក្រុមហ៊ុនហួវៃ បោះទុនវិនិយោគរួចហើយនោះ ការសហការ ទិញប្រើបច្ចេកវិទ្យារបស់ក្រុមហ៊ុនចិន ហួវៃ នឹងធ្វើឲ្យក្រុមហ៊ុនហួវៃ ចូលគ្រប់គ្រងបណ្តាញទូរគមនាគមន៍ ក្នុងស្រុក ដើម្បី លួច យកការណ៍សម្ងាត់ សម្រាប់ប្រយោជន៍ក្រសួងការពារជាតិចិន។ អ្វីដែលធ្វើឲ្យអាមេរិកខ្លាចខ្លាំងជាងគេ គឺបច្ចេកវិទ្យាបណ្តាញទូរស័ព្ទជំនាន់ទី៥ រឺហៅកាត់ថា ប្រព័ន្ធ5G ដែលក្រុមហ៊ុនហួវៃ ប្រុងនឹងដាក់ឲ្យប្រើប្រាស់ នាពេលខាងមុខ។ បណ្តាញទូរស័ព្ទ5G ត្រូវបានស្គាល់ថា មានល្បឿនកាន់តែលឿនរហ័ស ដើម្បីឆ្លើយតប ទៅនឹងការរីកឡើង នៃការប្រើប្រាស់អ៊ីនធើនែត ព្រមទាំងកម្មវិធី Applications នានា ដែលទំនើបថ្មី តែមានទំហំធំ។ ប៉ុន្តែ សម្រាប់អាជ្ញាធរអាមេរិកាំង បណ្តាញទូរស័ព្ទទំនើបចុងក្រោយ5 G នឹងជួយឲ្យចារកិច្ចចិនអាចចូលទៅរំខានឬផ្តាច់បណ្តាញទូរគមនាគមន៍ក្នុងប្រទេសសម្ព័ន្ធមិត្តអាមេរិក។
ដើម្បីបញ្ចុះបញ្ចូលឲ្យក្រុមហ៊ុន និងប្រទេសសម្ព័ន្ធមិត្តឈប់ប្រើប្រាស់បណ្តាញបច្ចេកវិទ្យារបស់ហួវៃ អាមេរិកមានគម្រោងផ្តល់ជំនួយថវិកាដល់ប្រទេស ដែលចង់អភិវឌ្ឍបណ្តាញទូរស័ព្ទរបស់ខ្លួន ដោយមិនចាំបាច់ត្រូវការជំនួយរបស់ក្រុមហ៊ុនចិន។
ទាក់ទងនឹងការចុះផ្សាយរបស់កាសែតWall Street Journal អ្នកនាំពាក្យរបស់ក្រសួងការបរទេស ចិនបានថ្លែងប្រាប់ទីភ្នាក់ងារព័ត៌មានReuters នៅថ្ងៃសុក្រម្សិលមិញថា ទីក្រុងប៉េកាំងសង្ឃឹមលើប្រទេសដែលពាក់ព័ន្ធ ក្នុងការផ្តល់បរិស្ថានវិនិយោគដ៏ត្រឹមត្រូវសម្រាប់ក្រុមហ៊ុនចិន។ នៅក្នុងសេចក្តីថ្លែងការណ៍របស់ខ្លួនវិញ ក្រុមហ៊ុនហួវៃបានអះអាងថា ក្រុមហ៊ុនឯករាជ្យ និងមិនដែលប្រើប្រាស់ឧបករណ៍ បច្ចេកវិទ្យារបស់ខ្លួន ដើម្បីស៊ើបការណ៍សម្ងាត់ ឬបំផ្លាញ បណ្តាញទូរគមនាគមន៍នៅក្នុងប្រទេសដែលទិញប្រើបច្ចេកវិទ្យា របស់ក្រុមហ៊ុនហួវៃនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ