ព័រទុយហ្កាល់បន្តស្វាគមន៍វិនិយោគរបស់ចិនដោយមិនឈឺក្បាលនឹងក្តីបារម្ភរបស់អឺរ៉ុប
លោកប្រធានាធិបតីចិនស៊ី ជីនពីងបានផ្តើមដំណើរទស្សនកិច្ចរយៈពេល ២ថ្ងៃនៅក្នុងប្រទេសព័រទុយហ្កាល់ដោយចាប់ផ្តើមនៅរសៀលថ្ងៃអង្គារ ទី៤ ធ្នូ។ គោលដៅ គឺដើម្បីពង្រឹងទំនាក់ទំនងសេដ្ឋកិច្ចជាមួយប្រទេសអឺរ៉ុបមួយនេះដែលកំពុងជួបវិបត្តិហិរញ្ញវត្ថុធ្ងន់ធ្ងរ។ នៅក្នុងទីក្រុងលីសបោន លោកស៊ី ជីនពីងបានជួបសន្ទនាជាមួយសមភាគីព័រទុយហ្កាល់លោកម៉ារសឺឡូ ដឺស៊ូសា និងចូលរួមជាអធិបតីនៅក្នុងពិធីចុះហត្ថលេខាលើកិច្ចព្រមព្រៀងកិច្ចសហប្រតិបត្តិការជាច្រើននៅថ្ងៃពុធ ទី៥ ធ្នូ ពិសេសកិច្ចព្រមព្រៀងស្តីពីការតភ្ជាប់កំពង់ផែព័រទុយហ្កាល់ Sines នៅប៉ែកនិរតីទៅនឹងផ្លូវមួយខ្សែក្រវ៉ាត់មួយរបស់ចិន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៣
បន្តិចម្តងៗ មានប្រទេសអឺរ៉ុបម្តងមួយៗបានរត់ទៅឱបចិន ឬមួយក៏អាចនិយាយផ្ទុយវិញថា ចិនបានងាកទៅក្រសោកប្រទេសអឺរ៉ុបម្តងមួយៗ ពិសេសប្រទេសអឺរ៉ុបណាដែលកំពុងជួបវិបត្តិហិរញ្ញ និងត្រូវការវិនិយោគចិន ដូចប្រទេសក្រិក និងប្រទេសព័រទុយហ្កាល់នៅពេលនេះ។ ជម្រើសងាករកព័រទុយហ្កាល់មិនមែនជាជម្រើសចៃដន្យឡើយ ព្រោះជាប្រទេសដែលមានទីតាំងភូមិសាស្រ្តល្អណាស់សម្រាប់ភ្ជាប់រវាងផ្លូវមួយខ្សែក្រវ៉ាត់មួយតាមផ្លូវគោក និងផ្លូវមួយខ្សែក្រវ៉ាត់មួយតាមផ្លូវសមុទ្រ នេះជាការគូសបញ្ជាក់របស់លោកស៊ី ជីនពីងនៅក្នុងកាសែតព័រទុយហ្កាល់ចេញផ្សាយថ្ងៃអាទិត្យ ទី២ ធ្នូ។
អ្វីដែលប្រមុខរដ្ឋចិនចង់និយាយ គឺគម្រោងហេដ្ឋារចនាសម្ព័ន្ធនៃផ្លូវមួយខ្សែក្រវ៉ាត់មួយដែលចិនចង់តភ្ជាប់ទំនាក់ទំនងពាណិជ្ជកម្មរវាងចិនជាមួយអាស៊ី អឺរ៉ុប និងអាហ្រ្វិក។ គម្រោងមួយនេះរបស់ចិនកំពុងធ្វើឲ្យអឺរ៉ុបបែកបាក់ តែមានប្រទេសសមាជិកអឺរ៉ុបខ្លះបានយល់ព្រមសហការណ៍ជាមួយចិន ដូចករណីប្រទេសក្រិក និងប្រទេសអឺរ៉ុបខាងកើតមួយចំនួន ហើយប្រទេសអឺរ៉ុបខ្លះទៀតចេញមុខជំទាស់ដោយខ្លាចចិនបង្កើនឥទ្ធិពលនយោបាយរបស់ខ្លួនទៅប៉ែកខាងលិច។ តែនាយករដ្ឋមន្រ្តីព័រទុយហ្កាល់លោកអង់តូនីញ៉ូ កូស្តាបានអះអាងច្បាស់ៗថា ព័រទុយហ្កាល់មិនខ្វល់ខ្វាយពីប្រភពវិនិយោគបរទេសទេ ទោះមកពីចិន ឬពីប្រទេសផ្សេង និងថា សហភាពអឺរ៉ុបមិនគួរជ្រើសផ្លូវការពារនិយមទេ។
គួររម្លឹកថា ព័រទុយហ្កាល់ដែលរងគ្រោះដោយវិបត្តិប្រាក់បំណុលក្នុងតំបន់ចាយប្រាក់អឺរ៉ូបានទទួលប្រាក់កម្ចីពីអឺរ៉ុប និងមូលនិធិរូបិយវត្ថុអន្តរជាតិចំនួន ៧៨ ០០០លានអឺរ៉ូក្នុងឆ្នាំ ២០១១។ ជាមួយនឹងប្រាក់កម្ចីនេះ រដ្ឋាភិបាលក្រុងលីសបោនបានចាយវាយសន្សំសំចៃ និងលក់ក្រុមហ៊ុនរដ្ឋមួយទៅឲ្យឯកជនគ្រប់គ្រង ពិសេសអ្នកវិនិយោគចិន។ តាំងពីពេលនោះមក លុយវិនិយោគចិនបានធ្វើក្រុមហ៊ុនធំៗ រួមទាំងធនាគារជាច្រើនរួចផុតពីភាពក្សៃធន។ លោកស្រីយូ ហ្ស៊ី អ្នកស្រាវជ្រាវនៃមជ្ឈមណ្ឌល « Chatham House » ក្នុងប្រទេសអង់គ្លេសបានបញ្ជាក់ថា គេត្រូវវិភាគលើវិនិយោគចិននៅអឺរ៉ុបតាមផ្លូវពីរ វិនិយោគខ្លះមានគោលដៅយុទ្ធសាស្រ្ត ហើយវិនិយោគខ្លះទៀតមានគោលដៅត្រឹមតែចំណេញលុយប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ