HCR ៖ រ៉ូហ៊ីងយ៉ា ដែលគេចាប់បញ្ជូនទៅជំរំភូមាវិញ ត្រូវការជំនួយជាបន្ទាន់
ជនជាតិភាគតិចកាន់សាសនាអ៊ីស្លាម រ៉ូហ៊ីងយ៉ា ដែលបានជួលមេខ្យល់ឱ្យនាំរត់គេចពីជំរំនៅភូមា តែត្រូវបានអាជ្ញាធរចាប់ខ្លួនបាននៅសមុទ្ទនិងបញ្ជូនមកកន្លែងដើមវិញ កំពុងត្រូវការជំនួយជាបន្ទាន់ ! ព្រោះពួកគេអស់ទាំងថវិកា និងទាំងរបបអាហារ។ នេះបើតាមសេចក្តីប្រកាសរបស់ឧត្តមស្នងការការពារជនភៀសខ្លួនអង្គការសហប្រជាជាតិ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៤
ក្រោយវិបត្តិសហគមន៍ដ៏ហិង្សា នៅឆ្នាំ២០១២ ដែលរាលដាលជាបោសសម្អាតជាតិពិន្ធុ និងដែលបានជំរុញឱ្យជនជាតិរ៉ូហ៊ីងយ៉ា ទាំងហ្វូងៗនាំគ្នារត់គេចខ្លួន ទៅបង់ក្លាដែសមក សព្វថ្ងៃនេះ មានជនជាតិភាគតិចរ៉ូហ៊ីងយ៉ា ប្រមាណ ១២ម៉ឺននាក់ កំពុងបន្តរស់ក្នុងជំរំដ៏តូចចង្អៀតបំផុតនៅភូមា។ ជាជំរំបណ្តោះអាសន្នទេ ប៉ុន្តែបើគិតសរុបទៅវាឡើងដល់រាប់ឆ្នាំទៅហើយ ! ហើយទទួលបានការថែទាំសុខភាព អប់រំ និងសិទ្ធិប្រកបរបបយ៉ាងត្រដាបត្រដួស។
រដូវប្រាំងបានមកដល់ ផ្ទៃសមុទ្ទចាប់ស្ងប់ស្ងាត់ សកម្មភាពរត់ភៀសខ្លួន តាមផ្លូវទឹក តាមទូក សំដៅម៉ាឡេស៊ី និងឥណ្ឌូណេស៊ី បានចាប់ផ្តើម។ នៅសប្តាហ៍នេះ មានកូនទូកដឹកជនរ៉ូហ៊ីងយ៉ាមួយគ្រឿងបានសម្រេចទិសដៅ ទៅដល់កោះអាឆេ ក្រុងភាគខាងជើងកោះស៊ូមាត្រា ដែលល្បីខ្លាំងជាកោះអ៊ីស្លាមអភិរក្សនិយម។
ប៉ុន្តែមានទូកជាច្រើនទៀតត្រូវបាន ស្ទាក់ចាប់បាន នៅក្នុងផ្ទៃទឹកភូមា និងដោយអាជ្ញាធរភូមា ហើយអ្នកដំណើរជាជនជាតិរ៉ូហ៊ីងយ៉ាទាំងអស់ត្រូវបានបញ្ជូនឱ្យត្រលប់ចូលជំរំវិញ។ គឺជនរ៉ូហ៊ីងយ៉ាទាំងនេះឯងដែលត្រូវការជំនួយសង្គ្រោះជាបន្ទាន់។ ព្រោះពួកគេមួយភាគធំ បានលក់អស់ទ្រព្យសម្បត្តិ ដើម្បីប្រមូលលុយទៅបង់ឱ្យខ្យល់នាំរត់តាមទូក។ ថ្លៃឈ្នួលសម្រាប់ម្នាក់ៗអាចឡើងដល់៧០០ដុល្លារ។ នេះបើតាមបញ្ជាក់របស់អ្នកនាំពាក្យនៃភ្នាក់ងារទទួលបន្ទុកជនភៀសខ្លួនអង្គការសហប្រជាជាតិ HCR។
អ្នកកាសែតមិនត្រូវបានអាជ្ញាធរអនុញ្ញតចូលទៅក្នុងជំរំនោះឡើយ ក្រៅអំពីនៅពេលមានកម្មវិធីចុះសួរសុខទុក្ខមួយភ្លែតដែលរដ្ឋាភិបាលភូមាបានរៀបចំឡើង។ ប៉ុន្តែបើតាមយុវជនរ៉ូហ៊ីងយ៉ាម្នាក់ ដែលក្នុងជំរំក្បែរក្រុងSittwe រដ្ឋធានីរបស់រដ្ឋរ៉ាឃីន បានរៀបរាប់ប្រាប់AFPថា គេបានបង្ខំចិត្តលក់សំបុត្របើករបបអាហារ ដើម្បីបង្គ្រប់លុយឱ្យគេនាំរត់ចេញពីជំរំ។ ដូច្នេះពេលគេចាប់បញ្ជូនមកវិញ ពួកគេពិតជាគ្មានអ្វីទទួលទាន ហើយក៏មិនអាចទារលុយមកវិញបានដែរ។
មេប៉ូលិសរដ្ឋរ៉ាឃីន បានប្រកាសចាប់ខ្លួនមេខ្យល់៦នាក់ តែទទួលស្គាល់ថាមិនអាចគ្រប់គ្រងតំបន់បានទាំងស្រុងទេ។ សូមបញ្ជាក់ថា កាលពីឆ្នាំ២០១៥ មានជនជាតិរ៉ូហ៊ីងយ៉ារាប់ពាន់នាក់បានសាកល្បងរត់តាមទូក។ តែឆ្នាំទំនងជាពុំមានច្រើនទេ នេះបើតាមគំនិតរបស់អ្នកសង្កេតការណ៍ជាច្រើន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ