ថៃ៖របបសឹកបានបើកផ្លូវឲ្យគណបក្សនយោបាយធ្វើយុទ្ធនាការឃោសនានយោបាយឡើងវិញ
នៅក្នុងប្រទេសថៃ របបសឹកដែលបានកាន់អំណាចតាំងពីជាង ៤ឆ្នាំបានប្រកាសអនុញ្ញាតឲ្យគណបក្សនយោបាយធ្វើយុទ្ធនាការឃោសនាបោះឆ្នោតសម្រាប់ត្រៀមចូលរួមបោះឆ្នោតក្នុងឆ្នាំ ២០១៩។ សេចក្តីប្រកាសនេះត្រូវបានធ្វើឡើងនៅក្នុងកាសែតផ្លូវការចេញផ្សាយនាថ្ងៃអង្គារ ទី១១ ធ្នូ។ គួររម្លឹកថា សិទ្ធិធ្វើសកម្មភាពនយោបាយដែលរបបសឹកបានហាមឃាត់ត្រូវបានក្រុមអ្នកនយោបាយមកពីគ្រប់និន្នាការទាមទារអស់ជាច្រើនខែកន្លងមក។ ចំណែកគម្រោងរៀបចំបោះឆ្នោតសភាដែលរបបសឹកបានសន្យាក៏ត្រូវបានលើកពេលជាច្រើនដងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣១
គេនៅមិនទាន់ដឹងថា តើរបបសឹកនឹងរៀបចំការបោះឆ្នោតសភានៅដើមឆ្នាំ ២០១៩ ដូចដែលខ្លួនបានសន្យាឬអត់ទេ។ អ្វីដែលគេដឹងចាប់ពីពេលនេះដល់ថ្ងៃបោះឆ្នោត សកម្មភាពនយោបាយត្រូវបានរបបសឹកអនុញ្ញាតឲ្យមានឡើងវិញ ហើយគ្រប់គណបក្សនយោបាយទាំងអស់មានសិទ្ធិធ្វើយុទ្ធនាការឃោសនាបោះឆ្នោត។ ក្រៅពីគណបក្សរបស់លោកនាយករដ្ឋមន្រ្តីប្រាយុទ្ធ ចាន់អូចា គេសង្កេតឃើញមានវត្តមានគណបក្សថ្មីៗជាច្រើនទៀត ដូចយ៉ាងគណបក្សសៀម ឬគណបក្សឯកភាពប្រទេសថៃជាដើម។ តែអ្វីជាការកត់សម្គាល់ គណបក្សដែលទើបបង្កើតថ្មីចូលក្នុងឆាកនយោបាយច្រើនជាគណបក្សមានទំនោររករបបសឹក។
ដោយឡែក គណបក្សភឿថៃដែលបានគ្របដណ្តប់ជីវិតនយោបាយថៃតាំងពីជាង ២០ឆ្នាំហាក់កំពុងចុះខ្សោយឥទ្ធិពលនាពេលបច្ចុប្បន្ន។ មូលហេតុ គឺមកពីមានមេដឹកនាំល្បីៗមួយចំនួនបានបង្ខំចិត្តភៀសខ្លួនទៅរស់នៅបរទេស។ លោកស្រីយីងឡាក់ដែលរដ្ឋាភិបាលរបស់លោកស្រីត្រូវបានរបបសឹកធ្វើរដ្ឋប្រហារទម្លាក់ក្នុងឆ្នាំ ២០១៤ កំពុងរស់នៅក្នុងប្រទេសអង់គ្លេស។ បងប្រុសរបស់គាត់ គឺលោកថាក់ស៊ីនក៏កំពុងភៀសខ្លួនរស់នៅបរទេសដែរ។ ទោះជាយ៉ាងនេះក្តី រចនាសម្ព័ន្ធរបស់គណបក្សភឿថៃនៅបន្តមាន និងត្រូវបានគេចាត់ទុកជាបក្សប្រឆាំងដ៏ធំមួយនៅក្នុងឆាកនយោបាយថៃសព្វថ្ងៃ។
ក្រៅពីមេក្រុមប្រឆាំងជាប្រពៃណីចេញមកពីគណបក្សភឿថៃ ឬគណបក្សផ្សេង គេសង្កេតឃើញមានវត្តមានមេប្រឆាំងជំនាន់ថ្មីជាច្រើនរូបផ្សេងទៀត ពិសេសសេដ្ឋីលោកថាណាថន ជួងរុងរឿងដែលមានអាយុ ៣៩ឆ្នាំ និងដែលទើបបានបង្កើតគណបក្សមួយឈ្មោះ « Future Forward » ឬ « អនាគតទៅមុខ »។ តែក្នុងខែកញ្ញាកន្លងទៅ សេដ្ឋីអ្នកនយោបាយវ័យក្មេងរូបនេះត្រូវបានតុលាការចោទប្រកាន់ពីបទផ្សាយព័ត៌មានមិនពិតតាមបណ្តាញសង្គម Facebook ដោយចោទរបបសឹកពីបទបំភិតបំភ័យគូប្រជែងនយោបាយនៅមុនបោះឆ្នោត។
គួរបញ្ជាក់ថា មុននឹងសម្រេចឲ្យមានការរៀបចំបោះឆ្នោតពិតប្រាកដ របបសឹកបានអូសបន្លាយពេលដើម្បីរៀបចំជើងព្រួល និងប្រើគ្រប់វិធីសាស្រ្តទាំងអស់ដើម្បីរារាំង និងបញ្ចុះឥទ្ធិពលរបស់ក្រុមប្រឆាំង។ ជាក់ស្តែង ការអនុម័តរដ្ឋធម្មនុញ្ញថ្មីដ៏ចម្រូងចម្រាសក្នុងឆ្នាំ ២០១៦ ការជ្រើសរើសសមាជិកព្រឹទ្ធសភាថ្មីដោយមិនបាច់បោះឆ្នោត និងបង្កើនការគ្រប់គ្រងលើក្រុមអ្នកតំណាងរាស្រ្តជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ